‘જુલાઈમાં મહિલા અનામત અને સીમાંકન બિલ પાસ થશે, દેશમાં લોકસભાની બેઠકો વધશે’, રાજકોટમાં કેન્દ્રીય મંત્રીનું મોટું નિવેદન
Ramdas Athawale in Rajkot: કેન્દ્રીય મંત્રી રામદાસ આઠવલે આજે ગુજરાતના રાજકોટની મુલાકાતે આવી પહોંચ્યા હતા. આ દરમિયાન તેમણે પત્રકારો સાથેની વાતચીતમાં દેશના રાજકારણ, આગામી મહત્વપૂર્ણ બિલો અને અર્થતંત્રને લઈને કેટલાક મોટા અને મહત્વના નિવેદનો આપ્યા છે. તેમણે સ્પષ્ટ કર્યું હતું કે, દેશ હાલ વડાપ્રધાન નરેન્દ્ર મોદીના નેતૃત્વમાં ખૂબ જ ઝડપથી આગળ વધી રહ્યો છે અને આગામી સમયમાં દેશના રાજકીય માળખામાં મોટા ફેરફારો જોવા મળશે.
‘જુલાઈમાં સીમાંકન અને મહિલા અનામત બિલ પાસ થઈ જશે’
મહિલા અનામત બિલ (Women’s Reservation Bill) અંગે મોટો દાવો કરતા કેન્દ્રીય મંત્રીએ જણાવ્યું કે, અમારી પાસે સંસદમાં ક્લિયર બહુમતી છે. આગામી જુલાઈ મહિનામાં મહિલા અનામત બિલ અને સીમાંકન (Delimitation) બિલ ચોક્કસપણે પાસ થઈ શકે છે.
* બેઠકોમાં થશે વધારો: સીમાંકન બિલ પાસ થવાને કારણે દેશમાં લોકસભાની સીટોની સંખ્યામાં મોટો વધારો થશે.
* 2029 થી સંપૂર્ણ અમલ: વર્ષ 2029 ની લોકસભા ચૂંટણી અને તમામ રાજ્યોની આગામી વિધાનસભા ચૂંટણીઓમાં મહિલા અનામત સંપૂર્ણપણે લાગુ થઈ જશે, જેના અંતર્ગત 1/3 (33%) સીટો મહિલાઓ માટે અનામત રાખવામાં આવશે.
* આક્ષેપો ફગાવ્યા: સંજય રાઉત દ્વારા લગાવવામાં આવેલા પૈસાના આક્ષેપો તદ્દન ખોટા છે. અહીં પૈસાની કોઈ લેવડદેવડ નથી, બધા નેતાઓ પોતાની મરજીથી NDA સાથે જોડાઈ રહ્યા છે.
વિપક્ષમાં મોટું ગાબડું પડવાના સંકેત: મમતાના 20 સાંસદો NDAમાં જોડાશે?
રામદાસ આઠવલેએ દેશના વિપક્ષી ગઠબંધનમાં મોટા ભંગાણના સંકેતો આપતા રાજકીય ગરમાવો વધારી દીધો છે. તેમણે દાવો કર્યો છે કે, આવનારા દિવસોમાં પશ્ચિમ બંગાળના મુખ્યમંત્રી મમતા બેનર્જીની પાર્ટી (TMC) ના આશરે 20 જેટલા સાંસદો NDA સાથે જોડાઈ શકે છે.
ઉદ્ધવ ઠાકરે અને DMK પર આઠવલેનું નિવેદન:
“મેં પોતે DMK ના સભ્યોને પણ અપીલ કરી છે કે તેમણે દેશના વિકાસ માટે NDA સાથે જોડાઈ જવું જોઈએ. બીજી તરફ, મહારાષ્ટ્રમાં પણ ઉદ્ધવ ઠાકરે માટે પોતાના બાકી બચેલા ધારાસભ્યો અને સાંસદોને સાચવી રાખવા એ એક બહુ મોટો પડકાર બની ગયો છે.”
ખેડૂતોના આંદોલન અને અદાણી મુદ્દે આપ્યું મહત્વનું નિવેદન
ગુજરાતમાં ચાલી રહેલા ખેડૂત આંદોલન અંગે પૂછવામાં આવેલા સવાલ પર કેન્દ્રીય મંત્રીએ મધ્યમ માર્ગ અપનાવતા જણાવ્યું હતું કે, અદાણી દેશની એક બહુ મોટી કંપની છે અને તેમનો મોટો બિઝનેસ હોવાથી તેમને સરકારી નિયમો મુજબ ઘણા કામો મળતા હોય છે. પરંતુ વિપક્ષ દ્વારા એવા આક્ષેપો કરવા કે ‘આખો દેશ અદાણીને આપી દેવામાં આવ્યો છે’, તે તદ્દન પાયા વિહોણા છે.
તેમણે ઉમેર્યું કે, “મારું સ્પષ્ટ માનવું છે કે દેશના ખેડૂતોના હિતમાં જ નિર્ણયો લેવાવા જોઈએ અને તેમને જમીન કે પાકનું યોગ્ય વળતર મળવું જ જોઈએ. જો આ મુદ્દે અદાણી કંપનીનું કોઈ કામ હશે તો હું તેમની સાથે પણ રૂબરૂ ચર્ચા કરીશ. આ સિવાય જરૂર પડ્યે કેન્દ્રના સંલગ્ન મંત્રીઓ સમક્ષ પણ આ વિષયની રજૂઆત કરીને ખેડૂતોને નુકસાન ન થાય અને યોગ્ય વળતર મળે તેવા ચોક્કસ પ્રયત્નો કરીશ.”
બુદ્ધ વિહારનું લોકાર્પણ અને સફાઈ કર્મચારીઓ માટે મોટી ભલામણ
રાજકોટના કાલાવડ રોડ પર કણકોટ ગામ સ્થિત બુદ્ધ વિહારના લોકાર્પણ કાર્યક્રમમાં રામદાસ આઠવલેએ ખાસ હાજરી આપી હતી. આ મુલાકાત દરમિયાન તેમણે રાજકોટ મહાનગરપાલિકા (RMC) અને જિલ્લાના ઉચ્ચ અધિકારીઓ સાથે એક મહત્વની બેઠક પણ યોજી હતી.
* સરકારી યોજનાઓનો લાભ: બેઠકમાં શિડ્યુલ કાસ્ટ (SC) અને શિડ્યુલ ટ્રાઇબ (ST) ના લોકો માટે ચાલતી સરકારી યોજનાઓનો લાભ છેવાડાના માણસ સુધી પહોંચાડવા કડક સૂચના આપી હતી.
* કાયમી ભરતીની ભલામણ: રાજકોટ મનપામાં હાલ 2680 કાયમી સફાઈ કર્મીઓ છે, જ્યારે 1400 જેટલા કર્મચારીઓ કોન્ટ્રાક્ટ આધારિત કામ કરે છે. મંત્રીએ અધિકારીઓને ભલામણ કરી છે કે કોન્ટ્રાક્ટ પ્રથા નાબૂદ કરીને શક્ય હોય ત્યાં સુધી આ 1400 સફાઈ કર્મચારીઓની સીધી કાયમી ભરતી કરવામાં આવે.
‘યુદ્ધના કારણે મોંઘવારી વધી, હવે ટૂંક સમયમાં ભાવ ઘટશે’
દેશની આર્થિક સ્થિતિ પર વાત કરતા તેમણે સ્વીકાર્યું હતું કે હાલના સમયમાં મોંઘવારી થોડી વધી છે. પરંતુ તેમણે સ્પષ્ટતા કરી કે આ વૈશ્વિક મોંઘવારી આંતરરાષ્ટ્રીય સ્તરે ચાલી રહેલા યુદ્ધોને કારણે વધી હતી. હવે જ્યારે યુદ્ધ પૂર્ણ થઈ ગયું છે, તે ખૂબ જ સારા સમાચાર છે અને તેના કારણે આવનારા દિવસોમાં મોંઘવારીમાં મોટો ઘટાડો જોવા મળશે. તેમણે એમ પણ ઉમેર્યું કે દેશની ઈકોનોમી હાલ વિશ્વમાં ચોથા નંબરે પહોંચી ગઈ છે અને આગામી સમયમાં પેટ્રોલ-ડીઝલના ભાવ પણ ઘટવા જોઈએ તેવું તેમનું વ્યક્તિગત માનવું છે.
આ પણ વાંચોઃ જ્યોર્જિયા મેલોની સાથે દેખાઈ તેમની દીકરી, ક્યૂટ રિએક્શને ખેંચ્યું સૌનું ધ્યાન
આ પણ વાંચોઃ ‘યોગા ફોર હેલ્ધી એજિંગ’ થીમ સાથે ગુજરાતમાં યોગ સપ્તાહની ઉજવણી, જાણો સંપૂર્ણ આયોજન
અમારી WhatsApp ચેનલમાં જોડાવા આ લિંક પર ક્લીક કરો
