મિક્સરની ઝંઝટ વિના માત્ર 5 મિનિટમાં મલાઈમાંથી બનાવો શુદ્ધ દેશી ઘી, અપનાવો આ દેશી ટ્રીક
Homemade Desi Ghee: આજના સમયમાં બજારમાં મળતી કોઈપણ વસ્તુની શુદ્ધતા પર વિશ્વાસ કરવો અત્યંત મુશ્કેલ બની ગયો છે. અવારનવાર દૂધ, માવો, પનીરથી લઈને દેશી ઘીમાં ભેળસેળના સમાચારો સામે આવતા રહે છે. બજારમાં ‘શુદ્ધ દેશી ઘી’ ના નામે આશરે 800 થી 1000 રૂપિયા કિલોના ભાવે ભેળસેળવાળું ઘી વેચવામાં આવે છે. આટલા મોંઘા પૈસા ખર્ચ્યા પછી પણ ઘી શુદ્ધ મળશે જ તેની કોઈ ગેરંટી હોતી નથી.
આ જ કારણે મોટાભાગના લોકો ઘરમાં જ બનાવેલું શુદ્ધ દેશી ઘી ખાવાનું પસંદ કરે છે. પરંતુ મલાઈમાંથી માખણ કાઢવાની મહેનત અને ત્યારબાદ મિક્સર કે બ્લેન્ડર સાફ કરવાની કંટાળાજનક પ્રોસેસના કારણે લોકો ઘી બનાવવામાં આળસ કરે છે. જો તમને પણ ઘી બનાવવાનું કામ ખૂબ જ ઝંઝટભર્યું લાગતું હોય, તો આ ખાસ ખબર તમારા માટે છે. આજે અમે તમને એક એવી સરળ ટ્રીક જણાવીશું જેનાથી તમે મિક્સર કે મશીન વગર માત્ર 5 જ મિનિટમાં માખણ તૈયાર કરીને સુગંધિત અને દાણાદાર ઘી બનાવી શકશો.
કેવી મલાઈનો ઉપયોગ કરવો જોઈએ?
ઘરે સ્વાદિષ્ટ અને બજાર જેવું દાણાદાર ઘી બનાવવા માટે મલાઈ એકત્રિત કરતી વખતે કેટલીક બાબતોનું ધ્યાન રાખવું જરૂરી છે:
* તાજી મલાઈ: ઘી બનાવવા માટે આશરે એક અઠવાડિયા (7 દિવસ) સુધી જમા કરેલી મલાઈનો જ ઉપયોગ કરવો જોઈએ. બહુ જૂની મલાઈ વાપરવાથી ઘીનો સ્વાદ અને સુગંધ બગડી શકે છે.
* ફ્રેશ રાખવાની ટ્રીક: મલાઈ લાંબા સમય સુધી એકદમ ફ્રેશ રહે અને તેમાંથી વાસ ન આવે તે માટે જે વાસણમાં મલાઈ જમા કરતા હોવ તેમાં પહેલાથી જ તળિયે થોડું દહીં (મેળવણ) લગાવી દેવું જોઈએ.
* રૂમ ટેમ્પરેચર: તમે જ્યારે પણ મલાઈમાંથી ઘી બનાવવાનું પ્લાનિંગ કરો, તેના 1 થી 2 કલાક પહેલા મલાઈના વાસણને ફ્રીઝરમાંથી બહાર કાઢીને રૂમ ટેમ્પરેચર પર સામાન્ય થવા માટે મૂકી દો.
મિક્સર વગર માત્ર 5 મિનિટમાં આ રીતે કાઢો માખણ
જ્યારે ફ્રીઝરમાંથી બહાર કાઢેલી મલાઈ એકદમ નોર્મલ થઈ જાય, ત્યારે નીચે મુજબના સ્ટેપ્સ ફોલો કરો:
* મોટું વાસણ પસંદ કરો: સૌથી પહેલા મલાઈને એક મોટા અને ઊંડા વાસણમાં કાઢી લો.
* એક જ દિશામાં મથવું: હવે મિક્સર ચાલુ કરવાને બદલે એક સાદી હેન્ડ વ્હિસ્કર (જૂની પરંપરાગત લાકડાની કે સ્ટીલની મથવાની વલોણી) લો અથવા તમારા હાથ એકદમ સાફ કરીને મલાઈને ફેટવાનું (વલોવવાનું) શરૂ કરો. ધ્યાનમાં રાખો કે મલાઈને સતત એક જ ડાયરેક્શનમાં (દિશામાં) ફેટવાની છે.
* ઠંડુ પાણી ઉમેરો: માત્ર 5 મિનિટની અંદર જ મલાઈ ઘટ્ટ થવા લાગશે અને તેમાંથી માખણ અલગ પડતું દેખાશે. આ સ્ટેજ પર તેમાં થોડું ફ્રિજનું એકદમ ઠંડુ પાણી અથવા બરફના ટુકડા ઉમેરો. ઠંડુ પાણી નાખતાની સાથે જ માખણનો મોટો લોચો ઉપર આવી જશે અને છાશ એકદમ અલગ થઈ જશે.
* માખણ અલગ કરો: હવે માખણને હાથથી સરસ રીતે ગોળ લાડુ બનાવીને બીજા વાસણમાં કાઢી લો. ઇચ્છો તો આ માખણને એકવાર ચોખ્ખા ઠંડા પાણીથી ધોઈ શકો છો જેથી છાશનો ભાગ બિલકુલ ન રહે.
કામની ટિપ્સ: માખણ અલગ કર્યા પછી વધેલી ઘટ્ટ છાશને ફેંકી દેવાની ભૂલ ન કરતા. આ છાશમાં સંચળ (કાળું મીઠું) અને શેકેલું જીરું મેળવીને પીવા માટે ઉપયોગ કરી શકાય છે અથવા તેની મસ્ત કઢી પણ બનાવી શકાય છે.
માખણમાંથી આ રીતે બનાવો સોનેરી-સુગંધિત દેશી ઘી
* માખણ નીકળી ગયા પછી ઘી બનાવવા માટે તેને એક જાડા તળિયાવાળી કડાઈમાં (લોઢીમાં) નાખીને શરૂઆતમાં હાઈ ફ્લેમ (તેજ આંચ) પર પીગળવા દો.
* માખણ આખું ઓગળી જાય એટલે ગેસની આંચ ધીમી કરી નાખો અને તેને 8 થી 10 મિનિટ સુધી ધીમા તાપે પાકવા દો.
* જ્યારે ઘી કડાઈમાં ઉપર તરવા લાગે અને નીચેનો કચરો આછો બદામી રંગનો થઈ જાય તેમજ ઘી એકદમ કાચ જેવું ટ્રાન્સપરન્ટ (પારદર્શક) દેખાવા લાગે એટલે ગેસ બંધ કરી દો.
બજાર જેવો પીળો-સોનેરી રંગ મેળવવાની સીક્રેટ ટ્રીક: જો તમે ઈચ્છો છો કે તમારું ઘરનું ઘી બજારમાં મળતા ગાયના ઘી જેવું સરસ સોનેરી-પીળું દેખાય, તો ઘી જ્યારે ઉકળતું હોય ત્યારે તેમાં માત્ર એક ચપટી હળદર પાવડર ઉમેરી દો. આનાથી ઘીનો રંગ ખૂબ જ સરસ આવશે. ઘી સહેજ ઠંડુ થાય એટલે તેને ગરણીથી ગાળીને કાચની સાફ એરટાઈટ બરણીમાં ભરીને સ્ટોર કરી લો.
આ પણ વાંચોઃ 30 જૂન પહેલાં પૂરું કરી લો આ જરૂરી કામ, નહીંતર બંધ થઈ જશે ગેસ સબસિડી અને સિલિન્ડર!
આ પણ વાંચોઃ જૂનમાં અમેરિકાથી LPGની આયાતે તમામ રેકોર્ડ તોડશે, 10 લાખ મેટ્રિક ટન ગેસ ભારતને મળશે
અમારી WhatsApp ચેનલમાં જોડાવા આ લિંક પર ક્લીક કરો
