વક્ફ બિલ અંગે રાજકારણ ગરમાયું, મુસ્લિમ લો બોર્ડે રાષ્ટ્રપતિને મળવા સમય માંગ્યો

નવી દિલ્હી, 5 એપ્રિલ : ઓલ ઈન્ડિયા મુસ્લિમ પર્સનલ લો બોર્ડે સંસદ દ્વારા પસાર કરવામાં આવેલા વકફ સુધારા બિલ પર તેની ચિંતા વ્યક્ત કરવા માટે રાષ્ટ્રપતિ દ્રૌપદી મુર્મુ સાથે મુલાકાતની માંગ કરી છે. આ બિલને સંસદના બંને ગૃહોની મંજૂરી મળી ગઈ છે.

હવે રાષ્ટ્રપતિની મંજુરીથી આ કાયદો અમલમાં આવશે. પર્સનલ લો બોર્ડ અનુસાર, બોર્ડના જનરલ સેક્રેટરી મૌલાના ફઝલુર રહીમ મુજદ્દીદીએ રાષ્ટ્રપતિને લખેલા પત્રમાં કહ્યું છે કે બિલ દ્વારા કરવામાં આવેલા સુધારામાં વકફ સંસ્થાના વહીવટ અને સ્વાયત્તતાને અસર કરતા ફેરફારોનો સમાવેશ થાય છે.

પત્રમાં વધુમાં કહેવામાં આવ્યું છે કે તમને મળવાનો અમારો હેતુ તાજેતરમાં પસાર થયેલ વક્ફ (સુધારા) બિલ 2025 અને સમગ્ર દેશમાં મુસ્લિમ સમુદાય પર તેની અસરો વિશે અમારી ઊંડી ચિંતા વ્યક્ત કરવાનો છે. બોર્ડે દાવો કર્યો હતો કે આ બિલ સંપૂર્ણપણે ગેરબંધારણીય અને દેશના મુસ્લિમો પર હુમલો છે.

રાષ્ટ્ર પ્રમુખને લખેલો પત્ર

બોર્ડના જનરલ સેક્રેટરી મૌલાના ફઝલુર રહીમ મુજદ્દીદીએ પત્રમાં જણાવ્યું હતું કે અમે માનીએ છીએ કે કાયદાની કલમની જોગવાઈઓ પર પુનર્વિચાર કરવો જરૂરી છે, કારણ કે તે ભારતીય બંધારણમાં આપવામાં આવેલા મૂળભૂત અધિકારો, ખાસ કરીને ધાર્મિક સ્વતંત્રતા, સમાનતા અને ધાર્મિક સંસ્થાઓના રક્ષણ સાથે અસંગત છે.

વક્ફ બિલ સંસદમાં પસાર થયું

પત્રના અંતમાં, એવી વિનંતી કરવામાં આવી છે કે રાષ્ટ્રપતિ મુર્મુએ મામલાની ગંભીરતાને ધ્યાનમાં રાખીને મીટિંગ માટે સમય આપવો જોઈએ, જેથી અમે અમારી ચિંતાઓ રજૂ કરી શકીએ અને બંધારણીય માળખામાં સંભવિત ઉકેલો અંગે ચર્ચા કરી શકીએ. તમને જણાવી દઈએ કે વક્ફ (સુધારા) બિલ, 2025 પર ગુરુવારે રાજ્યસભામાં ચર્ચા શરૂ થઈ હતી અને સતત બેઠક બાદ શુક્રવારે વહેલી સવારે આ બિલ પાસ થઈ ગયું હતું.

વિપક્ષના તમામ સુધારા નામંજૂર

વકફ (સુધારા) બિલની તરફેણમાં 128 અને વિરોધમાં 95 મત પડ્યા હતા. લોકસભાએ તેને એક દિવસ પહેલા જ મંજૂરી આપી દીધી હતી. આ બિલનો હેતુ વકફ બોર્ડના માળખામાં ફેરફાર કરવાનો અને વકફ એક્ટમાં સુધારા દ્વારા કાનૂની વિવાદો ઘટાડવાનો છે. બિલ પસાર કરવા માટે રાજ્યસભાની બેઠક શુક્રવારે રાત્રે 2.30 વાગ્યા સુધી ચાલુ રહી. વિપક્ષના તમામ સુધારાઓ ફગાવી દેવામાં આવ્યા હતા.

આ પણ વાંચો :- હાર્દિક પંડ્યા કે કોચ, કોની સલાહ પર તિલક વર્મા રિટાયર્ડ આઉટ થયો?