રાજકોટ રેલવે કર્મચારીની ઈમાનદારી, ₹44 હજારનો ખોવાયેલો સ્માર્ટફોન મુસાફરને પરત કર્યો

Rajkot Railway News: રાજકોટ રેલવે આરક્ષણ કચેરીમાં ફરજ બજાવતા કર્મચારીની સતર્કતા, પ્રમાણિકતા અને કર્તવ્યનિષ્ઠાના કારણે એક મુસાફરને પોતાનો કિંમતી સ્માર્ટફોન સુરક્ષિત પરત મળ્યો છે. પશ્ચિમ રેલવેના રાજકોટ ડિવિઝન હેઠળ આવેલી આરક્ષણ (રિઝર્વેશન) કચેરીમાં કાર્યરત કમર્શિયલ-કમ-ટિકિટ ક્લાર્ક ચંદન ત્રિપાઠીએ જનસેવાનું ઉત્તમ ઉદાહરણ પૂરું પાડતાં અંદાજે ₹44 હજારની કિંમતનો ખોવાયેલો મોબાઈલ તેના અસલી માલિકને પરત આપ્યો હતો.

માહિતી અનુસાર, 16 જૂન 2026ના રોજ ચંદન ત્રિપાઠી રાજકોટ આરક્ષણ કચેરીમાં બીજી પાળીમાં બારી નંબર-2 પર ફરજ પર હતા. રાત્રે લગભગ 8 વાગ્યે કચેરી બંધ કરવાની કામગીરી દરમિયાન તેમની નજર આરક્ષણ બારી પર પડેલા એક મોબાઈલ ફોન પર પડી હતી. તપાસ કરતાં જાણવા મળ્યું કે કોઈ મુસાફર પોતાનો મોબાઈલ ભૂલીને ત્યાંથી ચાલ્યો ગયો હતો.

મોબાઈલ ફોન લોક હોવાને કારણે તેના માલિકની ઓળખ તાત્કાલિક થઈ શકી નહોતી. આવી સ્થિતિમાં ચંદન ત્રિપાઠીએ જવાબદારીપૂર્વક વર્તન કરતાં ઘટનાની જાણ મુખ્ય આરક્ષણ સુપરવાઈઝર મનોજ ગોંડલિયાને કરી હતી અને મોબાઈલને સુરક્ષિત રીતે પોતાની પાસે રાખ્યો હતો.

થોડા સમય બાદ રાત્રે લગભગ 9:20 વાગ્યે મોબાઈલ પર એક ફોન કોલ આવ્યો હતો. કોલ દ્વારા સંબંધિત મુસાફર સાથે સંપર્ક સ્થાપિત કરવામાં આવ્યો અને તેની ઓળખ અંગે પ્રાથમિક માહિતી મેળવવામાં આવી હતી. ત્યારબાદ મુસાફરને બીજા દિવસે ટિકિટ અને આધાર કાર્ડ જેવા જરૂરી ઓળખ દસ્તાવેજો સાથે કચેરીએ હાજર રહેવા સૂચના આપવામાં આવી હતી.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

અગાઉથી નક્કી કરેલા મુજબ બીજા દિવસે સવારે મુસાફર આરક્ષણ કચેરીએ પહોંચ્યો હતો. રેલવે અધિકારીઓ દ્વારા તેની ઓળખની સઘન ચકાસણી કરવામાં આવી હતી. મોબાઈલ અનલોક કરાવીને તેમાં રહેલી વિગતો અને મુસાફર દ્વારા આપવામાં આવેલી માહિતીનું ક્રોસ વેરિફિકેશન કરવામાં આવ્યું હતું. તમામ વિગતો સાચી હોવાનું જણાતા અંદાજે ₹44,000ની કિંમતનો Vivo V70 FE સ્માર્ટફોન તેના અસલી માલિકને સોંપવામાં આવ્યો હતો.

પોતાનો કિંમતી મોબાઈલ સુરક્ષિત પાછો મળતાં મુસાફરે રેલવે પ્રશાસન અને ખાસ કરીને ચંદન ત્રિપાઠીનો હૃદયપૂર્વક આભાર વ્યક્ત કર્યો હતો. તેમણે જણાવ્યું હતું કે આજના સમયમાં આવી ઈમાનદારી અને જવાબદારી ખૂબ જ દુર્લભ છે અને રેલવે કર્મચારીની આ કામગીરી પ્રશંસાને પાત્ર છે.

આ સમગ્ર ઘટનાની પ્રશંસા કરતાં રાજકોટ ડિવિઝનના ડિવિઝનલ રેલવે મેનેજર (DRM) ગિરિરાજ કુમાર મીના તથા સિનિયર ડિવિઝનલ કમર્શિયલ મેનેજર (Sr. DCM) સુનીલ કુમાર મીનાએ જણાવ્યું હતું કે ચંદન ત્રિપાઠીએ પોતાની સતર્કતા, પ્રમાણિકતા અને જનસેવાની ભાવનાનો ઉત્તમ પરિચય આપ્યો છે. તેમના આ કાર્યથી પશ્ચિમ રેલવેની પ્રતિષ્ઠામાં વધારો થયો છે અને મુસાફરો પ્રત્યે રેલવે કર્મચારીઓની પ્રતિબદ્ધતા વધુ મજબૂત બની છે.

આ ઘટના એ સાબિત કરે છે કે સરકારી સેવામાં કાર્યરત કર્મચારીઓની ઈમાનદારી અને કર્તવ્યનિષ્ઠા હજુ પણ સમાજ માટે પ્રેરણારૂપ છે. શ્રી ચંદન ત્રિપાઠીનું આ કાર્ય અન્ય કર્મચારીઓ માટે પણ એક ઉત્તમ ઉદાહરણ બની રહ્યું છે.

આ પણ વાંચો: Bank Stock: 25 રુપિયાનો સ્ટોક બન્યો રોકેટ, લેવા માટે રોકાણકારો તૂટી પડ્યા