NEET પેપર લીક મુદ્દે રાઘવ ચઢ્ઢાએ મૌન તોડ્યું, વિદ્યાર્થીઓના ગુસ્સાને ગણાવ્યો યોગ્ય
RAGHAV CHADHA ON NEET : પેપર લીક મુદ્દે લાંબા સમયથી મૌન રહેલા રાજ્યસભાના સાંસદ રાઘવ ચઢ્ઢાએ આખરે પોતાનું મંતવ્ય જાહેર કર્યું છે. રાજ્યસભામાં એન્ટી પેપર લીક બિલ પર ચર્ચા દરમિયાન તેમણે વિદ્યાર્થીઓની લાગણીઓને સમર્થન આપતાં કહ્યું કે NEET ઉમેદવારોનો ગુસ્સો અને ફરિયાદ બંને સંપૂર્ણપણે યોગ્ય છે.
પેપર લીકનો કાયમી ઉકેલ જરૂરી
ચર્ચા દરમિયાન રાઘવ ચઢ્ઢાએ કહ્યું કે પેપર લીક જેવી ગંભીર સમસ્યાનો કાયમી ઉકેલ લાવવો જરૂરી છે. તેમના મતે માત્ર નિવેદનો અથવા મીડિયા ચર્ચાથી સમસ્યા દૂર નહીં થાય, પરંતુ તેના માટે મજબૂત સંસ્થાગત વ્યવસ્થા અને અસરકારક કાયદાની જરૂર છે.
VIDEO | Delhi: “Paper leaks cannot be addressed through media soundbites but require an institutional solution, which govt is bringing through the Bill,” says BJP MP Raghav Chadha in Rajya Sabha during debate on anti-paper leak Bill.
(Source: Sansad TV) pic.twitter.com/jackRKi73M
— Press Trust of India (@PTI_News) July 30, 2026
વિદ્યાર્થીઓ અને પરિવારની મહેનતનું કર્યું વર્ણન
રાઘવ ચઢ્ઢાએ કહ્યું કે NEET જેવી સ્પર્ધાત્મક પરીક્ષાની તૈયારી માત્ર વિદ્યાર્થી જ નહીં પરંતુ સમગ્ર પરિવાર કરે છે. માતા-પિતા પોતાની જરૂરિયાતો ઘટાડીને બાળકોના શિક્ષણ માટે ખર્ચ કરે છે, જ્યારે વિદ્યાર્થીઓ ઘરથી દૂર રહીને લાંબા સમય સુધી સતત અભ્યાસ કરે છે.
તેમણે જણાવ્યું કે જ્યારે વર્ષોની મહેનત બાદ કોઈ વિદ્યાર્થીને ખબર પડે કે પ્રશ્નપત્ર લીક થઈ ગયો છે, ત્યારે માત્ર પરીક્ષા નહીં પરંતુ તેની મહેનત, સપનાઓ અને આત્મવિશ્વાસને પણ મોટો આંચકો પહોંચે છે.
પેપર લીકથી માનસિક અસર પણ થાય છે
રાઘવ ચઢ્ઢાએ જણાવ્યું કે પેપર લીકનો વિદ્યાર્થીઓના માનસિક અને શારીરિક સ્વાસ્થ્ય પર પણ ગંભીર પ્રભાવ પડે છે. તેમણે કહ્યું કે તેઓ આ પીડાને સમજી શકે છે કારણ કે તેઓ પોતે પણ ક્યારેક ચાર્ટર્ડ એકાઉન્ટન્સીની જાહેર પરીક્ષાના વિદ્યાર્થી રહ્યા હતા.
અત્યારની ભૂમિકા ઉકેલ લાવવાની
રાઘવ ચઢ્ઢાએ પોતાના મૌન અંગે સ્પષ્ટતા કરતાં જણાવ્યું કે અગાઉ તેઓ વિપક્ષમાં હતા ત્યારે પ્રશ્નો ઉઠાવવાની જવાબદારી હતી, પરંતુ હવે તેમની ભૂમિકા બદલાઈ ગઈ છે. હવે તેમનો મુખ્ય ઉદ્દેશ માત્ર પ્રશ્નો પૂછવાનો નહીં પરંતુ સમસ્યાનો ઉકેલ લાવવાનો છે.
તેમણે કહ્યું કે તેઓ માત્ર ચર્ચામાં રહેવા માટે નિવેદનો આપવા માંગતા નથી. તેઓ ત્યારે જ બોલવા ઇચ્છતા હતા જ્યારે સમસ્યાના ઉકેલ તરફ અસરકારક પગલાં લેવામાં આવી રહ્યા હોય, અને એન્ટી પેપર લીક બિલ તે દિશામાં મહત્વપૂર્ણ પગલું હોવાનું તેમણે જણાવ્યું.
