બ્રિટીશ બેન્ક એનાલિસ્ટને સોશિયલ મીડિયા પરની પોસ્ટ ભારે પડી, સાઉદીએ કરી એક દાયકાની જેલની સજા

રિયાધ, 15 મે, 2025: સાઉદી અરેબિયામાં એક બ્રિટીશ નાગરિકને સોશિયલ મીડિયા પર પોસ્ટ કરવા બદલ સજા મળી છે. આ શખ્સ છે બ્રિટીશ બેન્કર અહમદ અલ-દૌશ, જેને સાઉદી અરેબિયામાં એક દશકાની એટલે કે દશ વર્ષની સજા સંભળાવવામાં આવી છે. તેમના પરિવારનું માનવું છે કે આ સજા તેમણે 2018 માં કરેલા એક ટ્વિટને કારણે મળી હતી જેમાં સાઉદી અરેબિયાનું નામ નહોતું લીધું પરંતુ સુદાન વિશે હતું. આ ટ્વીટ હવે ડિલીટ કરી દેવામાં આવ્યું છે.

બેંક ઓફ અમેરિકામાં વિશ્લેષક એવા અહેમદ અલ-દૌશ પર આતંકવાદ અને સાયબર ક્રાઇમ કાયદાના ઉલ્લંઘનનો આરોપ મૂકવામાં આવ્યો છે. તેમના વકીલ, હેઈડી ડાયકસ્ટોલે જણાવ્યું હતું કે તેમની ટ્રાયલ અને ધરપકડ ન્યાયી પ્રક્રિયાનું ઉલ્લંઘન છે. તેમણે બ્રિટિશ સરકારને આ મામલે કડક હસ્તક્ષેપ કરવાની અપીલ કરી છે.

રિયાધ એરપોર્ટ પરથી તેની ધરપકડ કરવામાં આવી

ઓગસ્ટમાં અહેમદને રિયાધ એરપોર્ટ પર તેના પરિવાર સાથે ઇંગ્લેન્ડના માન્ચેસ્ટર જઈ રહ્યો હતો ત્યારે તેની ધરપકડ કરવામાં આવી હતી. તેમની પત્ની, અમહર નૂરે જણાવ્યું હતું કે ખાસ કરીને થાઇરોઇડની સમસ્યાઓ અને માનસિક તણાવને કારણે અહેમદ જેલમાં ખૂબ જ પીડાઈ રહ્યો હતો.

ટ્રમ્પની સાઉદી મુલાકાત દરમિયાન આ મામલો પ્રકાશમાં આવ્યો

આ મામલો ત્યારે પ્રકાશમાં આવ્યો છે જ્યારે અમેરિકાના પ્રમુખ ડોનાલ્ડ ટ્રમ્પ સાઉદી અરેબિયામાં છે. સાઉદી ક્રાઉન પ્રિન્સ મોહમ્મદ બિન સલમાનની ટીકા કરતી સોશિયલ મીડિયા પોસ્ટ માટે સાઉદી અરેબિયામાં પશ્ચિમી દેશો સાથે જોડાયેલા ઘણા અન્ય બેવડા નાગરિકતા ધરાવતા અને સાઉદી નાગરિકોની પણ ધરપકડ કરવામાં આવી છે.

એમ્નેસ્ટી ઇન્ટરનેશનલે મંગળવારે એક નિવેદનમાં જણાવ્યું હતું કે, અહેમદ અલ-દૌશના પરિવારનું માનવું છે કે તેમના પરના આરોપો 2018માં સુદાન વિશે ડિલીટ કરાયેલા એક ટ્વિટમાંથી ઉદભવ્યા છે જેમાં સાઉદી અરેબિયા અને દેશનિકાલ કરાયેલા સાઉદી ટીકાકારના પુત્ર સાથેના તેમના સંબંધોનો ઉલ્લેખ કરવામાં આવ્યો નથી. સાઉદી અરેબિયાના પ્રેસ ઓફિસ અને યુનાઇટેડ કિંગડમના વિદેશ ઓફિસે ટિપ્પણી માટેની વિનંતીઓનો જવાબ આપ્યો ન હતો. સોમવારે તેમને આતંકવાદ વિરોધી અને સાયબર ક્રાઇમ વિરોધી કાયદાઓનું ઉલ્લંઘન કરવા બદલ સજા ફટકારવામાં આવી હતી.

આ પણ વાંચોઃ અમેરિકા-સાઉદી અરેબિયા વચ્ચે 142 અબજ ડોલરનો ડીફેન્સ કરાર, જાણો પૂરી વિગત