Chardham Yatra: ઉત્તરાખંડમાં ભારે વરસાદ, ભૂસ્ખલન અને વારંવાર રસ્તા બંધ થવાની ઘટનાઓ વચ્ચે પણ ચારધામ યાત્રામાં શ્રદ્ધાળુઓનો ઉત્સાહ યથાવત રહ્યો છે. ઓગસ્ટ 2026 દરમિયાન બદ્રીનાથ, કેદારનાથ, ગંગોત્રી અને યમુનોત્રીમાં કુલ 2,31,518 શ્રદ્ધાળુઓએ દર્શન કર્યા છે. છેલ્લા ચાર વર્ષમાં ઓગસ્ટ મહિનામાં નોંધાયેલો આ સૌથી ઊંચો આંકડો છે.

બદ્રીનાથમાં સૌથી વધુ 1.25 લાખથી વધુ શ્રદ્ધાળુ

ચારેય ધામમાંથી ઓગસ્ટ દરમિયાન સૌથી વધુ ભીડ બદ્રીનાથ ધામ ખાતે નોંધાઈ છે. અહીં એક મહિનામાં 1.25 લાખથી વધુ શ્રદ્ધાળુઓએ ભગવાન બદ્રીવિશાલના દર્શન કર્યા હતા. કેદારનાથમાં પણ છેલ્લા ત્રણ વર્ષના ઓગસ્ટ મહિનાની સરખામણીમાં આ વખતે વધુ શિવભક્તો પહોંચ્યા હોવાનું અહેવાલોમાં જણાવાયું છે. ઉલ્લેખનીય છે કે કોરોના સમયગાળા બાદ ઓગસ્ટ 2022માં ચારધામ ખાતે 2.67 લાખથી વધુ શ્રદ્ધાળુ પહોંચ્યા હતા. ત્યાર પછીના ચાર વર્ષના ઓગસ્ટ મહિનાની સરખામણીમાં 2026નો 2.31 લાખનો આંકડો સૌથી વધુ છે.

વરસાદ અને ભૂસ્ખલન પણ રોકી ન શક્યા શ્રદ્ધાળુઓને

ઉત્તરાખંડની ચારધામ યાત્રા આ વર્ષે 19 એપ્રિલથી શરૂ થઈ હતી. જુલાઈ દરમિયાન ચોમાસાને કારણે યાત્રાની ગતિ ધીમી પડી હતી. ઓગસ્ટમાં પણ ભારે વરસાદ, ભૂસ્ખલન અને અનેક સ્થળોએ હાઇવે અવરોધાવાની સ્થિતિ સર્જાઈ હતી, તેમ છતાં મોટી સંખ્યામાં શ્રદ્ધાળુઓ ચારધામ પહોંચ્યા હતા. વર્ષ 2025ના ઓગસ્ટની સરખામણીમાં આ વર્ષે 93,680 વધુ શ્રદ્ધાળુઓ ચારધામ પહોંચ્યા છે. જ્યારે વર્ષ 2024ના ઓગસ્ટની સરખામણીમાં આ સંખ્યા 1,18,502 વધુ છે.

સમગ્ર યાત્રા સીઝનમાં 48 લાખનો આંકડો પહેલેથી પાર

ઓગસ્ટ મહિનો પૂરો થાય તે પહેલાં જ ચારધામ યાત્રાની સમગ્ર સીઝનના આંકડા પણ નોંધપાત્ર સ્તરે પહોંચી ગયા હતા. ઉત્તરાખંડ સરકારના આંકડા મુજબ 21 ઓગસ્ટ સુધીમાં બદ્રીનાથ, કેદારનાથ, ગંગોત્રી અને યમુનોત્રીમાં કુલ 48,04,897 યાત્રાળુઓ પહોંચી ચૂક્યા હતા. ગયા વર્ષના સમાન સમયગાળાની તુલનામાં આ આંકડો 5.22 લાખથી વધુ હતો.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

હેમકુંડ સાહિબમાં પણ ઓગસ્ટમાં રેકોર્ડ ભીડ

ચારધામ ઉપરાંત સીખોના પવિત્ર ધામ હેમકુંડ સાહિબ ખાતે પણ ઓગસ્ટમાં મોટી સંખ્યામાં શ્રદ્ધાળુ પહોંચ્યા હતા. ઓગસ્ટ 2026માં અહીં 67,863 શ્રદ્ધાળુઓએ માથું ટેકવ્યું હતું. 1 જૂનથી શરૂ થયેલી યાત્રામાં અત્યાર સુધી લગભગ 2.89 લાખ યાત્રાળુ પહોંચ્યા છે. ગઈ સમગ્ર સીઝનમાં આ સંખ્યા લગભગ 2.74 લાખ હતી, એટલે આ વખતે સીઝન પૂરી થાય તે પહેલાં જ અગાઉનો આંકડો પાર થઈ ગયો છે.

15 સપ્ટેમ્બરથી હેલિકોપ્ટર સેવાનો બીજો તબક્કો

ચોમાસું નબળું પડ્યા બાદ ચારધામ માટે હેલિકોપ્ટર સેવાનો બીજો તબક્કો 15 સપ્ટેમ્બરથી શરૂ કરવાની યોજના છે. હેલિકોપ્ટર ઓપરેશન વધુ સુરક્ષિત બનાવવા સહસ્ત્રધારા હેલીપોર્ટ અને સીતાપુર ખાતે ATC વ્યવસ્થા કરવામાં આવી છે. બદ્રીનાથમાં પણ ATC સુવિધા શરૂ કરવાની યોજના છે, જ્યારે કેદારનાથમાં 2027ની યાત્રા પહેલાં આવી વ્યવસ્થા ઊભી કરવાનો પ્રયાસ છે. વરસાદ અને પહાડી વિસ્તારોમાં મુશ્કેલ હવામાન વચ્ચે પણ ઓગસ્ટમાં નોંધાયેલો યાત્રાળુઓનો વધારો ઉત્તરાખંડની ચારધામ યાત્રા પ્રત્યે સતત વધી રહેલી શ્રદ્ધા અને આકર્ષણ દર્શાવે છે.

આ પણ વાંચોઃ 27 વર્ષ સાધુ જીવન જીવ્યા બાદ ફરી ખાખી વર્દીમાં પરત ફર્યા ગિરવરસિંહ તોમર