સેક્સવર્ધક ગોળીઓ ખાઈ પત્ની સાથે ક્રૂરતા આચરતો, પત્નીએ દૂધમાં ઝેર ભેળવી પતિનું ગળું દબાવી દીધું

સુરત 26 જાન્યુઆરી 2026: સુરત શહેરના લિંબાયત વિસ્તારમાં માનવતા અને સંબંધોને લજવતી એક અત્યંત કંપારી છૂટી જાય તેવી ઘટના સામે આવી છે. વર્ષોથી પતિ દ્વારા ગુજારવામાં આવતા અમાનુષી શારીરિક અત્યાચારનો બદલો લેવા માટે પત્નીએ જ ખતરનાક કાવતરું ઘડી પોતાના પતિની કરપીણ હત્યા કરી નાખી છે. આ હત્યા પાછળનું મુખ્ય કારણ પતિની વિકૃત માનસિકતા અને સેક્સવર્ધક દવાઓનું સેવન કરીને પત્ની પર આચરવામાં આવતી ક્રૂરતા હોવાનું પોલીસ તપાસમાં બહાર આવ્યું છે.

ત્રાસની પરાકાષ્ઠા અને હત્યાનું કાવતરું

મૃતક હૈદરઅલી મુંબઈમાં નોકરી કરતો હતો અને મહિનામાં માત્ર એકાદ વાર સુરત પોતાના ઘરે આવતો હતો. આરોપી પત્ની ઈશરત જહાને પોલીસ સમક્ષ ચોંકાવનારો ખુલાસો કરતા જણાવ્યું કે, તેનો પતિ જ્યારે પણ ઘરે આવતો ત્યારે સેક્સવર્ધક ગોળીઓ ખાઈને તેને ત્યાં સુધી મારતો અને પીડા આપતો જ્યાં સુધી તેના શરીરમાંથી લોહી ન નીકળે. આ હેવાનીયત દર મહિને ચાલતી હતી. સતત શારીરિક અને માનસિક યાતનાઓને કારણે ઈશરતના મનમાં પતિ પ્રત્યે ભારે રોષ ભરાયો હતો. અંતે, આ ત્રાસમાંથી કાયમી છુટકારો મેળવવા તેણે પતિને હંમેશા માટે રસ્તામાંથી હટાવી દેવાનું મન બનાવી લીધું હતું.

હળદરવાળા દૂધમાં ઝેર અને ગળું દબાવી હત્યા

હત્યા કરવાના ઈરાદે પત્નીએ ગત ૧લી જાન્યુઆરીએ હૈદરઅલીને રાત્રે પીવા માટે હળદરવાળું દૂધ આપ્યું હતું, પરંતુ આ દૂધમાં તેણે છૂપી રીતે ઉંદર મારવાની ઝેરી દવા ભેળવી દીધી હતી. ઝેરની અસર ધીમે ધીમે થવા લાગી અને ૫મી જાન્યુઆરીએ હૈદરઅલીની તબિયત લથડતા તેને સ્મીમેર હોસ્પિટલમાં દાખલ કરવામાં આવ્યો. જોકે, પત્નીએ માત્ર ઝેર આપીને સંતોષ ન માન્યો. જ્યારે ઝેરને કારણે હૈદરઅલી અત્યંત નબળો પડી ગયો હતો, ત્યારે ઈશરતે તેનું ગળું અને છાતી દબાવીને તેને સંપૂર્ણપણે મોતને ઘાટ ઉતારી દીધો હતો. શરૂઆતમાં પત્નીએ આ એક સામાન્ય બીમારીથી થયેલું મૃત્યુ હોવાનું નાટક રચ્યું હતું.

દફનવિધિના વિવાદે ખોલ્યું રહસ્ય

હત્યાનો આ ભેદ ત્યારે ઉકેલાયો જ્યારે દફનવિધિના સ્થળને લઈને વિવાદ થયો. હૈદરઅલીનો ભાઈ લાશને બિહારના વતનમાં લઈ જવા માંગતો હતો, જ્યારે પત્ની જીદ પર અડી હતી કે દફનવિધિ સુરતમાં જ કરવામાં આવે. પત્નીની આ વિચિત્ર જીદ અને વર્તનને જોઈને ભાઈને શંકા ગઈ અને તેણે પોલીસને જાણ કરી. પોલીસે લાશનું ફોરેન્સિક પોસ્ટમોર્ટમ કરાવતા રિપોર્ટમાં ખુલાસો થયો કે મૃત્યુ માત્ર ઝેરથી નહીં પરંતુ ગૂંગળામણ (Asphyxia) થી થયું છે.

પોલીસ કાર્યવાહી

લિંબાયત પોલીસે આ મામલે પત્ની ઈશરત જહાન વિરુદ્ધ હત્યાની કલમો હેઠળ ગુનો દાખલ કરી તેની ધરપકડ કરી છે. પોલીસ હવે એ દિશામાં તપાસ કરી રહી છે કે આ જઘન્ય અપરાધમાં પત્ની સાથે અન્ય કોઈ વ્યક્તિ સામેલ હતી કે કેમ. આ ઘટનાએ સમગ્ર સુરતમાં ભારે ચકચાર જગાવી છે.

આ પણ વાંચો: 1 દર્દી, 100 શંકાસ્પદ… શું બંગાળમાં કોઈ સાયલન્ટ કિલર ચોરીછૂપીથી ફેલાઈ રહ્યું છે? પડોશી દેશો એલર્ટ પર