ટોપ ન્યૂઝટ્રેન્ડિંગનેશનલ

મણિપુરમાં ઝેરી લઠ્ઠાકાંડ! મૃત્યુઆંક વધીને 15 થયો, 181 લોકો હોસ્પિટલમાં દાખલ

મણિપુરના ચંદેલ જિલ્લામાં ઝેરી દારૂ પીવાના કારણે સર્જાયેલી ગંભીર દુર્ઘટનાએ સમગ્ર વિસ્તારમાં ચકચાર મચાવી દીધી છે. આ ઘટનામાં મૃત્યુઆંક વધીને 15 પર પહોંચી ગયો છે, જ્યારે 181 લોકોની તબિયત લથડતાં તેમને વિવિધ હોસ્પિટલોમાં સારવાર માટે દાખલ કરવામાં આવ્યા છે. ઘટનાની ગંભીરતાને ધ્યાનમાં રાખીને રાજ્ય સરકાર તાત્કાલિક હરકતમાં આવી છે. મુખ્યમંત્રી ખેમચંદ યુમનામે હોસ્પિટલની મુલાકાત લઈને દર્દીઓની સ્થિતિની સમીક્ષા કરી હતી અને અસરગ્રસ્તોને શ્રેષ્ઠ સારવાર પૂરી પાડવાના નિર્દેશ આપ્યા હતા.

મુખ્યમંત્રીએ હોસ્પિટલની મુલાકાત લઈ સારવારની સમીક્ષા કરી

મણિપુરના મુખ્યમંત્રી ખેમચંદ યુમનામે લેમ્ફેલપટ સ્થિત શિજા હોસ્પિટલ અને સજીવા સ્થિત બબીના હોસ્પિટલની મુલાકાત લીધી હતી. તેમણે ત્યાં સારવાર લઈ રહેલા દર્દીઓની સ્થિતિ અંગે તબીબો અને હોસ્પિટલના અધિકારીઓ પાસેથી માહિતી મેળવી હતી.

મુખ્યમંત્રીએ સોશિયલ મીડિયા પ્લેટફોર્મ ‘એક્સ’ પર જણાવ્યું હતું કે તમામ દર્દીઓની તબીબોની દેખરેખ હેઠળ તપાસ અને સારવાર ચાલી રહી છે. તેમણે હોસ્પિટલ વહીવટીતંત્રને દર્દીઓને શ્રેષ્ઠ તબીબી સુવિધાઓ અને જરૂરી સહાય પૂરી પાડવા સૂચના આપી હતી.

આ ઉપરાંત, ચંદેલ જિલ્લામાં રાહત અને સારવાર કામગીરીને ઝડપી બનાવવા માટે જનરલ મેડિસિનના નિષ્ણાતના નેતૃત્વમાં એક વિશેષ મેડિકલ ટીમ રવાના કરવામાં આવી છે. આ ટીમ સાથે જરૂરી દવાઓ અને તબીબી સામગ્રી પણ મોકલવામાં આવી છે.

દોષિતો સામે કડક કાર્યવાહીની મુખ્યમંત્રીની ખાતરી

આ દુર્ઘટનામાં જીવ ગુમાવનારા લોકોના પરિવારો પ્રત્યે મુખ્યમંત્રીએ ઊંડી સંવેદના વ્યક્ત કરી હતી. તેમણે તમામ અસરગ્રસ્ત દર્દીઓ ઝડપથી સ્વસ્થ થાય તેવી પ્રાર્થના પણ કરી હતી.

મુખ્યમંત્રીએ સ્પષ્ટ કર્યું હતું કે રાજ્ય સરકાર આ સમગ્ર મામલાની ઊંડાણપૂર્વક તપાસ કરાવશે. ઝેરી દારૂના વેચાણ અને વિતરણ માટે જે કોઈ જવાબદાર હશે તેની સામે કડક કાયદાકીય કાર્યવાહી કરવામાં આવશે અને દોષિતોને સજા અપાવવામાં આવશે.

મેથેનોલ પોઈઝનિંગથી દર્દીઓની હાલત ગંભીર

શિજા હોસ્પિટલના જોઈન્ટ મેનેજિંગ ડિરેક્ટર ડો. ચેતન ખુંડોંગબામે જણાવ્યું હતું કે હોસ્પિટલમાં દાખલ દર્દીઓની પ્રાથમિક તપાસમાં મેથેનોલ પોઈઝનિંગની પુષ્ટિ થઈ છે. આ ઘટના મુખ્યત્વે ચકપિકારોંગ વિસ્તાર સાથે જોડાયેલી હોવાનું સામે આવ્યું છે.

તેમના જણાવ્યા અનુસાર, હોસ્પિટલમાં અત્યાર સુધીમાં 140 દર્દીઓ સારવાર માટે પહોંચ્યા છે. તેમાંથી એક દર્દીને મૃત અવસ્થામાં હોસ્પિટલ લાવવામાં આવ્યો હતો. હાલમાં ત્રણ દર્દીઓની સ્થિતિ અત્યંત ગંભીર છે અને તેમને હિમોડાયાલિસિસની સારવાર આપવામાં આવી રહી છે.

દર્દીઓની સંખ્યા વધુ હોવાથી હોસ્પિટલના તમામ ઉપલબ્ધ બેડ ભરાઈ ગયા છે. પરિણામે હોસ્પિટલ દ્વારા રાજ્યના આરોગ્ય વિભાગ, RIMS અને JNIMS પાસેથી વધારાની મદદ માગવામાં આવી છે.

જે દર્દીઓને લાઈફ સપોર્ટ અને હિમોડાયાલિસિસની જરૂર છે તેમને શિજા હોસ્પિટલમાં જ રાખવામાં આવી રહ્યા છે, જ્યારે અન્ય દર્દીઓને સારવાર માટે બીજા આરોગ્ય કેન્દ્રોમાં ખસેડવામાં આવી રહ્યા છે. મુખ્યમંત્રીએ પણ હોસ્પિટલની મુલાકાત દરમિયાન આરોગ્ય વિભાગ તરફથી તમામ જરૂરી સહાય પૂરી પાડવાની ખાતરી આપી હતી.

કાકચિંગ જિલ્લાના સુગનૂમાંથી ખરીદાયો હતો શંકાસ્પદ દારૂ

પોલીસ તપાસમાં આ મામલે એક મહત્વપૂર્ણ ખુલાસો થયો છે. ચંદેલ જિલ્લાના પોલીસ અધિક્ષકના જણાવ્યા અનુસાર, મૃતકોએ જે શંકાસ્પદ દારૂનું સેવન કર્યું હતું તે કાકચિંગ જિલ્લાના સુગનૂ વિસ્તારમાંથી ખરીદવામાં આવ્યો હતો.

પોલીસે વધુમાં જણાવ્યું હતું કે ચંદેલ જિલ્લામાં સ્થાનિક સ્તરે દારૂ બનાવવામાં આવતો હોવાની કોઈ માહિતી હાલ સુધી મળી નથી. આ મામલે તપાસ આગળ ધપાવવામાં આવી રહી છે.

સાથે જ પોલીસે સામાન્ય જનતાને સાવચેતી રાખવાની અપીલ કરી છે. આગામી સૂચના ન મળે ત્યાં સુધી સ્થાનિક સ્તરે બનાવવામાં આવતા દારૂનું સેવન ન કરવા લોકોને સલાહ આપવામાં આવી છે.

મેથેનોલયુક્ત દારૂ જીવલેણ બની શકે છે

મેથેનોલ એક ઝેરી રસાયણ છે, જેનું સેવન માનવ શરીર માટે અત્યંત જોખમી બની શકે છે. તેના કારણે દૃષ્ટિ ગુમાવવી, ચેતાતંત્રને નુકસાન થવું, ગંભીર એસિડિટી અને કિડની સંબંધિત સમસ્યાઓ ઊભી થઈ શકે છે. ગંભીર કિસ્સાઓમાં વ્યક્તિનું મૃત્યુ પણ થઈ શકે છે.

મણિપુરની આ દુર્ઘટનાએ ગેરકાયદે અને ભેળસેળયુક્ત દારૂના વેચાણ સામે કડક કાર્યવાહી કરવાની જરૂરિયાત ફરી એકવાર ઉજાગર કરી છે. હાલ સમગ્ર ઘટનાની તપાસ ચાલી રહી છે અને અસરગ્રસ્ત દર્દીઓને બચાવવા માટે તબીબી ટીમો દ્વારા સતત પ્રયાસો કરવામાં આવી રહ્યા છે.

આ પણ વાંચો: ભારતની આર્થિક નીતિના અમેરિકામાં પણ વખાણ! ટ્રમ્પે કહ્યું – ‘ભારતનો GDP ગ્રોથ 7%, અમેરિકા અપનાવે તો 20% સુધી પહોંચી શકે’

Back to top button