ગુજરાત SIR પર કોંગ્રેસનો આરોપ, લાખો યોગ્ય મતદારોને મતાધિકારથી વંચિત રાખવાનું કાવતરું ઘડી રહી છે BJP

અમદાવાદ: કોંગ્રેસ પાર્ટીએ ગુજરાતમાં મતદાર યાદી સુધારણા પ્રક્રિયા (SIR) પર ગંભીર પ્રશ્નો ઉઠાવ્યા છે અને એક મોટું ષડયંત્ર હોવાનો આરોપ લગાવ્યો છે. ગુજરાત મતદાર યાદીના સ્પેશિયલ ઇન્ટેન્સિવ રિવિઝન (SIR) પછી ડ્રાફ્ટ મતદાર યાદી બહાર પાડવામાં આવી હતી, જેમાં 2002ની મતદાર યાદીમાંથી 74 લાખ નામો હટાવી દેવામાં આવ્યા છે. ચૂંટણી પંચે 18 જાન્યુઆરી સુધીમાં ફોર્મ 7 સબમિટ કરવાનું કહ્યું હતું. કોંગ્રેસ પાર્ટીનો આરોપ છે કે ભાજપના ઇશારે ખોટા ફોર્મ 7 સબમિટ કરવામાં આવ્યા છે. આ ગુજરાતના લાખો સાચા મતદારોને તેમના મતદાન અધિકારથી વંચિત રાખવાનું ઇરાદાપૂર્વકનું કાવતરું છે.

ખોટી રીતે નામો કાઢી નાખવાના આરોપો

ગુજરાત પ્રદેશ કોંગ્રેસ સમિતિના પ્રમુખ અમિત ચાવડા અનુસાર, 15 જાન્યુઆરી સુધી ચૂંટણી આયોગ પાસે ફોર્મ 7માં ખૂબ ઓછા સબમિશન આવ્યા હતા, પરંતુ 15 જાન્યુઆરીથી અચાનક સબમિશનમાં વધારો થયો. ચાવડાએ જણાવ્યું કે, ચૂંટણી આયોગે 22 જાન્યુઆરીએ તેમને જણાવ્યુ હતું કે ફોર્મ-7 પર 12,59,229 ઓબ્જેક્શન નોંધાયા છે. કોંગ્રેસે 17 જાન્યુઆરીએ આ ષડયંત્ર વિશે આયોગને જાણ કરી હતી અને 18 જાન્યુઆરીના ફોર્મ 7 પર ઓબ્જેક્શન સબમિટ કરનારા લોકોની CCTV ફૂટેજ માગી હતી.

ચાવડાએ જણાવ્યું કે, ઘણાં ઓબ્જેક્શન નકલી નામોથી ઉઠાવવામાં આવ્યા હતા. તેઓએ જણાવ્યું કે કેટલાક લોકોએ એફિડેવિટ પણ ફાઇલ કર્યા છે જેમાં કહેવામાં આવ્યું છે કે તેમના નામ પર વોટિંગ વિરુદ્ધ ઓબ્જેક્શન તેમની જાણકારી અને સહમતિ વિના કરવામાં આવ્યા છે.

Vadodara City Congress President Rutvij Joshi exposes the Vote Theft conspiracy of BJP and It’s interest groups.

In the name of SIR, Form 7 is being misused to delete thousands of voters from the electoral rolls.
This is nothing but an attack on democracy.#VoteChoriExposed… pic.twitter.com/njO7dqSAgM

— Rutvij Joshi (@RutvijJoshi) February 9, 2026

‘વોટ ચોરી’ પર કોંગ્રેસ આક્રમક

ગુજરાતમાં SIR દરમિયાન બીજેપીના લોકોએ ખોટી રીતે નામ હટાવવાના કાવતરાનો આરોપ લગાવતા કોંગ્રેસ હવે શહેરો અને જિલ્લાઓમાં રાહુલ ગાંધી સ્ટાઇલમાં પ્રેસ કોન્ફરન્સ કરી રહી છે. વડોદરા શહેર અધ્યક્ષ રૂત્વિજ જોશીએ ખોટી રીતે નામ હટાવવાના દસ્તાવેજો સબમિટ કરનારા લોકો વિરુદ્ધ કાર્યવાહી કરવાની માંગ કરી છે. જોશીનો આરોપ છે કે ફેક ફોર્મ 7 એપ્લિકેશન સબમિટ કરવામાં આવી છે. તેમણે જણાવ્યું હતું કે વડોદરા શહેરમાં નકલી ફોર્મ 7 અરજીઓની સંખ્યા 4,569, સયાજીગંજમાં 8,195, અકોટામાં 13,188 અને રાવપુરામાં 19,045 છે. નોંધનીય છે કે ફોર્મ 7 નો ઉપયોગ મતદાર યાદીમાંથી કોઈનું નામ દૂર કરવા અને કોઈને ખોટી રીતે મતદાર તરીકે નોંધવામાં આવ્યા હોવા સામે વાંધો નોંધાવવા માટે થાય છે.

હાઈકોર્ટ પહોંચી કોંગ્રેસ પાર્ટી

સુરતના બે કોંગ્રેસ નેતાઓએ રાજ્યમાં ચાલી રહેલા મતદાર યાદી સુધારણાને પડકાર્યો છે. હાઈકોર્ટમાં દાખલ કરાયેલી અરજીમાં આરોપ મૂકવામાં આવ્યો છે કે મતદારોના નામ ખોટી રીતે મતદાર યાદીમાંથી દૂર કરવામાં આવી રહ્યા છે. કોંગ્રેસ પાર્ટીએ 10 ફેબ્રુઆરીએ અરજી દાખલ કરી હતી. ગુજરાત માટે અંતિમ મતદાર યાદી 17 ફેબ્રુઆરી, 2026 ના રોજ પ્રકાશિત થવાની ધારણા છે. દાવા અને વાંધા દાખલ કરવાની અંતિમ તારીખ સમાપ્ત થઈ ગઈ છે. આ સમયગાળા દરમિયાન, આશરે 6.88 લાખ નવા નામ ઉમેરવામાં આવ્યા છે અને કાઢી નાખવા માટે આશરે 9.88 લાખ અરજીઓ પ્રાપ્ત થઈ છે. ગુજરાતમાં મતદાર યાદી સુધારણા પૂર્ણ થયા પછી, મુખ્ય શહેરોમાં મ્યુનિસિપલ ચૂંટણીઓ નવી મતદાર યાદીના આધારે યોજાશે.

આ પણ વાંચો: વડોદરામાં કોસમોસ બેન્કના લોકરમાં મૂકેલા 45 તોલા સોનાના દાગીના ગાયબ, NRI પરિવાર મુશ્કેલીમાં મુકાયો