રેલવેનો મોટો નિર્ણય: હવે દેશના 76 સ્ટેશનો પર બનશે ‘હોલ્ડિંગ એરિયા’ બનશે, મુસાફરોને ભીડથી મળશે મુક્તિ
નવી દિલ્હી: 18 ડિસેમ્બર, 2025: તહેવારોની સિઝન દરમિયાન રેલવે સ્ટેશનો પર ઉમટતી ભારે ભીડને નિયંત્રિત કરવા માટે ભારતીય રેલવેએ એક મોટું પગલું લીધું છે. નવી દિલ્હી રેલવે સ્ટેશન પર ‘હોલ્ડિંગ એરિયા’ના સફળ પ્રયોગ બાદ, હવે આ જ મોડલને દેશના અન્ય મોટા શહેરોના સ્ટેશનો પર લાગુ કરવાનો નિર્ણય લેવામાં આવ્યો છે. રેલ મંત્રીએ અધિકારીઓને નિર્દેશ આપ્યા છે કે મુસાફરોની સુવિધા અને સુરક્ષા માટે આ દિલ્હી મોડલને રાષ્ટ્રીય સ્તરે અપનાવવામાં આવે.
શું છે આ ‘હોલ્ડિંગ એરિયા’ મોડલ?
તાજેતરમાં રેલ મંત્રી અને રેલ રાજ્ય મંત્રી રવનીત સિંહ બિટ્ટુએ દેશના મુખ્ય 76 રેલવે સ્ટેશનો પર બની રહેલા હોલ્ડિંગ એરિયાની પ્રગતિની સમીક્ષા કરી હતી. નવી દિલ્હીમાં પ્લેટફોર્મ નંબર 1 પાસે બનેલા આ સ્થાયી હોલ્ડિંગ એરિયાએ દિવાળી અને છઠ પૂજા દરમિયાન ભીડને સંભાળવામાં મહત્વની ભૂમિકા ભજવી હતી. આ સફળતાને જોતા હવે તેને અન્ય સ્ટેશનો પર પણ તૈયાર કરાશે.
મુસાફરો માટે ઉપલબ્ધ સુવિધાઓ
માત્ર ચાર મહિના કરતા પણ ઓછા સમયમાં તૈયાર થયેલા આ હોલ્ડિંગ એરિયામાં આધુનિક સુવિધાઓ આપવામાં આવી છે.
- ત્રણ ઝોનમાં વિભાજન: આ કેન્દ્રને ટિકિટિંગ, પોસ્ટ-ટિકિટિંગ અને પ્રી-ટિકિટિંગ એમ ત્રણ અલગ ભાગોમાં વહેંચવામાં આવ્યું છે, જેથી મુસાફરોની અવરજવર સરળ રહે.
- આધુનિક સુવિધાઓ: અહીં મુસાફરો માટે બેસવાની વ્યવસ્થા, ટિકિટ લેવા માટે આધુનિક મશીનો, વાઇ-ફાઇ અને ટોયલેટ્સ જેવી સુવિધાઓ ઉપલબ્ધ છે.
- ભીડ નિયંત્રણ: તહેવારો દરમિયાન ચલાવવામાં આવતી સ્પેશિયલ ટ્રેનોનું સંચાલન અહીંથી જ કરવામાં આવે છે. મુસાફરોને લાઈનમાં ઉભા રાખીને સુરક્ષિત રીતે ટ્રેનમાં બેસાડવામાં આવે છે, જેથી નાસભાગ જેવી ઘટનાઓ અટકાવી શકાય.
મોડ્યુલર ડિઝાઇન પર આધારિત નિર્માણ
દેશભરમાં બનનારા આ હોલ્ડિંગ એરિયા ‘મોડ્યુલર ડિઝાઇન’ પર આધારિત હશે. દરેક સ્ટેશન પર ઉપલબ્ધ જગ્યા અને મુસાફરોની જરૂરિયાત મુજબ તેનું નિર્માણ કરવામાં આવશે. આ વ્યવસ્થામાં ‘કંટ્રોલ એન્ટ્રી સિસ્ટમ’ (નિયંત્રિત પ્રવેશ) હશે, જેનાથી પ્લેટફોર્મ પર એકસાથે ભીડ એકઠી થતી અટકાવી શકાશે.
