પટનામાં શિક્ષક ઉમેદવારો પર લાઠીચાર્જ, પોલીસે રસ્તા પર દોડાવી-દોડાવીને માર માર્યો

Patna TRE-4 Protest: પટનામાં શિક્ષક ભરતી પરીક્ષા (TRE-4) મુદ્દે ઉમેદવારોનો રોષ શુક્રવારે રસ્તા પર ફાટી નીકળ્યો. હજારોની સંખ્યામાં ઉમેદવારો પટના કોલેજથી બિહાર પબ્લિક સર્વિસ કમિશન (BPSC) કાર્યાલય સુધી માર્ચ કાઢી રહ્યા હતા. જેમ જ પ્રદર્શનકારીઓ જેપી ગોલામ્બર નજીક પહોંચ્યા, ત્યારે પોલીસે બેરિકેડિંગ કરીને તેમને રોકવાનો પ્રયાસ કર્યો. આ દરમિયાન જ્યારે ઉમેદવારોએ બેરિકેડ હટાવવાનો પ્રયાસ કર્યો, ત્યારે પોલીસે ભીડ પર લાઠીચાર્જ કર્યો, તેમને વિખેર્યા. આ ઘટનામાં અનેક વિદ્યાર્થીઓને ઇજાઓ પહોંચી હોવાનું જાણવા મળ્યું છે.

ઉમેદવારોનો આરોપ છે કે તેઓ લાંબા સમયથી TRE-4ની જાહેરાતની રાહ જોઈ રહ્યા છે, પરંતુ સરકાર સતત તેને ટાળી રહી છે. ઘણા વિદ્યાર્થીઓએ જણાવ્યું કે તેઓ જમીન ગીરવે મૂકીને અને લોન લઈને તૈયારી કરી રહ્યા છે, પરંતુ ભરતી પ્રક્રિયામાં વિલંબને કારણે તેમનું ભવિષ્ય જોખમમાં મુકાયું છે. વિદ્યાર્થીઓએ સરકાર સમક્ષ વહેલી તકે ભરતીની જાહેરાત બહાર પાડવાની માંગ ફરી એકવાર ઉઠાવી છે.

વિદ્યાર્થીઓનું કહેવું છે કે તેમને ગેરમાર્ગે દોરવામાં આવી રહ્યા છે. તેમણે યાદ અપાવ્યું કે BPSC ના પરીક્ષા નિયામકે 16 એપ્રિલે જણાવ્યું હતું કે TRE-4ની જાહેરાત ત્રણથી ચાર દિવસમાં બહાર પાડવામાં આવશે અને અરજી પ્રક્રિયા 25-26 એપ્રિલથી શરૂ થશે. પરંતુ હવે 8 મે સુધી પણ કોઈ સત્તાવાર સૂચના જાહેર કરવામાં આવી નથી, જેના કારણે વિદ્યાર્થીઓમાં રોષ સતત વધી રહ્યો છે.

46,595 જગ્યાઓ માટે શિક્ષકોની ભરતીનો પ્રસ્તાવ

TRE-4 હેઠળ કુલ 46,595 શિક્ષકોની ભરતી કરવાનો પ્રસ્તાવ છે. આ માટેનો પ્રસ્તાવ ફેબ્રુઆરીમાં જ BPSCને મોકલવામાં આવ્યો હતો, જેને બાદમાં શિક્ષણ વિભાગે સુધારીને વાર્ષિક કેલેન્ડરમાં સામેલ કર્યો હતો. સંભવિત કાર્યક્રમ અનુસાર પરીક્ષા 22 થી 27 સપ્ટેમ્બર 2026 દરમિયાન યોજાઈ શકે છે અને તેનું પરિણામ નવેમ્બર મહિનામાં જાહેર થવાની શક્યતા છે.

આ ભરતી પ્રક્રિયામાં પ્રથમ વખત ડોમિસાઇલ નીતિ લાગુ કરવામાં આવશે. ધોરણ 1 થી 12 સુધીના શિક્ષકો ઉપરાંત વિવિધ કલ્યાણ વિભાગોમાં પણ નિમણૂકો કરવામાં આવશે. ગયા બે વર્ષ દરમિયાન TRE-1, TRE-2 અને TRE-3 દ્વારા અંદાજે 2.27 લાખ શિક્ષકોની ભરતી કરવામાં આવી ચૂકી છે.

આ પણ વાંચો: ત્રણ દાવેદારો વચ્ચે ભારે ખેંચતાણ, કેરળના આગામી CM બની શકે કેસી વેણુગોપાલ