અદાલતોમાં શૌચાલયની કમી પર સુપ્રીમ કોર્ટનું કડક વલણઃ 20 હાઇકોર્ટ સામે નારાજગી વ્યક્ત કરી
નવી દિલ્હીઃ 16 જુલાઈ, 2025: સુપ્રીમ કોર્ટે બુધવારે દેશની વિવિધ અદાલતો અને ટ્રિબ્યુનલોમાં શૌચાલયની સુવિધા સુનિશ્ચિત કરવાના પોતાના નિર્ણયનું પાલન કરતી 20 હાઇકોર્ટ દ્વારા સ્ટેટસ રિપોર્ટ ફાઇલ ન કરવા પર નારાજગી વ્યક્ત કરી હતી અને તેમને આઠ અઠવાડિયાની છેલ્લી તક આપી હતી. જસ્ટિસ જે.બી. પારડીવાલા અને જસ્ટિસ આર. મહાદેવનની ખંડપીઠે કડક સ્વરમાં કહ્યું હતું કે, જો આગામી આઠ અઠવાડિયામાં રિપોર્ટ ફાઇલ નહીં કરવામાં આવે તો પરિણામોનો સામનો કરવો પડશે.
સુપ્રીમ કોર્ટે માંગ્યો સ્ટેટસ રિપોર્ટ
15 જાન્યુઆરીના રોજ સુપ્રીમ કોર્ટે પોતાના ચુકાદામાં કહ્યું હતું કે, બંધારણની કલમ 21 હેઠળ યોગ્ય સ્વચ્છતાની પહોંચ એ મૂળભૂત અધિકાર છે. વિવિધ નિર્દેશો આપતાં, કોર્ટે તમામ હાઇકોર્ટ, રાજ્ય સરકારો અને કેન્દ્રશાસિત પ્રદેશોને તમામ કોર્ટ પરિસર અને ટ્રિબ્યુનલમાં પુરુષો, મહિલાઓ, દિવ્યાંગજન અને ટ્રાન્સજેન્ડર વ્યક્તિઓ માટે અલગ શૌચાલયની સુવિધા પૂરી પાડવાનો નિર્દેશ આપ્યો હતો. છેલ્લી સુનાવણીમાં, ચાર મહિનાની અંદર સ્ટેટસ રિપોર્ટ દાખલ કરવા કહેવામાં આવ્યું હતું.
ફક્ત 5 હાઇકોર્ટે દાખલ કર્યો રિપોર્ટ
બુધવારે, ખંડપીઠે નોંધ્યું હતું કે, અત્યાર સુધીમાં ફક્ત ઝારખંડ, મધ્યપ્રદેશ, કોલકાતા, દિલ્હી અને પટના હાઈકોર્ટે જ રિપોર્ટ દાખલ કર્યા છે. દેશમાં કુલ 25 હાઇકોર્ટ છે. અનેક હાઇકોર્ટોએ હજુ સુધી તેમના રિપોર્ટ દાખલ નથી કર્યા. સુપ્રીમ કોર્ટે તેમને આઠ અઠવાડિયામાં રિપોર્ટ દાખલ કરવાની છેલ્લી તક આપી છે. આ સાથે કોર્ટે સ્પષ્ટતા કરી કે, જો તેઓ કામ કરવામાં નિષ્ફળ જશે, તો સંબંધિત હાઇકોર્ટના રજિસ્ટ્રાર જનરલને કોર્ટમાં રૂબરૂ હાજર રહેવું પડશે.
15 જાન્યુઆરીના પોતાના ચુકાદામાં સુપ્રીમ કોર્ટે કહ્યું હતું કે, હાઇકોર્ટ ખાતરી કરશે કે, શૌચાલયની સુવિધાઓ સ્પષ્ટ રીતે ચિહ્નિત થયેલ હોય અને ન્યાયાધીશો, વકીલો, અરજદારો અને કોર્ટ સ્ટાફ માટે સુલભ હોય. આ હેતુ માટે, દરેક હાઇકોર્ટમાં એક સમિતિની રચના કરવી જોઈએ, જેનું નેતૃત્વ મુખ્ય ન્યાયાધીશ દ્વારા નિયુક્ત ન્યાયાધીશ દ્વારા કરવામાં આવે.
આ પણ વાંચોઃ તપાસ એજન્સી દ્વારા હેરાનગતિ પર સુપ્રીમ કોર્ટનું કડક વલણઃ કેન્દ્ર સરકારને મોકલી નોટિસ
આ પણ વાંચોઃ રેનોલ્ટ તેના ક્વિડ મોડલનું લાવશે ઈલેક્ટ્રીક વર્ઝનઃ સૌથી સસ્તી EV કારના બજારમાં ધૂમ મચાવી દેશે!
