Surat Jewellers Theft: સુરત શહેરમાં ફરી એકવાર મોટી ચોરીની ઘટના સામે આવી છે. પાંડેસરા વિસ્તારમાં આવેલી એક જ્વેલર્સની દુકાનને તસ્કરોએ નિશાન બનાવીને લાખો રૂપિયાના દાગીના અને કિંમતી સામાનની ચોરી કરી છે. ચોરોએ દુકાનનું શટર તોડવાને બદલે છતનું પતરું કાપીને અંદર પ્રવેશ કર્યો હતો અને અંદાજે રૂ.30 લાખથી વધુનો મુદ્દામાલ લઈને ફરાર થઈ ગયા હતા. ઘટનાને પગલે સમગ્ર વિસ્તારમાં ચકચાર મચી ગઈ છે અને વેપારીઓમાં ભયનો માહોલ જોવા મળી રહ્યો છે.
મધરાતે તસ્કરોનો ખેલ, છતમાંથી દુકાનમાં ઘૂસ્યા
મળતી માહિતી મુજબ, પાંડેસરા વિસ્તારના ગીતા નગર પાસે આવેલી ક્રિષ્ના જ્વેલર્સ નામની દુકાનમાં આ ચોરી થઈ હતી. તસ્કરોએ રાત્રિના સમયે દુકાનને ટાર્ગેટ બનાવી હતી. આશરે રાત્રિના 2 વાગ્યાના સમયે ચોરોએ દુકાનની ઉપર આવેલી છતનું પતરું કાપ્યું હતું.
ચોરોએ ખાસ કાળજી રાખીને એવી રીતે પતરું કાપ્યું હતું કે આસપાસના લોકોને કોઈ અવાજ ન સંભળાય. ત્યારબાદ તેઓ છતના રસ્તે દુકાનની અંદર ઉતર્યા હતા અને દુકાનમાં રાખેલા ચાંદીના દાગીના તેમજ અન્ય કિંમતી વસ્તુઓની ચોરી કરી હતી.
દુકાનમાંથી ચાંદીના દાગીના અને મૂર્તિઓ સહિત મોટો માલ ગાયબ
દુકાનના માલિક મનોજભાઈ સોનીના જણાવ્યા પ્રમાણે, ચોરો દુકાનમાંથી વિવિધ પ્રકારના ચાંદીના દાગીના, બ્રેસલેટ, ચાંદીના વાસણો, ગ્લાસ, મૂર્તિઓ, કંદોરા તેમજ 925 સિલ્વરની અનેક વસ્તુઓ લઈ ગયા છે. આ ઉપરાંત ગ્રાહકો દ્વારા ગીરવે મૂકવામાં આવેલો કિંમતી સામાન પણ ચોરાઈ ગયો હોવાનું જાણવા મળ્યું છે. પ્રાથમિક અંદાજ પ્રમાણે લગભગ 15 કિલો જેટલો સામાન ચોરી થયો છે, જેની કિંમત આશરે રૂ.30 લાખથી વધુ હોવાનું સામે આવ્યું છે. હાલ પોલીસ દ્વારા દુકાનના સ્ટોક, વેચાણ અને ઉપલબ્ધ બિલની તપાસ કરવામાં આવી રહી છે. તપાસ પૂર્ણ થયા બાદ ચોરી થયેલા માલની ચોક્કસ કિંમત બહાર આવશે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
ચોરો પુરાવા પણ લઈ ગયા, CCTVનું DVR ગાયબ
ચોરીને અંજામ આપ્યા બાદ તસ્કરો માત્ર દાગીના જ નહીં પરંતુ દુકાનમાં લગાવેલા સીસીટીવી કેમેરાનું DVR પણ લઈ ગયા હતા. પોલીસના પ્રાથમિક અનુમાન પ્રમાણે, ચોરોએ પોતાની ઓળખ છુપાવવા અને પુરાવા ન મળે તે માટે DVR સાથે લઈ જવાની યોજના બનાવી હતી. હવે પોલીસ આસપાસના વિસ્તારોમાં આવેલા અન્ય સીસીટીવી કેમેરાના ફૂટેજની તપાસ કરી રહી છે, જેથી ચોરોના આવવા-જવાનો રસ્તો અને તેમની ઓળખ મળી શકે.
ચાર વર્ષમાં આ જ દુકાન ચોથી વખત તસ્કરોના નિશાને
દુકાન માલિકે જણાવ્યું કે, આ પ્રથમ વખત નથી કે તેમની દુકાનને ચોરોએ નિશાન બનાવી હોય. અગાઉ પણ અનેક વખત ચોરીનો પ્રયાસ કરવામાં આવ્યો હતો. આશરે છ મહિના પહેલા પણ ચોરોએ દુકાનમાં પ્રવેશ કરવાનો પ્રયાસ કર્યો હતો, પરંતુ તેઓ સફળ થયા નહોતા. આ સિવાય વર્ષ 2023-24 દરમિયાન પણ ચોમાસાની ઋતુમાં દુકાનનું શટર ઊંચું કરીને ચોરી કરવાનો પ્રયાસ કરવામાં આવ્યો હતો. ત્યારબાદ ડિસેમ્બર 2025માં પણ ચોરોએ હાથ અજમાવ્યો હતો. આ રીતે ચાર વર્ષમાં આ જ દુકાનમાં ચોરીનો આ ચોથો પ્રયાસ હતો, જેમાં આ વખતે તસ્કરો સફળ રહ્યા છે.
અગાઉ ફરિયાદ ન લેવાઈ હોવાનો દુકાનદારનો આક્ષેપ
દુકાન માલિક મનોજભાઈ સોનીએ જણાવ્યું કે, અગાઉ જ્યારે ચોરીના પ્રયાસ થયા હતા ત્યારે પોલીસનો સંપર્ક કરવામાં આવ્યો હતો. જોકે, દુકાન પતરાના શેડમાં હોવાનું કહીને તે સમયે ફરિયાદ નોંધવામાં આવી ન હોવાનું તેમણે જણાવ્યું હતું. હવે મોટી ચોરી થયા બાદ પોલીસે તપાસ શરૂ કરી છે અને ચોરી થયેલા માલના બિલ તથા અન્ય વિગતો માગવામાં આવી છે.
પાંડેસરા વિસ્તારમાં વધતી ચોરીથી વેપારીઓમાં રોષ
સ્થાનિક વેપારીઓના જણાવ્યા મુજબ, પાંડેસરા અને આસપાસના વિસ્તારોમાં છેલ્લા કેટલાક મહિનાઓમાં ચોરીના બનાવોમાં વધારો થયો છે. માત્ર સાડા છથી સાત મહિનાના સમયગાળામાં અનેક મોટી ચોરીની ઘટનાઓ સામે આવી હોવાનું વેપારીઓનું કહેવું છે. વારંવાર દુકાનોને નિશાન બનાવાતા વેપારીઓમાં સુરક્ષાને લઈને ચિંતા વધી રહી છે. વેપારીઓએ રાત્રિના સમયે પોલીસ પેટ્રોલિંગ વધારવાની માંગ કરી છે.
પોલીસ તપાસમાં લાગી, ચોરોને ઝડપી પાડવાના પ્રયાસ
ઘટનાની જાણ થતાં પાંડેસરા પોલીસનો કાફલો સ્થળ પર પહોંચ્યો હતો. પોલીસે સ્થળ તપાસ કરીને પુરાવા એકત્રિત કરવાની કાર્યવાહી શરૂ કરી છે. પોલીસ અધિકારીઓના જણાવ્યા અનુસાર, ચોરોએ છતના પતરાને કાપીને દુકાનમાં પ્રવેશ કર્યો હતો. હાલ ચોરીનો ગુનો નોંધવાની અને ટેક્નિકલ સર્વેલન્સના આધારે તપાસ આગળ વધારવાની પ્રક્રિયા ચાલી રહી છે. પોલીસ હવે ચોરોની ઓળખ મેળવવા માટે CCTV ફૂટેજ, મોબાઇલ લોકેશન અને અન્ય પુરાવાના આધારે તપાસ કરી રહી છે.
આ પણ વાંચો: રોહિત શેટ્ટીને ફરી ખંડણીની ધમકી, લોરેન્સ બિશ્નોઈ ગેંગના નામે ધમકીભર્યો ઓડિયો મળ્યો
