શુભમન ગિલને પણ બીસીસીઆઈએ આપ્યો ઝટકો, ફટકાર્યો રૂ.12 લાખનો દંડ, જાણો કેમ

અમદાવાદ, 20 એપ્રિલ : ઇન્ડિયન પ્રીમિયર લીગ (IPL) 2025 ની મેચ નંબર-35 માં, ગુજરાત ટાઇટન્સ (LSG) એ દિલ્હી કેપિટલ્સ (DC) ને 7 વિકેટે હરાવ્યું હતું. ગુજરાત ટાઇટન્સનો હીરો જોસ બટલર રહ્યો હતો જેણે અણનમ 97 રન બનાવ્યા હતા. બટલરની યાદગાર ઇનિંગના આધારે ગુજરાતે 4 બોલ બાકી રહેતા 204 રનનો લક્ષ્યાંક હાંસલ કર્યો હતો. આ જીત સાથે ગુજરાત ટાઇટન્સ પોઈન્ટ ટેબલમાં ટોપ પર આવી ગઈ છે. આ મેચ શનિવારે (19 એપ્રિલ) અમદાવાદના નરેન્દ્ર મોદી સ્ટેડિયમમાં રમાઈ હતી.

BCCIએ શા માટે શુભમન વિરુદ્ધ કાર્યવાહી કરી?

આ મેચ બાદ ભારતીય ક્રિકેટ કંટ્રોલ બોર્ડ (BCCI)એ ગુજરાત ટાઇટન્સના કેપ્ટન શુભમન ગિલ સામે કાર્યવાહી કરી છે. ધીમા ઓવર રેટ માટે શુભમન ગિલને 12 લાખ રૂપિયાનો દંડ ફટકારવામાં આવ્યો હતો. આ મેચમાં સાત રન બનાવીને રનઆઉટ થયેલો શુભમન ગિલ એવા કેપ્ટનોની યાદીમાં સામેલ થઈ ગયો છે જેમને સમાન દંડ ફટકારવામાં આવ્યો હતો.

આ યાદીમાં હાર્દિક પંડ્યા, રિયાન પરાગ, અક્ષર પટેલ, સંજુ સેમસન, રજત પાટીદાર અને અક્ષર પટેલ પહેલાથી જ પ્રવેશી ચૂક્યા છે. ભારતીય ક્રિકેટ કંટ્રોલ બોર્ડ (BCCI) એ એક રિલીઝમાં જણાવ્યું હતું કે, ‘ગુજરાત ટાઇટન્સના કેપ્ટન શુભમન ગિલને અમદાવાદના નરેન્દ્ર મોદી સ્ટેડિયમમાં ટાટા ઇન્ડિયન પ્રીમિયર લીગ (IPL) 2025ની દિલ્હી કેપિટલ્સ સામેની મેચ દરમિયાન ધીમો ઓવર રેટ જાળવવા બદલ દંડ ફટકારવામાં આવ્યો છે.’

રિલીઝમાં વધુમાં કહેવામાં આવ્યું છે કે, ‘ધીમા ઓવર-રેટને લગતી આઈપીએલ આચાર સંહિતાની કલમ 2.22 હેઠળ સીઝનનો આ તેમની ટીમનો પ્રથમ ગુનો હતો, તેથી શુભમન ગિલને 12 લાખ રૂપિયાનો દંડ ફટકારવામાં આવ્યો હતો.’

મેચ વિનિંગ ઇનિંગ્સ રમ્યા બાદ જોસ બટલરે કહ્યું, ‘હું બે પોઈન્ટ મેળવીને ખૂબ જ ખુશ છું. બેટિંગ કરવા માટે તે એક શાનદાર વિકેટ હતી, અમે રમતને ઊંડાણમાં લઈ જવાનો પ્રયાસ કર્યો અને આક્રમક શોટ રમવાની અમારી તકો પસંદ કરી. આ દરમિયાન અમે કેટલીક સારી ભાગીદારી કરી હતી. તમારે ફિટ રહેવું પડશે, દબાણ અને ગરમ હવામાનમાં સારું પ્રદર્શન કરવું પડશે.

આ પણ વાંચો :- ટ્રમ્પ ટેરિફની આડ અસર, આ કંપની કરવા જઈ રહી છે મોટી છટણી… 800 લોકોની યાદી તૈયાર!