કોણ છે નિકોલસ માદુરોનો પુત્ર, જેણે પોતાના પિતાની અટકાયતથી ગુસ્સે થઈને અમેરિકાને ધમકી આપી

વેનેઝુએલામાં અમેરિકાની સૈન્ય કાર્યવાહીમાં રાષ્ટ્રપતિ નિકોલસ માદુરો અને તેમની પત્નીને બંધક બનાવીને અમેરિકા લઈ જવામાં આવ્યા બાદ માદુરોના પુત્રનું પહેલું નિવેદન સામે આવ્યું છે. તેમણે તેમના પિતાની મુક્તિની માંગ કરી, અને ઉમેર્યું કે ઇતિહાસ બતાવશે કે ગદ્દાર કોણ છે.

ઓડિયો સ્ટેટમેન્ટ બહાર પાડવામાં આવ્યું

ગ્લોબલ ટાઈમ્સના એક અહેવાલ મુજબ, વેનેઝુએલાના રાષ્ટ્રપતિ નિકોલસ માદુરોના પુત્ર, નિકોલસ માદુરો ગુએરાએ એક ઓડિયો સ્ટેટમેન્ટ બહાર પાડીને તેમના પિતાની વાપસીની માંગ કરી અને કહ્યું કે ઇતિહાસ બતાવશે કે ગદ્દાર કોણ છે.

ગુએરાએ પોતાના ભાવુક સંદેશમાં કહ્યું, “તમે અમને રસ્તાઓ પર આ લોકો સાથે જોશો. અમે સન્માન અને ગૌરવના ઝંડા ઉંચા કરીશું. શું આનાથી અમને દુઃખ થાય છે? બેશક, અમને ગુસ્સો આવે છે, પરંતુ તેઓ એવું કરી શકશે નહીં, ધિક્કાર છે આના પર. હું મારી જિંદગીની, મારી માં સીલિયાની કસમ ખાઈને કહું છું કે તેઓ એવું કરી શકશે નહીં.”

માદુરોના પુત્ર પર પણ ડ્રગ તસ્કરીનો આરોપ

જણાવી દઈએ કે, નિકોલસ માદુરોના એકમાત્ર પુત્ર, નિકોલસ અર્નેસ્ટો માદુરો ગુએરા પર પણ યુએસ દ્વારા ડ્રગ હેરફેરનો આરોપ મૂકવામાં આવ્યો છે. ચાર્જશીટમાં ગુએરાનો ઉલ્લેખ ‘પ્રિન્સ’ તરીકે કરવામાં આવ્યો છે અને આ પહેલી વાર છે જ્યારે તેને આ કેસમાં ઘસીટવામાં આવ્યો છે કારણ કે 2020 ની ચાર્જશીટમાં તેનું નામ નહોતું. તેમાં માદુરોની પત્નીનું નામ પણ નહોતું. ગુએરાની માતા, એડ્રિયાના ગુએરા એંગુલો, માદુરોની પહેલી પત્ની હતી.

માદુરો પરિવાર ડ્રગ તસ્કરી કરી સમૃદ્ધ બન્યો

નિકોલસ અર્નેસ્ટો માદુરો ગુએરા, 35, જેને નિકોલાસિટો તરીકે પણ ઓળખવામાં આવે છે, તેમના પર કોકેન આયાત કરવાના કાવતરા અને મશીનગન અને વિનાશક ઉપકરણો રાખવાનો આરોપ મૂકવામાં આવ્યો છે. આરોપમાં જણાવાયું છે કે માદુરો “એક ભ્રષ્ટ, ગેરકાયદેસર સરકારનું નેતૃત્વ કરતા હતા, જેમણે દાયકાઓ સુધી ડ્રગ હેરફેર સહિત ગેરકાયદેસર પ્રવૃત્તિઓને દબાવવા માટે સરકારી સત્તાનો ઉપયોગ કર્યો હતો. આરોપ મુજબ, ડ્રગ્સ તસ્કરીએ માદુરોના પરિવારને સમૃદ્ધ બનાવ્યો. આ કાવતરામાં માદુરોની પત્ની અને પુત્ર પણ સામેલ છે, જેઓ વેનેઝુએલાની નેશનલ એસેમ્બલીના સભ્યો છે.

ચાર્જશીટમાં આરોપ મૂકવામાં આવ્યો છે કે માદુરો, તેમની પત્ની, પુત્ર અને ત્રણ અન્ય નામાંકિત વ્યક્તિઓએ ડ્રગ ટ્રાફિકર્સ અને નાર્કો-આતંકવાદી જૂથો સાથે ભાગીદારી કરી હતી, જે વેનેઝુએલાથી હોન્ડુરાસ, ગ્વાટેમાલા અને મેક્સિકો જેવા દેશોમાં કોકેઈન મોકલતા હતા.

માદુરોનો પુત્ર કોણ છે?

21 જૂન, 1990 ના રોજ જન્મેલા, માદુરોનો પુત્ર વેનેઝુએલા યુનાઇટેડ સોશિયાલિસ્ટ પાર્ટીના સભ્ય છે. તેમણે નાની ઉંમરે રાજકારણમાં પ્રવેશ કર્યો હતો. 2013 માં જ્યારે તેમના પિતા રાષ્ટ્રપતિ બન્યા, ત્યારે તેમને ખાસ રાષ્ટ્રપતિ નિરીક્ષણોનું નેતૃત્વ કરવા માટે નિયુક્ત કરવામાં આવ્યા હતા. તેઓ નેશનલ ફિલ્મ સ્કૂલના વડા પણ બન્યા અને વેનેઝુએલાની નેશનલ એસેમ્બલીના ડેપ્યુટી છે. નિકોલાસિટો એક સંગીતકાર પણ છે.

માદુરોના પુત્રએ તેના પિતાને યુએસ દળો દ્વારા પકડ્યા બાદ એક નિવેદનમાં જણાવ્યું કે,”વેનેઝુએલા યુનાઇટેડ સ્ટેટ્સ ઓફ અમેરિકા સરકાર દ્વારા કરવામાં આવેલા ગંભીર લશ્કરી આક્રમણને નકારી કાઢે છે અને તેની નિંદા કરે છે, જે યુએન ચાર્ટરની કલમ 1 અને 2 નું સ્પષ્ટ ઉલ્લંઘન છે, જે સાર્વભૌમત્વ, રાજ્યોની કાનૂની સમાનતા અને બળના ઉપયોગ પર પ્રતિબંધનો આદર કરે છે,”

આ પણ વાંચો: અમેરિકામાં ગર્લફ્રેન્ડની હત્યા કરી બોયફ્રેન્ડ ભારતમાં આવી ગયો, ચારેતરફ શોધી રહી છે અમેરિકાની પોલીસ