Dry Fruits Side Effects: કાજુ, બદામ, અખરોટ અને પિસ્તા જેવા સૂકા ફળો (Dry Fruits) સ્વાસ્થ્ય માટે કોઈ વરદાનથી ઓછા નથી. તેમાં વિપુલ પ્રમાણમાં હેલ્ધી ફેટ્સ, પ્રોટીન, વિટામિન્સ અને મિનરલ્સ રહેલા હોય છે. જોકે, આયુર્વેદ અનુસાર ઉનાળાની ઋતુમાં તેનું ખોટી રીતે સેવન કરવાથી શરીરને ફાયદાના બદલે મોટું નુકસાન થઈ શકે છે. સૂકા ફળોની તાસીર સામાન્ય રીતે ગરમ હોય છે, તેથી શિયાળામાં તે વધુ ગુણકારી નીવડે છે. ઉનાળામાં તેનું વધુ પડતું કે સીધું સેવન કરવાથી શરીરમાં પિત્ત દોષ બગડી શકે છે, જેના કારણે ખીલ, ત્વચાની એલર્જી અને પેટની ગરમી જેવી સમસ્યાઓ સર્જાય છે.

દિવસ દરમિયાન માત્ર 20-30 ગ્રામનું સેવન જ હિતાવહ

તબીબી અને આયુર્વેદિક નિષ્ણાતોના જણાવ્યા અનુસાર, ગરમીના દિવસોમાં દરરોજ માત્ર 20-30 grams થી વધુ ડ્રાય ફ્રૂટ્સ ખાવાનું ટાળવું જોઈએ. ડ્રાય ફ્રૂટ્સમાં કેલરીનું પ્રમાણ ખૂબ ઊંચું હોય છે, જેથી બિનજરૂરી સેવનથી વજન વધી શકે છે. આ ઉપરાંત કિસમિસ, ખજૂર અને અંજીર જેવા સૂકા ફળોમાં નેચરલ શુગર વધુ હોવાથી ડાયાબિટીસના દર્દીઓએ તેના પ્રમાણ પર ખાસ ધ્યાન રાખવું જરૂરી છે. નિષ્ણાતો ઉનાળામાં આ વસ્તુઓને ખાતા પહેલા તેને પાણીમાં પલાળી રાખવાની સલાહ આપે છે. પાણીમાં પલાળવાથી ડ્રાય ફ્રૂટ્સમાં રહેલું ફાયટીક એસિડ દૂર થાય છે અને તેની ગરમ તાસીર નષ્ટ થઈને તે શરીર માટે ઠંડક આપનાર એજન્ટ તરીકે કામ કરે છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

આ છે સૌથી વધુ ગરમ તાસીર ધરાવતા સૂકા ફળો

ઉનાળામાં કયા ડ્રાય ફ્રૂટ્સથી અંતર રાખવું અથવા સાવચેતી રાખવી તે જાણવું ખૂબ જ જરૂરી છે. આ યાદીમાં સૂકી ખજૂર સૌથી મોખરે છે, જે અત્યંત ગરમ હોવાથી શિયાળામાં કફ અને સાંધાના દુખાવા માટે ઉત્તમ છે, પણ ઉનાળામાં તે સીધી ખાવી નુકસાનકારક છે. ત્યારબાદ અખરોટ આવે છે, જેમાં ઓમેગા-3 ફેટી એસિડ્સ અને હેવી મેટલ્સ હોય છે જેને પચાવવા માટે શરીરને વધુ ઊર્જાની જરૂર પડે છે, જેથી શરીરનું તાપમાન વધે છે. તેવી જ રીતે, પલાળ્યા વગરની સૂકી કે શેકેલી બદામ પેટમાં બળતરા પેદા કરી શકે છે. પિસ્તા પણ સ્વભાવે ખૂબ જ ગરમ અને કડક હોવાથી ગરમીમાં તેનો મર્યાદિત ઉપયોગ જ કરવો જોઈએ.

ગરમીની ઋતુમાં ડ્રાય ફ્રૂટ્સ ખાવાની સાચી પદ્ધતિ

આયુર્વેદ અનુસાર, જો તમે ઉનાળામાં પણ આ ડ્રાય ફ્રૂટ્સનો લાભ લેવા માંગો છો, તો તેને આખી રાત પાણીમાં પલાળી રાખો અને સવારે ખાલી પેટે તેનું સેવન કરો. આનાથી પાચનતંત્ર મજબૂત બને છે. બદામને આખી રાત પલાળી રાખ્યા બાદ સવારે તેની છાલ ઉતારીને ખાવી જોઈએ, તેમાં રહેલું વિટામિન E સૂર્યપ્રકાશના કારણે થતા ઓક્સિડેટીવ સ્ટ્રેસ સામે રક્ષણ આપે છે. કિસમિસની તાસીર કુદરતી રીતે ઠંડી હોવાથી તે ઉનાળાના થાકને દૂર કરી ત્વરિત ઉર્જા આપે છે. કાજુ અને ખજૂરને પણ પલાળીને ખાવાથી શરીરની આંતરિક ગરમી ઓછી થાય છે. જ્યારે મખાના કુદરતી રીતે જ ઠંડક આપતા હોવાથી તે શરીરમાં વધેલા પિત્તને શાંત કરે છે અને એસિડિટીથી બચાવે છે.

આ પણ વાંચો: મિક્સરની ઝંઝટ વિના માત્ર 5 મિનિટમાં મલાઈમાંથી બનાવો શુદ્ધ દેશી ઘી, અપનાવો આ દેશી ટ્રીક