‘રેખાની મરજી વિના Kiss કરવી ખોટી’, વિવાદિત સીન પર દિગ્ગજ એક્ટરે વર્ષો બાદ તોડી ચુપ્પી
Rekha Biswajit Kissing Controversy: બોલિવૂડની દિગ્ગજ અભિનેત્રી રેખા અને વેટરન એક્ટર બિસ્વજીત ચેટર્જી સાથે જોડાયેલો દાયકાઓ જૂનો કિસિંગ વિવાદ એકવાર ફરી ચર્ચામાં આવ્યો છે. આ વખતે આ સંવેદનશીલ મામલા પર બિસ્વજીતની દીકરી અને અભિનેત્રી પલ્લવી ચેટર્જીએ ખુલીને પોતાનો પક્ષ રાખ્યો છે.
પલ્લવીએ સ્પષ્ટ શબ્દોમાં જણાવ્યું કે, જો તે સમયે રેખાને જણાવ્યા વગર આવો કોઈ સીન શૂટ કરવામાં આવ્યો હતો, તો તે કોઈપણ નાની ઉંમરની છોકરી માટે અત્યંત પરેશાન કરનારો અને માનસિક સદમા સમાન અનુભવ રહ્યો હશે. તેમણે એ પણ સ્વીકાર્યું કે તેમના પિતાએ કાં તો તે સીન કરવાની ના પાડી દેવી જોઈતી હતી અથવા તો સીન કરતા પહેલા રેખાની મંજૂરી લેવી જોઈતી હતી.
’15 વર્ષની છોકરી માટે તે બહુ મોટો ઝટકો હતો’
એક ઈન્ટરવ્યુમાં પલ્લવી ચેટર્જીએ જણાવ્યું હતું કે, તે જમાનામાં ઘણા નિર્દેશકો કલાકારોને સીનની પૂરેપૂરી માહિતી આપતા નહોતા, કારણ કે તેઓ કેમેરા પર પાત્રના અસલી હાવભાવ (Real Reactions) કેદ કરવા માંગતા હતા.
પલ્લવીએ કહ્યું કે, “જો કોઈ છોકરીને જણાવ્યા વગર તેની સાથે મિનિટો સુધી કિસિંગ સીન ફિલ્માવવામાં આવે, તો સ્વાભાવિક છે કે તે તેના માટે ટ્રોમેટિક (માનસિક આઘાતજનક) જ હોય. રેખા તે સમયે ખૂબ જ નાની ઉંમરની હતી. જ્યારે તમે નાની ઉંમરના હોવ અને તમારી સાથે કંઈક એવું બને જેની તમે અપેક્ષા ન રાખી હોય, ત્યારે તમે તાત્કાલિક તેનો વિરોધ પણ નથી કરી શકતા.”
પલ્લવીનું માનવું છે કે જો આવો કોઈ સીન શૂટ થયો હતો, તો તે ફિલ્મના ડાયરેક્ટરની મંજૂરી અને પ્લાનિંગ વગર શક્ય જ ન હોઈ શકે.
‘આના માટે માત્ર પિતા એકલા જવાબદાર નહોતા’
જો કે, પલ્લવીએ આ મામલે પોતાના પિતાનો બચાવ પણ કર્યો હતો. તેણે જણાવ્યું કે બિસ્વજીતે પોતાના લાંબા કરિયરમાં ઘણી બધી અભિનેત્રીઓ સાથે કામ કર્યું છે, પરંતુ ક્યારેય કોઈના તરફથી તેમની સામે આવી ફરિયાદ નથી આવી.
પલ્લવીના જણાવ્યા મુજબ, “મારા પિતા મહિલાઓનું ખૂબ સન્માન કરતા હતા. જો કોઈ મહિલા રૂમમાં આવતી તો તેઓ ઊભા થઈને તેમનું સ્વાગત કરતા હતા. મને નથી લાગતું કે જે કંઈ પણ થયું, તેમાં માત્ર મારા પિતા જ સામેલ હતા.” તેણે આગળ ઉમેર્યું કે સંભવ છે કે ડાયરેક્ટરે તેના પિતાને એવું કહ્યું હોય કે કેમેરા અને સીનની ડિમાન્ડ માટે આવું કરવું ખૂબ જરૂરી છે, તેથી જ તેમણે તે સીન કર્યો હોય.
‘ગમે તે હોય, પણ જે થયું તે ખોટું જ હતું’
પલ્લવીએ કોઈ પણ ખચકાટ વિના સ્વીકાર્યું કે કારણ ભલે ગમે તે હોય, પણ જે થયું તે સંપૂર્ણપણે ખોટું હતું. તેણે કહ્યું, “આ બિલકુલ ખોટું હતું, પછી ભલે તે મારા પિતાએ કર્યું હોય કે અન્ય કોઈએ. તેમણે કાં તો ડાયરેક્ટરને મનાઈ કરી દેવી જોઈતી હતી અથવા સીન પહેલા રેખાની સંમતિ લેવી જોઈતી હતી. રેખા આ સીન માટે તૈયાર નહોતી અને એટલી નાની ઉંમરની છોકરી માટે આ ચોક્કસપણે ચોંકાવનારો અનુભવ હતો.”
બંને પરિવારો વચ્ચે ખૂબ જ ગાઢ સંબંધો હતા
પલ્લવીએ એક રસપ્રદ ખુલાસો કરતા જણાવ્યું કે તે સમયે બંને પરિવારો વચ્ચે કૌટુંબિક સંબંધો હતા. રેખા તેમના ઘરે આવતી-જતી હતી અને તેઓ બાળપણમાં સાથે રમતા પણ હતા. કદાચ આ જ કારણોસર આ ઘટના રેખા માટે વધુ દુઃખદ રહી હશે, કારણ કે તેઓ બિસ્વજીતના પરિવારને પોતાના માનતા હતા.
શું હતો આખો વિવાદ?
આ વિવાદ વર્ષો જૂની ફિલ્મ ‘અંજાના સફર’ ના શૂટિંગ સમયનો છે. યાસિર ઉસ્માનના પુસ્તક ‘રેખા: ધ અનટોલ્ડ સ્ટોરી’ માં દાવો કરાયો છે કે શૂટિંગ વખતે ડાયરેક્ટર રાજા નવાથે રેખાના અસલી રિએક્શન લેવા માંગતા હોવાથી તેમને આ સીન વિશે અગાઉથી કશું જ જણાવ્યું નહોતું. જેમ કેમેરા રોલ થયો, બિસ્વજીતે રેખાને પકડીને કિસ કરવાનું શરૂ કરી દીધું અને શૂટિંગ ચાલુ રહ્યું. આ ઘટનાથી રેખા ખૂબ જ આહત થઈ ગઈ હતી.
બાદમાં બિસ્વજીતે પણ સ્પષ્ટતા કરી હતી કે આ ડાયરેક્ટરનો આઈડિયા હતો અને તેમણે માત્ર સૂચનાઓનું પાલન કર્યું હતું. લાંબા સમય સુધી સેન્સર બોર્ડમાં અટવાયા બાદ આ ફિલ્મ આખરે 1979માં ‘દો શિકારી’ નામે રિલીઝ થઈ હતી, પરંતુ બોક્સ ઓફિસ પર ફ્લોપ રહી હતી.
આ પણ વાંચોઃ તાંબા-પીતળના વાસણ કાળા પડી ગયા છે? રસોડાની આ 4 વસ્તુઓથી ઘસ્યા વગર ચમકાવો
અમારી WhatsApp ચેનલમાં જોડાવા આ લિંક પર ક્લીક કરો
