IPL 2027 Schedule Change: IPLમાં થશે આ મોટો ફેરફાર, BCCIએ લીધો નિર્ણય
IPL 2027: ભારતીય ક્રિકેટ કન્ટ્રોલ બોર્ડ(BCCI) ઇન્ડિયન પ્રીમિયર લીગ (IPL)ની 20મી સીઝનમાં મહત્ત્વપૂર્ણ ફેરફાર પર વિચાર કરી રહ્યું છે. સામાન્ય રીતે IPLની શરૂઆત માર્ચના અંતિમ સપ્તાહમાં થાય છે, પરંતુ IPL 2027 લગભગ બે અઠવાડિયા વહેલી શરૂ થઈ શકે છે.
મીડિયા રિપોર્ટ્સ અનુસાર BCCI સચિવ દેવજીત સૈકિયાએ જણાવ્યું છે કે IPL 2027ની શરૂઆત 10 માર્ચથી કરવાના અને ફાઇનલ 15 મેના રોજ યોજવાના પ્રસ્તાવ પર ચર્ચા ચાલી રહી છે. જો આ પ્રસ્તાવ મંજૂર થશે તો ટૂર્નામેન્ટનો સંપૂર્ણ શેડ્યૂલ લગભગ બે અઠવાડિયા આગળ ખસેડવામાં આવશે.
કેમ લેવાયો આ નિર્ણય?
દેવજીત સૈકિયાના જણાવ્યા અનુસાર આ વર્ષે IPLની શરૂઆત 28 માર્ચે થઈ હતી અને ફાઇનલ 31 મેના રોજ રમાઈ હતી. જોકે મે મહિનાના બીજા ભાગમાં વધતી ગરમી અને પ્રી-મોન્સૂન પરિસ્થિતિઓ ખેલાડીઓ તેમજ દર્શકો માટે પડકારરૂપ બનતી હોવાથી BCCI આ મુદ્દે ગંભીરતાથી વિચાર કરી રહ્યું છે.
તેમણે જણાવ્યું કે ઘણા ખેલાડીઓ અને ક્રિકેટપ્રેમીઓએ અત્યંત ગરમીમાં મેચો યોજાતી હોવાની ફરિયાદ કરી હતી. ખાસ કરીને વિદેશી ખેલાડીઓ માટે આવી પરિસ્થિતિમાં રમવું મુશ્કેલ બની જાય છે. તેથી BCCIની પ્રાથમિકતા IPL 2027ને 15 મે સુધી પૂર્ણ કરવાની છે.
મેચોની સંખ્યા વધશે?
તાજેતરમાં IPLમાં મેચોની સંખ્યા 74થી વધારીને 94 કરવાની ચર્ચાઓ પણ ચાલી રહી હતી. જોકે દેવજીત સૈકિયાએ સ્પષ્ટ કર્યું છે કે હાલમાં મેચોની સંખ્યા વધારવાનો કોઈ વિચાર નથી.
તેમણે જણાવ્યું કે ઘણા વિદેશી ખેલાડીઓને IPL બાદ પોતાની રાષ્ટ્રીય ટીમ માટે દ્વિપક્ષીય શ્રેણીઓ રમવાની હોય છે. આથી હાલના તબક્કે 74 મેચના ફોર્મેટમાં કોઈ ફેરફાર કરવામાં આવશે નહીં.
જો BCCIનો આ પ્રસ્તાવ અમલમાં આવશે તો IPLના ઇતિહાસમાં શેડ્યૂલ સંબંધિત સૌથી મોટા ફેરફારોમાંનો એક સાબિત થઈ શકે છે.
