તુર્કીયેની શાળામાં ગોળીબાર, 4ના મોત અને 20થી વધુ ઈજાગ્રસ્ત

Shooting at Turkish school: તુર્કીયેની એક શાળામાં ગોળીબારની ઘટના બની છે. મૃત્યુઆંક વધીને ચાર થયો છે, જ્યારે 20થી વધુ ઈજાગ્રસ્ત થયા છે. ગવર્નર મુકર્રમ ઉનલુરે જણાવ્યું હતું કે, ‘મૃતકોમાં એક શિક્ષક અને ત્રણ વિદ્યાર્થીઓનો સમાવેશ થાય છે.’ છેલ્લા 24 કલાકમાં આ બીજી ઘટના છે.

બુધવારે (15 એપ્રિલ 2026) કહરામનમારશના ઓનિક્ષુબાત જિલ્લામાં આવેલી આયશે ચાલિક મિડલ સ્કૂલમાં ગોળીબાર થયો હતો. ગવર્નરે જણાવ્યું હતું કે, ‘હુમલાખોર શાળાનો વિદ્યાર્થી હતો. તેણે પોતાના બેકપેકમાં બંદૂક છુપાવી હતી. તે બે અલગ અલગ વર્ગખંડમાં ઘૂસી ગયો અને ચેતવણી આપ્યા વિના આડેધડ ગોળીબાર કર્યો. પોલીસનું માનવું છે કે બંદૂક તેના પિતાની હતી.

આ ઘટનાના એક દિવસ પહેલા, 14 એપ્રિલના રોજ, તુર્કીયમાં એક શાળામાં ગોળીબાર થયો હતો. પોલીસ તપાસમાં જાણવા મળ્યું છે કે શંકાસ્પદ વ્યક્તિએ સિવેરેક જિલ્લામાં એક શાળામાં કોરિડોરમાં પ્રવેશ કર્યો હતો અને ગોળીબાર કર્યો હતો. આ હુમલામાં 16 લોકો ઘાયલ થયા હતા, જેમાં ઘણા વિદ્યાર્થીઓનો પણ સમાવેશ થાય છે. શાળાના ભૂતપૂર્વ વિદ્યાર્થી, હુમલાખોરે પાછળથી પોતાને ગોળી મારી લીધી હતી.

તુર્કીયમાં અગાઉ પણ ખુલ્લામાં ગોળીબારની ઘણી ઘટનાઓ બની છે. આ મહિનાની 7મી તારીખે, તુર્કીયના ઇસ્તંબુલમાં ઇઝરાયલી કોન્સ્યુલેટની બહાર ત્રણ હુમલાખોરોએ ગોળીબાર કર્યો હતો. ઘટનાસ્થળે તૈનાત સુરક્ષા કર્મચારીઓએ વળતો ગોળીબાર કરતા એક હુમલાખોરનું મોત થયું હતું અને બે અન્ય ઘાયલ થયા હતા. આ ઘટનામાં બે પોલીસકર્મીઓ પણ ઘાયલ થયા હતા.

તુર્કીયના ગૃહમંત્રીએ તેને આતંકવાદી હુમલો જાહેર કર્યો હતો અને કહ્યું હતું કે હુમલાખોરોની ઓળખ થઈ ગઈ છે. પીડિતો ઇઝમિટથી ભાડાના વાહનમાં ઇસ્તંબુલ ગયા હતા. તુર્કીયના ગૃહમંત્રી મુસ્તફા સિફ્તસીએ સોશિયલ મીડિયા પ્લેટફોર્મ X પર જણાવ્યું હતું કે ગોળીબાર ઇસ્તંબુલના બ્યુકડેરે સ્ટ્રીટ પર યાપી ક્રેડી પ્લાઝા બ્લોકની બહાર થયો હતો.

મે 2024 માં એક શાળામાં ગોળીબાર થયો હતો. ઇસ્તંબુલની એક ખાનગી હાઇસ્કૂલના ભૂતપૂર્વ વિદ્યાર્થીએ આ હુમલો કર્યો હતો. તેને શાળામાંથી કાઢી મૂકવામાં આવ્યો હતો. આનો બદલો લેવા માટે, તેણે બંદૂક ખરીદી, શાળામાં ઘૂસી ગયો અને ગોળીબાર કર્યો. આ ઘટનામાં શાળાના આચાર્યનું મોત થયું હતું.

અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X

આ પણ વાંચો:48 કલાક પછી હોર્મુઝ સ્ટ્રેટ સંપૂર્ણપણે ખુલ્યું, ટ્રમ્પની નાકાબંધી હટાવવાની જાહેરાત