ઓસ્ટ્રેલિયા, 24 જુલાઈ 2025: ઓસ્ટ્રેલિયમાં ફરી હિન્દુ મંદિરને નિશાન બનાવવામાં આવ્યું, બે દિવસમાં ભારત વિરોધી ધિક્કારની બીજી ઘટના પ્રકાશમાં આવી છે. શ્રી સ્વામિનારાયણ મંદિરની દિવાલો પર નફરતભર્યા સૂત્રો અને અપશબ્દો લખવામાં આવ્યા હતા, જેમાં “ઘરે જાઓ” અને “બ્રાઉન” સહિતના અપશબ્દોનો સમાવેશ થાય છે.
આ ઘટના માત્ર હિન્દુ સમુદાય માટે જ નહીં પરંતુ સમગ્ર સમાજ માટે એક મોટો આઘાત છે, કારણ કે તે નસ્લીય દ્વેષનું નવીનતમ ઉદાહરણ છે. આ હુમલાથી ઓસ્ટ્રેલિયામાં હિન્દુઓ વિરુદ્ધ વધતી નફરત સામે આવી છે.
મંદિરની બહાર જાતિવાદી સૂત્રો પણ લખેલા મળી આવ્યા હતા
પોલીસે પુષ્ટિ આપી છે કે આ ઘટના 21 જુલાઈના રોજ મેલબોર્નના બોરોનિયા વિસ્તારમાં બની હતી. મંદિર ઉપરાંત, નજીકના બે એશિયન રેસ્ટોરન્ટની દિવાલો પર પણ સમાન વંશીય નારા લખેલા હતા.
આ હુમલાઓએ એક સાથે સ્થાનિક લોકોમાં ભય અને ગુસ્સો ફેલાવ્યો છે. પોલીસે જણાવ્યું હતું કે બોરોનિયા અને બેઝવોટરમાં આવી ચાર ઘટનાઓની તપાસ કરવામાં આવી રહી છે.
‘આપણી શ્રદ્ધા અને સંસ્કૃતિ પર હુમલો’
હિન્દુ કાઉન્સિલ ઓફ ઓસ્ટ્રેલિયાના વિક્ટોરિયા ચેપ્ટરના પ્રમુખ મકરંદ ભાગવતે આ ઘટના પર ઊંડું દુ:ખ વ્યક્ત કર્યું હતું. તેમણે કહ્યું, “આપણું મંદિર શાંતિ, ભક્તિ અને એકતાનું પ્રતીક છે. તેને દ્વેષપૂર્ણ શબ્દોથી અપવિત્ર કરવું ખૂબ જ દુઃખદ છે. આ આપણી શ્રદ્ધા અને સંસ્કૃતિ પર હુમલો છે.”
વિક્ટોરિયાના પ્રીમિયર જેસિન્ટા એલને પણ આ હુમલાની સખત નિંદા કરી છે. તેમણે તેને “દ્વેષપૂર્ણ અને ખૂબ જ ખલેલ પહોંચાડનાર” ગણાવ્યું છે.
તેમના નિવેદનમાં, તેમણે કહ્યું, “આ માત્ર તોડફોડ નહોતી, પરંતુ એક સુનિયોજિત વંશીય હુમલો હતો. તેનો હેતુ ભય ફેલાવવાનો અને લોકોને અલગ પાડવાનો હતો. વિક્ટોરિયામાં આવી નફરત માટે કોઈ સ્થાન નથી.”
