સુરત જિલ્લાના કામરેજ તાલુકામાં બુધવારે એક 108 એમ્બ્યુલન્સ અકસ્માતનો ભોગ બનતા થોડા સમય માટે અફરાતફરીનો માહોલ સર્જાયો હતો. દર્દીને તાત્કાલિક સારવાર માટે હોસ્પિટલ લઈ જતી એમ્બ્યુલન્સ અચાનક બેકાબૂ બની જતાં રસ્તાની બાજુમાં આવેલા પતરાના શેડમાં ઘૂસી ગઈ હતી. જોકે સદનસીબે આ ઘટનામાં કોઈ જાનહાનિ કે ગંભીર ઈજા નોંધાઈ નથી.
મળતી માહિતી મુજબ, ઘટના કામરેજ તાલુકાના પરબ ગામ નજીક બની હતી. 108 એમ્બ્યુલન્સ એક દર્દીને સારવાર માટે હોસ્પિટલ તરફ લઈ જઈ રહી હતી. દરમિયાન કોઈ કારણસર ચાલક સ્ટેયરિંગ પરનો કાબૂ જાળવી શક્યો નહોતો, જેના પરિણામે વાહન રસ્તા પરથી ઉતરી સીધું નજીકના પતરાના શેડમાં જઈ અથડાયું હતું.
અકસ્માત સમયે એમ્બ્યુલન્સમાં દર્દી ઉપરાંત તેમના પરિવારના સભ્યો અને તબીબી સ્ટાફ પણ હાજર હતા. અથડામણ બાદ એમ્બ્યુલન્સમાં સવાર લોકોમાં ગભરાટ ફેલાયો હતો, પરંતુ સ્ટાફે સમયસૂચકતા દાખવી તાત્કાલિક દર્દી અને પરિવારજનોને સુરક્ષિત રીતે બહાર કાઢ્યા હતા. ઘટનામાં કોઈને ગંભીર ઈજા પહોંચી ન હોવાનું જાણવા મળ્યું છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
સ્થાનિક લોકો પણ ઘટનાસ્થળે દોડી આવ્યા હતા અને બચાવ કામગીરીમાં સહયોગ આપ્યો હતો. અકસ્માતને કારણે થોડા સમય માટે આસપાસના વિસ્તારમાં લોકોના ટોળા એકત્ર થયા હતા.
આ સમગ્ર ઘટના નજીકમાં લાગેલા સીસીટીવી કેમેરામાં કેદ થઈ ગઈ છે. સામે આવેલા વીડિયોમાં એમ્બ્યુલન્સ અચાનક રસ્તા પરથી કાબૂ ગુમાવીને શેડમાં ઘૂસતી જોવા મળે છે. ઘટનાનો વીડિયો સોશિયલ મીડિયા પર ઝડપથી વાયરલ થઈ રહ્યો છે અને લોકો પણ આશ્ચર્ય વ્યક્ત કરી રહ્યા છે.
પ્રાથમિક માહિતી મુજબ અકસ્માત પાછળનું ચોક્કસ કારણ હજુ સ્પષ્ટ થયું નથી. પોલીસ અને સંબંધિત તંત્ર દ્વારા ઘટનાની તપાસ હાથ ધરવામાં આવી છે. જોકે આ અકસ્માતમાં કોઈ મોટી જાનહાનિ ન થતાં સૌએ રાહતનો શ્વાસ લીધો છે.
