ચીનમાં એક ચોંકાવનારો આરોગ્ય સંબંધિત મામલો સામે આવ્યો છે, જેમાં અત્યંત ગરમ ખોરાક ઝડપથી ખાવાની આદત એક મહિલાને ભારે પડી. 42 વર્ષીય મહિલાએ ઉકળતા ગરમ હોટપોટનો ખોરાક ઉતાવળમાં જમી લીધા બાદ તેના ગળાની અંદર આવેલા અન્નનળી (oesophagus) માં લગભગ 8 સેન્ટીમીટર લાંબો અલ્સર થઈ ગયો હોવાનું ડૉક્ટરોએ શોધ્યું છે.
શું છે સમગ્ર ઘટના?
રિપોર્ટ અનુસાર, ચીનના હુનાન પ્રાંતની રહેવાસી મહિલા પોતાના મિત્રો સાથે હોટપોટ રેસ્ટોરન્ટમાં જમવા ગઈ હતી. દરમિયાન તેણે ઉકળતા ગરમ હોટપોટમાંથી સીધું જ ખાવાનું મોઢામાં નાખી દીધું અને ઠંડુ થવાની રાહ જોયા વગર ઝડપથી ગળી લીધું. ખોરાક ગળ્યા પછી તરત જ મહિલાને છાતીમાં ભારે દુખાવો અને ગળામાં બળતરા અનુભવાઈ. શરૂઆતમાં તેણે આ સામાન્ય તકલીફ માની અને રાહત મેળવવા માટે બરફ જેટલું ઠંડુ પાણી પીધું. પરંતુ આ ઉપાયથી સ્થિતિ વધુ બગડી ગઈ. આગલા દિવસે મહિલાને પાણી ગળવામાં પણ ભારે મુશ્કેલી થવા લાગી, જેના કારણે તેને તાત્કાલિક હોસ્પિટલમાં દાખલ કરવામાં આવી.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
એન્ડોસ્કોપીમાં થયો ચોંકાવનારો ખુલાસો
હોસ્પિટલમાં ડૉક્ટરોએ મહિલાની એન્ડોસ્કોપી કરી ત્યારે જાણવા મળ્યું કે તેની અન્નનળીમાં લગભગ 8 સેમી લાંબો ગંભીર અલ્સર બની ગયો છે. આ ઘા એક પુખ્ત વ્યક્તિની ફૂડ પાઇપના લગભગ ત્રીજા ભાગ જેટલો હતો. ડૉક્ટરોએ જણાવ્યું કે ઘણા લોકો માનતા હોય છે કે ગળું ખૂબ ગરમ વસ્તુ સહન કરી શકે છે, પરંતુ અન્નનળીની અંદરની સપાટી માત્ર 50 થી 60 ડિગ્રી સેલ્સિયસ જેટલું તાપમાન જ સહન કરી શકે છે. જ્યારે હોટપોટ જેવી વાનગીઓનું તાપમાન 80 થી 90 ડિગ્રી સુધી પહોંચી શકે છે, જે અંદરથી ગંભીર દાઝ પેદા કરી શકે છે.
ગરમ પછી તરત ઠંડુ પાણી પીવું પણ જોખમી
તબીબોએ વધુમાં ચેતવણી આપી કે અત્યંત ગરમ ખોરાક લીધા પછી તરત જ બરફ જેવું ઠંડુ પાણી પીવાથી નુકસાન પામેલા ટિશ્યૂઝ પર વધુ અસર થાય છે. લોકો સામાન્ય રીતે તેને રાહત માટેનો ઉપાય માને છે, પરંતુ તે ગળાની અંદર સોજો અને ઈજા વધારી શકે છે.
વારંવાર ગરમ ખોરાક ખાવાથી વધી શકે કેન્સરનો ખતરો
ચીનમાં હોટપોટ ખૂબ લોકપ્રિય વાનગી છે, ખાસ કરીને સિચુઆન અને ચોંગકિંગ વિસ્તારમાં મસાલેદાર અને અત્યંત ગરમ હોટપોટ ખાવાનો ટ્રેન્ડ વધારે છે. પરંતુ આરોગ્ય નિષ્ણાતો અનુસાર આ આદત લાંબા ગાળે ગંભીર બીમારીઓનું કારણ બની શકે છે. રિપોર્ટ મુજબ, વિશ્વમાં થતા કુલ અન્નનળીના કેન્સરના લગભગ 40 ટકા કેસ ચીનમાં નોંધાય છે. નિષ્ણાતોનું માનવું છે કે ખૂબ ગરમ ખોરાક અને પીણાંનું નિયમિત સેવન તેના મુખ્ય કારણોમાંનું એક હોઈ શકે છે. વિશ્વ આરોગ્ય સંસ્થા (WHO) ની કેન્સર સંશોધન એજન્સીએ પણ 65 ડિગ્રી સેલ્સિયસથી વધુ ગરમ પીણાંને “માનવ માટે સંભવિત કેન્સરજનક” ગણાવ્યા છે.
નિષ્ણાતોની સલાહ
ડૉક્ટરોએ લોકોને સલાહ આપી છે કે:
- ખૂબ ગરમ ખોરાક અથવા ચા-કોફી તરત ન પીવી
- ખાવાનું થોડું ઠંડું થયા પછી જ ખાવું
- ઉતાવળમાં ગરમ વસ્તુ ગળી ન જવી
- ગળામાં બળતરા કે દુખાવો થાય તો તરત તબીબી સલાહ લેવી
આ ઘટના એ વાતનો સ્પષ્ટ સંદેશ આપે છે કે “ગરમ ખોરાક વધુ સ્વાદિષ્ટ હોય છે” એવી માન્યતા ક્યારેક આરોગ્ય માટે ખતરનાક સાબિત થઈ શકે છે.
આ પણ વાંચો: LTTE ના આતંકવાદીઓએ રાજીવ ગાંધીની હત્યા કેમ કરી? 21 મેના બોમ્બ વિસ્ફોટની સંપૂર્ણ કહાની
