ઈંડિયન રેલવેની શાનદાર શરુઆત: હવે ટ્રેનમાં ATM પણ જોવા મળશે, પૈસા ઉપાડવા માટે નીચે ઉતરવું પડશે નહીં

ATM in Train: ભારતીય રેલવે એક નવો ઈતિહાસ રચી દીધો છે. હવે મુસાફરોને મુસાફરી દરમ્યાન પૈસા ઉપાડવા માટે સ્ટેશન પર ઉતરવાની જરુર રહેશે નહીં. કારણ કે મુંબઈ-મનમાડ પંચવટી એક્સપ્રેસ દેશની પહેલી એવી ટ્રેન બની ગઈ છે, જેમાં એટીએમની સુવિધા આપવામાં આવી છે.

મુંબઈથી મનમાડ પંચવટી એક્સપ્રેસની ટ્રેન નંબર ૧૨૧૦૯ ના એસી ચેર કાર કોચમાં હવે ઓટોમેટેડ ટેલર મશીન (ATM) સ્થાપિત કરવામાં આવ્યું છે. આ સુવિધા બેંક ઓફ મહારાષ્ટ્ર દ્વારા પૂરી પાડવામાં આવે છે અને કોચના પાછળના ભાગમાં એક ક્યુબિકલમાં સ્થાપિત કરવામાં આવે છે, જ્યાં સામાન્ય રીતે એક નાની પેન્ટ્રી જગ્યા હોય છે.

મુસાફરી દરમિયાન જ રોકડ સુવિધા ઉપલબ્ધ રહેશે.

આ ATM મજબૂત શટર દરવાજાથી સુરક્ષિત છે, જેથી ટ્રેન ગતિમાં હોય ત્યારે પણ તેનો ઉપયોગ સુરક્ષિત અને સરળતાથી થઈ શકે. આ સુવિધા ખાસ કરીને એવા મુસાફરો માટે ફાયદાકારક રહેશે જેઓ અચાનક રોકડની જરૂરિયાતને કારણે સ્ટેશન પર ઉતરી શકતા નથી અથવા દૂરના વિસ્તારોમાં મુસાફરી કરી રહ્યા છે.

આ ટેકનિકલ ફેરફાર કેવી રીતે કરવામાં આવ્યો?

આ એટીએમ મનમાડ રેલ્વે વર્કશોપ ખાતે ખાસ ટેકનિકલ અને માળખાકીય ફેરફારો સાથે સ્થાપિત કરવામાં આવ્યું છે. ટ્રેનની ગતિ અને ધક્કા છતાં મશીન સરળતાથી કામ કરી શકે તે માટે કોચમાં વધારાના વિદ્યુત આધાર અને જરૂરી માળખાકીય ફેરફારો કરવામાં આવ્યા હતા.

રેલ્વે અધિકારીઓનો પ્રતિભાવ

આ પહેલની પુષ્ટિ રેલવેના મુખ્ય જનસંપર્ક અધિકારી ડૉ. સ્વપ્નિલ નીલા દ્વારા કરવામાં આવી હતી. તેમણે કહ્યું, “આજે સવારે ટ્રેન મુંબઈ પહોંચી, જેમાં એક એટીએમ કોચ જોડાયેલ હતો. આ એક અનોખી પહેલ છે અને અમને આશા છે કે આ સુવિધા મુસાફરો માટે ખૂબ ઉપયોગી સાબિત થશે.”

પંચવટી એક્સપ્રેસ

પંચવટી એક્સપ્રેસ એ દૈનિક સુપરફાસ્ટ ટ્રેન છે જે મુંબઈના છત્રપતિ શિવાજી મહારાજ ટર્મિનસ (CSMT) થી મનમાડ જંક્શન (MMR) સુધી દોડે છે. મુસાફરીનો સમય આશરે 4 કલાક 35 મિનિટનો છે. આ ટ્રેનમાં દરરોજ હજારો મુસાફરો મુસાફરી કરે છે, અને હવે આ સુવિધા તેમના માટે એક નવી સુવિધા લઈને આવી છે.

આ પણ વાંચો: વાનખેડે સ્ટેડિયમમાં ‘હિટમેન’નું નામ ગૂંજશે, રોહિત શર્માના નામ પર સ્ટેડિયમમાં સ્ટેન્ડ બનશે