Railway New Rules: 1 માર્ચથી બદલાઈ જશે ટ્રેનની મુસાફરી, જાણો પાંચ મોટા ફેરફાર

• ભારતીય રેલ્વે 1 માર્ચ, 2026થી તેની ટિકિટિંગ સિસ્ટમ અને મુસાફરીના નિયમોમાં કેટલાક ક્રાંતિકારી ફેરફારો કરવા જઈ રહી છે

Utility News: જો તમે વારંવાર ટ્રેનમાં મુસાફરી કરો છો, તો આ સમાચાર તમારા માટે ખૂબ જ મહત્ત્વપૂર્ણ છે. ભારતીય રેલવે 1 માર્ચ, 2026થી તેની ટિકિટિંગ સિસ્ટમ અને મુસાફરીના નિયમોમાં કેટલાક ક્રાંતિકારી ફેરફારો કરવા જઈ રહી છે. જો તમે વારંવાર ટ્રેનમાં મુસાફરી કરો છો, તો આ અપડેટ્સ તમારે જાણવી અગત્યની છે, જેથી તમને સ્ટેશન પર કોઈ સમસ્યાનો સામનો ન કરવો પડે. 1 માર્ચથી અમલમાં આવનારા મુખ્ય ફેરફારોનું આ છે લિસ્ટ

1 માર્ચથી કયા રેલવે નિયમો બદલાઈ રહ્યા છે?

UTS એપ બંધ થશે, હવે RailOne સુપર એપનો યુગ

સૌથી મોટો ફેરફાર અનરિઝર્વ્ડ (જનરલ) અને પ્લેટફોર્મ ટિકિટ અંગે છે. 1 માર્ચથી જૂની UTS On Mobile એપ સંપૂર્ણપણે બંધ થઈ જશે. હવે જનરલ ટિકિટ, પ્લેટફોર્મ ટિકિટ અને માસિક સીઝન ટિકિટ (MST) માટે તમારે RailOne એપનો ઉપયોગ કરવો પડશે. આ સુપર એપમાં, તમે ફક્ત જનરલ ટિકિટ બુક કરી શકશો નહીં, પરંતુ રિઝર્વેશન, લાઈવ ટ્રેન સ્ટેટસ અને લોકેશન જેવી સુવિધાઓ પણ એક જ જગ્યાએ ઉપલબ્ધ હશે.

ટિકિટ બુકિંગ માટે આધાર ફરજિયાત

રેલવે ટિકિટના કાળાબજારને રોકવા માટે નિયમો વધુ કડક બનાવવામાં આવ્યા છે. હવે IRCTC અથવા RailOne એપ દ્વારા ટિકિટ બુક કરવા માટે આધાર વેરિફિકેશન ફરજિયાત રહેશે. વધુમાં બુકિંગના પહેલા 30 મિનિટમાં એજન્ટો દ્વારા ટિકિટ બુકિંગ પર પ્રતિબંધ રહેશે, જેથી સામાન્ય મુસાફરો પહેલા કન્ફર્મ ટિકિટ મેળવી શકે.

વેઇટિંગ લિસ્ટના નિયમો કડક બનાવવા

ભીડ અને સલામતીની ચિંતાઓને ધ્યાનમાં રાખીને રેલવેએ વેઈટિંગ ટિકિટ ધારકો માટે નિયમો કડક કર્યા છે. હવે ફક્ત કન્ફર્મ અથવા RAC ટિકિટ ધરાવતા મુસાફરો જ સ્લીપર અને બધા AC કોચમાં ચઢી શકશે. જો ચાર્ટ તૈયાર થયા પછી પણ તમારી ટિકિટ વેઈટિંગ લિસ્ટ (WL) પર રહેશે, તો તમે તે રિઝર્વ્ડ કોચમાં મુસાફરી કરી શકશો નહીં. આવા મુસાફરોને હવે કોચમાં ચઢવાની મંજૂરી આપવામાં આવશે નહીં.

લગેજ પર ભારે દંડ

ટ્રેનોમાં ભારે સામાન લઈ જવો હવે મોંઘુ સાબિત થઈ શકે છે. જો તમે વર્ગવાર મર્યાદા કરતાં વધુ સામાન લઈ જતા પકડાઈ જાઓ છો, તો તમને સામાન્ય દર કરતાં છ ગણો દંડ ફટકારવામાં આવશે. રેલવે હવે સામાન નિયંત્રણો અંગે વધુ કડક બન્યું છે.

મુસાફરીની તારીખો બદલવી સરળ બનશે

બીજા સારા સમાચાર એ છે કે હવે કન્ફર્મ ટિકિટ પર મુસાફરીની તારીખો બદલવી સરળ થઈ ગઈ છે. મુસાફરો તેમની કન્ફર્મ ટિકિટ ઓનલાઈન બદલી શકશે. કોઈ વધારાનો કેન્સલેશન કે સર્વિસ ચાર્જ લાગશે નહીં. ફક્ત ભાડામાં તફાવત ચૂકવવાનો રહેશે. આ સુવિધા સીટની ઉપલબ્ધતા પર નિર્ભર રહેશે.

બોર્ડિંગ પોઈન્ટમાં ફેરફારની સુવિધા

મુસાફરો હવે ચાર્ટ તૈયાર કર્યા પછી પણ આગામી ચાર્ટ તૈયાર ન થાય ત્યાં સુધી તેમની ટ્રેનનો બોર્ડિંગ પોઈન્ટ બદલી શકશે. અગાઉ આ સુવિધા ફક્ત પહેલો ચાર્ટ તૈયાર ન થાય ત્યાં સુધી જ ઉપલબ્ધ હતી.

મુસાફરી કરતા પહેલા શું કરવું?

• તમારા મોબાઇલ પર RailOne એપ ડાઉનલોડ કરો અને તેને તમારા આધાર સાથે લિંક કરો.
• ભારે સામાન લઈ જવાનું ટાળો અથવા અગાઉથી તેના માટે ચૂકવણી કરો.
• ફક્ત કન્ફર્મ અથવા RAC ટિકિટ ધરાવતા રિઝર્વ્ડ કોચમાં જ પ્રવેશ કરો.

આ પણ વાંચોઃ માર્ચમાં એન્ટરટેઈન્મેન્ટનો ભરપૂર ડોઝ, Dhurandhar 2, Toxic ઉપરાંત આ ફિલ્મો પણ આવશે