રામ મંદિરના તમામ પૂજા સ્થળ ક્યાં સુધીમાં બનીને તૈયાર થઈ જશે? નૃપેન્દ્ર મિશ્રાએ જણાવ્યો પ્લાન

અયોધ્યા, તા. 29 એપ્રિલ, 2025: અયોધ્યામાં રામ મંદિરનું નિર્માણ આ વર્ષે 5 જૂન સુધીમાં પૂર્ણ થશે. શ્રી રામ જન્મભૂમિ તીર્થ ક્ષેત્રના નિર્માણ સમિતિના અધ્યક્ષ નૃપેન્દ્ર મિશ્રાએ આ માહિતી શેર કરી છે. આ સાથે, સંકુલમાં સ્થિત તમામ વિવિધ મંદિરો 5 જૂન અથવા તેના એક દિવસ પછી ભક્તો માટે ખોલવામાં આવશે.

મંદિરનું 99 ટકા કામ પૂર્ણ થઈ ગયું છે, પહેલો માળ અને બીજો માળ પણ પૂર્ણ થઈ ગયો છે. શિખર પરનું કામ પૂર્ણ થઈ ગયું છે. મંદિરનું તમામ બાંધકામ હવે લગભગ પૂર્ણ થઈ ગયું છે. અમારા મંદિરનું કામ 5 જૂનના રોજ પૂર્ણ થશે.

નૃપેન્દ્ર મિશ્રાએ કહ્યું કે મંદિર પરિસરમાં મહર્ષિ વાલ્મીકિ,  વશિષ્ઠ જી, વિશ્વામિત્ર, અહલ્યા બાઈ, નિષાદરાજ મહારાજ, શબરી માતા અને અગસ્ત્ય મુનિની મૂર્તિઓ સ્થાપિત કરવામાં આવી છે. આ બધાની પૂજા 5 જૂને રામ દરબાર સાથે કરવામાં આવશે. આ 7 મંદિરો પણ 5 જૂન પછી જાહેર જનતા માટે ખોલવામાં આવશે. રામ દરબાર અને મંદિર પરિસરમાં બનેલા 6 મંદિરોની પૂજા 5 જૂને કરવામાં આવશે. ચંપત રાય 5 જૂનના વિગતવાર કાર્યક્રમની જાહેરાત કરશે.

અયોધ્યામાં રામ મંદિરનું કામ પૂરજોશમાં ચાલી રહ્યું છે. મંદિર લગભગ બનીને તૈયાર થઈ ગયું છે. ત્યારે હવે આ મંદિરની શોભામાં વધારો કરવા માટે અમદાવાદમાંથી તૈયાર થયેલો ધ્વજ સ્તંભ પણ અયોધ્યા પહોંચી ચુક્યો છે અને આ સ્તંભ શુભ મુહૂર્ત વૈશાખ શુક્લ દ્વિતિયના સમયે લગાવવામાં આવ્યો છે. આ ધ્વજ સ્તંભ 42 ફુટ લાંબો છે, જેને આજે સવારે 6.30 કલાકે લગાવવાની તૈયારીઓ કરી લીધી હતી, જ્યારે 8 વાગ્યે સવારે આ ધ્વજ સ્તંભ અયોધ્યા રામ મંદિરના પટાંગણમાં લગાવવામાં આવ્યો છે.આ ધ્વજ સ્તંભ અમદાવાદમાં બનીને તૈયાર થયો છે. જેને અમદાવાદથી અયોધ્યા લઈ જવામાં આવ્યો હતો. ત્યાર બાદ તેની સ્થાપના કરવામાં આવી છે.

આ પણ વાંચોઃ મુખ્યપ્રધાન ભૂપેન્દ્ર પટેલે ચંડોળા તળાવ વિસ્તારમાં હાથ ધરાયેલી કામગીરીની સમીક્ષા કરી