સુપ્રીમ કોર્ટે રેસલર સુશીલ કુમારના જામીન રદ્દ કર્યા, એક સપ્તાહમાં સરેન્ડર કરવા આદેશ

નવી દિલ્હી, 13 ઓગસ્ટ 2025: સુપ્રીમ કોર્ટે બુધવારે બે વખતના ઓલિમ્પિક પદક વિજેતા અને પહેલવાન સુશીલ કુમારના જામીન રદ્દ કરી દીધા છે. સુશીલ કુમાર જુનિયર રાષ્ટ્રીય કુસ્તી ચેમ્પિયન સાગર ધનખડની હત્યાના કેસમાં મુખ્ય આરોપી છે. ન્યાયમૂર્તિ સંજય કરોલ અને પ્રશાંત કુમાર મિશ્રાની ખંડપીઠે 4 માર્ચ 2025ના રોજ દિલ્હી હાઈકોર્ટ દ્વારા આપવામાં આવેલા જામીનના નિર્ણયને રદ્દ કરતાં સુશીલ કુમારને એક સપ્તાહની અંદર સરેન્ડર કરવાનો આદેશ આપ્યો છે.

આ આદેશ સાગર ધનખડના પિતા અશોક ધનખડની અરજીના જવાબમાં આવ્યો છે, જેમાં તેમણે દિલ્હી હાઈકોર્ટના જામીનના આદેશને પડકાર્યો હતો. સુપ્રીમ કોર્ટમાં અશોક ધનખડની બાજુએ વરિષ્ઠ વકીલ સિદ્ધાર્થ મૃદુલે દલીલો કરી હતી, જ્યારે સુશીલ કુમારનું પ્રતિનિધિત્વ વરિષ્ઠ વકીલ મહેશ જેઠમલાનીએ કર્યું હતું.

શું છે મામલો

સુશીલ કુમારની મે 2021માં દિલ્હીના છત્રસાલ સ્ટેડિયમ ખાતે થયેલી ઘટનાના સંદર્ભમાં ધરપકડ કરવામાં આવી હતી, જેમાં જુનિયર રેસલર સાગર ધનખડની હત્યા થઈ હતી. આરોપ છે કે સુશીલ કુમાર અને તેના સાથીઓએ સાગર અને અન્ય લોકો પર હુમલો કર્યો હતો, જેના પરિણામે સાગરનું મૃત્યુ થયું હતું. દિલ્હી હાઈકોર્ટે સુશીલને 4 માર્ચ 2025ના રોજ 50 રૂપિયાના બોન્ડ પર નિયમિત જમાનત આપી હતી, પરંતુ સુપ્રીમ કોર્ટે આ નિર્ણયને રદ્દ કરી દીધો છે.

ચાર્જશીટ મુજબ, સુશીલ કુમારે છત્રસાલ સ્ટેડિયમમાં હંગામો કરવાની યોજના બનાવી હતી, જે દરમિયાન સાગર ધનખડની હત્યા થઈ હતી. આરોપ છે કે સુશીલ જુનિયર રેસલરો પર પોતાનું વર્ચસ્વ સ્થાપિત કરવા માગતો હતો. આ ઘટના બાદ તેની ધરપકડ કરવામાં આવી હતી અને ઓક્ટોબર 2021માં તેને જેલમાં મોકલવામાં આવ્યો હતો. અગાઉ જુલાઈ 2023માં સુશીલને ઘૂંટણની સર્જરી માટે સાત દિવસના વચગાળાના જામીન આપવામાં આવ્યા હતા, જે દરમિયાન તેની સાથે 24 કલાક સુરક્ષા કર્મચારીઓ હાજર રહેતા હતા.

સુપ્રીમ કોર્ટનો નિર્ણય

સુપ્રીમ કોર્ટે દિલ્હી હાઈકોર્ટના જમાનતના નિર્ણયને રદ્દ કરતાં એવું માન્યું કે કેસની ગંભીરતા અને આરોપોની પ્રકૃતિને ધ્યાનમાં રાખીને જામીન આપવા યોગ્ય નથી. કોર્ટે સુશીલ કુમારને એક સપ્તાહની અંદર રિમાન્ડ મેજિસ્ટ્રેટ સમક્ષ સરેન્ડર કરવા આદેશ આપ્યો છે.

સુશીલ કુમારની કારકિર્દી

સુશીલ કુમાર ભારતના સૌથી સફળ રેસલરોમાંના એક છે. તેમણે 2008 બેઇજિંગ ઓલિમ્પિકમાં બ્રોન્ઝ અને 2012 લંડન ઓલિમ્પિકમાં સિલ્વર મેડલ જીત્યો હતો. આ ઉપરાંત, તેમણે 2014 અને 2018 કોમનવેલ્થ ગેમ્સમાં ગોલ્ડ મેડલ પણ જીત્યો હતો. તેમને ભારતનો સર્વોચ્ચ રમતગમત પુરસ્કાર, મેજર ધ્યાનચંદ ખેલ રત્ન, પણ એનાયત કરવામાં આવ્યો હતો. જોકે, આ હત્યાકાંડે તેમની કારકિર્દી પર ગંભીર આઘાત પહોંચાડ્યો છે.

આ કેસ હજુ પણ ચાલુ છે, અને સુપ્રીમ કોર્ટના આ નિર્ણયથી સુશીલ કુમારની કાનૂની લડાઈ વધુ જટિલ બની છે.

આ પણ વાંચો : પૂરી દુનિયાને લાગ્યું કે હું પાગલ છું, સંજીવ ગોયન્કાએ કઈવાત પર આપ્યું આ નિવેદન