ભાજપ યુવા મોરચાની કારોબારી બેઠક મળી, સેવા પખવાડિયા અને યુવા કાર્યક્રમોની રૂપરેખા ઘડાઈ

ગાંધીનગર, 3 સપ્ટેમ્બર 2025: ભારતીય જનતા પાર્ટી (ભાજપ)ના પ્રદેશ યુવા મોરચાની કારોબારી બેઠક ગુજરાત ભાજપના સંગઠન મહામંત્રી રત્નાકરજીની અધ્યક્ષતામાં યોજાઈ. આ બેઠકમાં યુવા મોરચાના પ્રમુખ પ્રશાંત કોરાટ, પ્રદેશ ભાજપના મહામંત્રી રજની પટેલ, યુવા મોરચાના જિલ્લા પ્રમુખો, મહામંત્રીઓ અને પ્રદેશના હોદ્દેદારો ઉપસ્થિત રહ્યા. બેઠકમાં સપ્ટેમ્બર મહિનામાં યોજાનારા સેવા પખવાડિયા અને અન્ય યુવા કાર્યક્રમોની રૂપરેખા અંગે વિગતવાર ચર્ચા કરવામાં આવી હતી.

બેઠકમાં આગામી દિવસોમાં યુવા મોરચા દ્વારા ગ્રાઉન્ડ લેવલે કાર્યક્રમો યોજવા માટે રોડમેપ નક્કી કરવામાં આવ્યો. યુવા મોરચાના પ્રમુખ પ્રશાંત કોરાટે જણાવ્યું કે, પાર્ટી દ્વારા આપવામાં આવેલા કાર્યક્રમોને સફળ બનાવવા માટે યુવા મોરચા સંપૂર્ણ રીતે પ્રતિબદ્ધ છે. આ બેઠકમાં 11 સપ્ટેમ્બરે સ્વામી વિવેકાનંદના જીવન ચરિત્ર પર આધારિત વ્યાખ્યાનોનું આયોજન કોલેજોમાં કરવાનો નિર્ણય લેવાયો, જે યુવાનોમાં પ્રેરણા જગાવવાનો હેતુ ધરાવે છે.

આ ઉપરાંત, 17 સપ્ટેમ્બરે વડાપ્રધાન નરેન્દ્ર મોદીના જન્મદિવસ નિમિત્તે શરૂ થનારા સેવા પખવાડિયા અંગે પણ વિસ્તૃત ચર્ચા થઈ. 17 સપ્ટેમ્બરથી 2 ઓક્ટોબર સુધી યોજાનારા આ પખવાડિયા દરમિયાન વિવિધ સેવાકીય કાર્યક્રમોનું આયોજન કરવામાં આવ્યું છે. આ કાર્યક્રમોની શરૂઆત 17 સપ્ટેમ્બરે દરેક જિલ્લા કેન્દ્રોમાં બ્લડ ડોનેશન કેમ્પથી થશે, જે સમાજસેવાનું ઉત્તમ ઉદાહરણ બનશે.

બેઠકમાં એક અન્ય મહત્વના કાર્યક્રમની રૂપરેખા પણ ઘડાઈ, જેમાં આખા દેશમાં ‘મોદી યુવા મેરેથોન’નું આયોજન 75 સ્થળોએ કરવામાં આવશે. ગુજરાતમાં આ મેરેથોન 10 સ્થળોએ યોજાશે, જેમાં રાજ્યની 8 મહાનગરપાલિકાઓ ઉપરાંત વલસાડ અને આણંદનો પણ સમાવેશ થશે. આ મેરેથોન યુવાનોમાં ઉત્સાહ અને રાષ્ટ્રભક્તિ જગાવવાનો હેતુ ધરાવે છે.

આ પણ વાંચો: ૧૫મી ગુજરાત વિધાનસભાના સાતમાં સત્ર દરમિયાન કેટલા વિધેયક રજૂ કરાશે?