ગુજરાતમાં નકલી નોટ છાપવાના કૌભાંડનો પર્દાફાશ, યોગગુરુ પ્રદીપ જોટાંગિયા સહિત 7 આરોપીઓની ધરપકડ

Fake Currency Scam: અમદાવાદ ક્રાઈમ બ્રાન્ચે એક મોટા નકલી નોટ કૌભાંડનો પર્દાફાશ કર્યો છે. 19 માર્ચ 2026ના રોજ અમરાઈવાડી વિસ્તારમાં ટોરેન્ટ પાવર પાસે એક વ્હાઇટ ટોયોટા ફોર્ચ્યુનર કાર (નંબર GJ-05-RS-5252)ને અટકાવી તપાસ કરતાં તેમાંથી રૂ. 2.10 કરોડની નકલી 500ની નોટો (લગભગ 42,000 નોટો) જપ્ત કરવામાં આવી. કાર પર “Shri Satyam Yog Foundation, Recognized by AYUSH Mantralaya, Government of India” લખેલું હતું, જેનો દુરુપયોગ નકલી નોટોની હેરાફેરી માટે કરવામાં આવતો હતો.

આ કારમાંથી પ્રદીપ જોટાંગિયા ઉર્ફે પ્રદીપ ગુરુજી અને એક મહિલા સહિત 6 આરોપીઓની ધરપકડ કરવામાં આવી. ત્યારબાદ સુરતમાં કરેલી રેડમાં વધુ એક આરોપીની ધરપકડ થઈ અને એમ કુલ 7 આરોપીઓ ઝડપાયા. સુરતમાંથી વધુ રૂ. 28 લાખની નકલી નોટો, પ્રિન્ટિંગ મશીન, લેપટોપ, પેપર કટર, કરન્સી કાઉન્ટિંગ મશીન અને ચીનમાંથી આયાત કરેલા સિક્યુરિટી થ્રેડવાળા પેપર (16 રીમ) જપ્ત થયા. આ આખા કૌભાંડમાં કુલ 2.38 કરોડની નકલી નોટો જપ્ત થઈ છે.

નકલી નોટોનું પ્રિન્ટિંગ સુરતના એક રહેણાંક વિસ્તારમાં શ્રી સત્યમ યોગ ફાઉન્ડેશન આશ્રમ સાથે જોડાયેલા સ્થળે થતું હતું. આરોપીઓ છેલ્લા 4-6 મહિનાથી આ ગુનો આચરી રહ્યા હતા. તેઓએ ચીનમાંથી ઓનલાઈન વોટરમાર્ક અને RBI માર્કિંગવાળું પેપર મંગાવ્યું હતું. તેઓ ડિઝાઇનને વધુ અસલી બનાવવા માટે AI ટૂલ્સ જેમ કે ChatGPT અને ફોટો એડિટિંગ સોફ્ટવેરનો ઉપયોગ કરતા હતા. એક A4 પેપર પરથી ત્રણ નોટો છાપવામાં આવતી હતી.

પ્રદીપ ગુરુજી શ્રી સત્યમ યોગ ફાઉન્ડેશનના સંચાલક છે અને યોગ તથા આધ્યાત્મિક કાર્યક્રમો ચલાવે છે. અગાઉ રાજકોટમાં પણ યોગ ક્લાસ ચલાવતા હતા. અન્ય આરોપીઓમાં મુકેશ ઠુમ્મર (મુખ્ય પ્રિન્ટિંગ સૂત્રધાર), અશોક માવાણી, રમેશ બલાર, દિવ્યેશ રાણા, ભરત કાકડીયા અને એક મહિલા (કટારગામ, સુરત)નો સમાવેશ થાય છે. તેઓ પોતાને ગુરુજીના શિષ્યો તરીકે ઓળખાવતા હતા.

પોલીસ તપાસમાં પ્રદીપ ગુરુજીએ કબુલ્યું કે “આશ્રમમાં લોકોની સારવાર અને સેવા માટે પૈસાની અછત હતી, તેથી અમે પોતે જ પૈસા બનાવ્યા.” પરંતુ પોલીસે આને નકારી કાઢ્યું અને કહ્યું કે આ દેશની આર્થિક વ્યવસ્થાને નુકસાન પહોંચાડતો ગંભીર ગુનો છે. આરોપીઓએ પહેલી મોટી ડીલમાં 2 કરોડની નકલી નોટો 66 લાખમાં વેચવાની તૈયારી કરી હતી.

નમૂનાઓ RBI અને FSLમાં મોકલવામાં આવ્યા છે. તપાસ ચાલુ છે – ચીન કનેક્શન, ક્રિપ્ટો પેમેન્ટ, એજન્ટ્સનું નેટવર્ક અને વધુ સંભવિત લિંક્સની શોધખોળ થઈ રહી છે. આ કેસ ગુજરાતમાં ખાસ કરીને અમદાવાદ-સુરત વિસ્તારમાં ચર્ચાનો વિષય બન્યો છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

આ પણ વાંચો: Ahmedabad: BRTS ટ્રેકમાં ભયાનક અકસ્માત: મોપેડ ચાલકને બસે 60 ફૂટ સુધી ઢસડ્યો, ગંભીર ઈજાઓ