સરકારે માની વિપક્ષની માંગ, SIRથી લઈને વંદે માતરમ્ પર શિયાળુ સત્રમાં થશે ચર્ચા

નવી દિલ્હી: 2 ડિસેમ્બર, 2025: Parliament Winter Session: સંસદના શિયાળુ સત્રમાં આગામી સપ્તાહે બે મહત્ત્વપૂર્ણ ચર્ચાઓ રાજકીય વાતાવરણનું તાપમાન વધારશે. આ બંને મુદ્દાઓ પર સત્તા પક્ષ અને વિપક્ષ આક્રમક રીતે પોતાની વૈચારિક સ્થિતિ રજૂ કરશે.

સોમવારે ‘વંદે માતરમ’ પર ચર્ચા

સોમવારે લોકસભામાં દેશભક્તિ ગીત વંદે માતરમની 150મી વર્ષગાંઠ પર વિશેષ ચર્ચા રાખવામાં આવી છે. કોંગ્રેસ નેતા કે. સુરેશના જણાવ્યા અનુસાર, આ ચર્ચાની શરૂઆત ખુદ વડાપ્રધાન નરેન્દ્ર મોદી કરશે. વડાપ્રધાનની હાજરી સ્પષ્ટ દર્શાવે છે કે, સરકાર આ મુદ્દાને મજબૂત રીતે રજૂ કરવા માંગે છે.

સપા સાંસદ ધર્મેન્દ્ર યાદવે પુષ્ટિ કરી કે, તેમની પાર્ટી ‘વંદે માતરમ’ પરની ચર્ચામાં ભાગ લેશે. તેમણે કહ્યું કે, રાષ્ટ્રવાદના નામે થઈ રહેલા રાજકારણ અને “પોતાને રાષ્ટ્રવાદી કહેવડાવનારાઓ” પર પણ ગૃહમાં ખુલ્લીને વાત કરવામાં આવશે.

મંગળવારે ચૂંટણી સુધારા પર ચર્ચા

સોમવાર પછી, મંગળવારનો આખો એજન્ડા ચૂંટણી સુધારા પર કેન્દ્રિત છે, જેના માટે 10 કલાકનો સમય નક્કી કરવામાં આવ્યો છે. ચર્ચા દરમિયાન ચૂંટણી પંચની ભૂમિકા, ચૂંટણી ખર્ચની પારદર્શિતા, ફોજદારી પૃષ્ઠભૂમિવાળા ઉમેદવારોને રોકવા, EVMની વિશ્વસનીયતા અને SIR (મતદાર યાદી શુદ્ધિકરણ) પ્રક્રિયા જેવા મુદ્દાઓ પર પાર્ટી પોતાના વિચારો રજૂ કરશે. સરકારનો દાવો છે કે, તે ચૂંટણી પ્રક્રિયાને વધુ પારદર્શક અને જવાબદેહ બનાવવા માટે ગંભીર છે.

વિપક્ષની તૈયારી

વિપક્ષ ચૂંટણીની નિષ્પક્ષતા, ‘એક દેશ એક ચૂંટણી’ જેવા પ્રસ્તાવો પર પોતાની આપત્તિઓ અને સૂચનો રજૂ કરવાની તૈયારીમાં છે.

‘યહ રિશ્તા ક્યા કહલાતા હૈ?’: ધર્મેન્દ્ર યાદવનો કટાક્ષ

સમાજવાદી પાર્ટીના સાંસદ ધર્મેન્દ્ર યાદવે સંસદીય ગતિરોધ તૂટવા પર સરકારની ગંભીરતા પર સવાલ ઉઠાવ્યા. તેમણે કહ્યું કે, “જ્યારે સરકાર હવે ચર્ચા માટે તૈયાર છે, તો ગૃહનો ગતિરોધ સમાપ્ત થઈ ગયો, પરંતુ ગયા ચોમાસું સત્રમાં આ પગલું કેમ ન ઉઠાવવામાં આવ્યું?”

યાદવે ચૂંટણી પંચ અને ભાજપને લઈને કટાક્ષ કરતાં પૂછ્યું, “જ્યારે વિપક્ષ ચૂંટણી પંચ પર સવાલ ઉઠાવે છે તો ભાજપ આક્રમક થઈ જાય છે, અને જ્યારે ભાજપ પર સવાલ ઉઠે છે તો ચૂંટણી પંચ સામે આવી જાય છે. આખરે આ સંબંધ શું કહેવાય છે?”

આ બંને ચર્ચાઓ આગામી ચૂંટણી રાજકારણની દિશા પણ નક્કી કરી શકે છે, જેના પર સૌની નજર ટકેલી છે.