ફિલ્મ ‘માસૂમ કાતિલ’ પર હાઇકોર્ટે લગાવ્યો પ્રતિબંધ, કહ્યું- ‘સમાજ અને કાયદા માટે જોખમી…’
નવી દિલ્હીઃ 12 સપ્ટેમ્બર, 2025: Delhi High Court: દિલ્હી હાઈકોર્ટે હિન્દી ફિલ્મ ‘માસૂમ કાતિલ’ની રિલીઝને મંજૂરી આપવાનો ઇનકાર કરી દીધો છે. કોર્ટે કહ્યું કે વિવિધતાપૂર્ણ અને ધર્મનિરપેક્ષ સમાજમાં, એવી ફિલ્મ જે ધર્મોની મજાક ઉડાવે છે, નફરત ફેલાવે છે અથવા સામાજિક સૌહાર્દને જોખમમાં મૂકે છે, તેથી તેને રિલીઝ કરવાની મંજૂરી ન આપી શકાય.
કોર્ટે ફિલ્મ પર લગાવ્યો પ્રતિબંધ
કોર્ટે કહ્યું કે, આ ફિલ્મ બતાવે છે કે કાયદો પોતાના હાથમાં લેવો એ પ્રશંસનીય છે. આને મંજૂરી ન આપી શકાય, કારણ કે તે કાયદા અને વ્યવસ્થામાં લોકોની શ્રદ્ધાને નુકસાન પહોંચાડી શકે છે. તે સૂચવે છે કે કાયદાનું પાલન કરવાને બદલે હિંસાનો ઉપયોગ કરવો જોઈએ. આ ટિપ્પણીઓ સાથે, જસ્ટિસ મનમીત પ્રીતમ સિંહ અરોરાએ 10 સપ્ટેમ્બરે CBFC દ્વારા ફિલ્મને જાહેરમાં રિલીઝ કરવાની મંજૂરી આપવાના ઇનકારને પડકારતી અરજીને ફગાવી દીધી હતી.
મંજૂરીનો કર્યો ઇનકાર
ન્યાયાધીશે કહ્યું કે, પરવાનગીનો ઇનકાર કરતી તપાસ સમિતિના અહેવાલ દર્શાવે છે કે, ફિલ્મની સામગ્રી બિનજરૂરી રીતે હિંસક અને ભયાનક છે. તેથી, તે જાહેર પ્રદર્શન માટે યોગ્ય નથી.
ફિલ્મનો હીરો કોઈપણ સજા વિના કાયદો હાથમાં લે છે…
કોર્ટે કહ્યું કે, ફિલ્મમાં દર્શાવવામાં આવેલી સામગ્રી લોકોના મનમાં ક્રૂરતા ફેલાવશે. આદેશમાં કહેવામાં આવ્યું છે કે ફિલ્મના હીરો કોઈ પણ સજા વિના કાયદો પોતાના હાથમાં લે છે. જો કોઈ ફિલ્મ બતાવે છે કે, કાયદો પોતાના હાથમાં લેવું પ્રશંસનીય છે, તો તેનાથી લોકોને કાનૂની વ્યવસ્થા પર વિશ્વાસ ઓછો થઈ શકે છે.
આ મુદ્દે કોર્ટે કહ્યું કે, જ્યારે આવા ખતરનાક વિચારોને હત્યા અને નરભક્ષકતાના જીવંત દ્રશ્યો સાથે જોડવામાં આવે છે, ત્યારે આવી સામગ્રી ધરાવતી ફિલ્મ જાહેર શાંતિને ગંભીર રીતે ખલેલ પહોંચાડી શકે છે. તે અન્ય લોકોને હિંસક કૃત્યો કરવા માટે પ્રોત્સાહિત કરી શકે છે, જેનાથી સમાજની સલામતી જોખમમાં મુકાઈ શકે છે.
ધર્મ વિશે પણ અપમાનજનક ટિપ્પણી
આ આદેશમાં કહેવામાં આવ્યું કે, ફિલ્મમાં માત્ર માનવીઓ અને પ્રાણીઓ વિશે હિંસક સામગ્રી જ નથી, પરંતુ તેમાં સમુદાયોના અપમાનજનક સંદર્ભો, ધર્મો વિશે અપમાનજનક ટિપ્પણીઓ અને જાતિ આધારિત અને સાંપ્રદાયિક નિવેદનો પણ છે. કોર્ટે વધુમાં કહ્યું કે, આવા ચિત્રણ કાયદા હેઠળ પ્રતિબંધિત છે, જે કોઈપણ ફિલ્મને સાંપ્રદાયિક દ્વેષને પ્રોત્સાહન આપવા અથવા ધાર્મિક લાગણીઓને ઠેસ પહોંચાડવા પર પ્રતિબંધ મૂકે છે.
આ આદેશમાં કહેવામાં આવ્યું છે કે, બંધારણની કલમ 19(1)(a) (વાણી અને અભિવ્યક્તિની સ્વતંત્રતા) શિષ્ટાચાર, નૈતિકતા, જાહેર વ્યવસ્થા અને ગુના માટે ઉશ્કેરણીના આધારે વાજબી પ્રતિબંધોને આધીન રહેવાની જોગવાઈ કરે છે. ઉપર ચર્ચા કર્યા મુજબ, ફિલ્મનો વિષય આ બધા પ્રતિબંધોનું ઉલ્લંઘન કરે છે.
આ પણ વાંચોઃ PM મોદી અને માતા હીરાબાના AI જનરેટ વીડિયો મામલે રાજકારણ ગરમાયું, જુઓ Video
આ પણ વાંચોઃ સામાન્ય વહીવટી વિભાગ દ્વારા 2 સેક્શન અધિકારી અને 10 નાયબ સેક્શન અધિકારીની બદલી, જુઓ યાદી
