નેપાળમાં રાજકીય ઉથલપાથલ વચ્ચે CJIનું નિવેદન, કહ્યું- ‘અમને અમારા બંધારણ પર ગર્વ…’
નવી દિલ્હીઃ 10 સપ્ટેમ્બર, 2025: CJI Gavai on Indian Constitution: ભારતના પાડોશી દેશ નેપાળમાં ઉથલપાથલ મચી ગઈ છે. ભારતના મુખ્ય ન્યાયાધીશ (CJI) બી. આર ગવઈએ નેપાળની પરિસ્થિતિ પર ચિંતા વ્યક્ત કરી. 5 ન્યાયાધીશોની બંધારણીય ખંડપીઠે રાષ્ટ્રપતિ અને રાજ્યપાલોના અધિકારક્ષેત્ર સંબંધિત મુદ્દા પર સુનાવણી કરી રહી હતી, જે દરમિયાન CJI એ કહ્યું કે અમને અમારા બંધારણ પર ગર્વ છે, જુઓ અમારા પડોશી દેશોમાં શું થઈ રહ્યું છે. અમે નેપાળમાં પણ પરિસ્થિતિ જોઈ છે. ન્યાયાધીશ વિક્રમ નાથે એમ પણ કહ્યું કે, બાંગ્લાદેશમાં પણ આવી જ પરિસ્થિતિ ઊભી થઈ છે.
ચીફ જસ્ટિસ ગવઈની નેપાળ મુલાકાત
નોંધનીય છે કે, ગયા અઠવાડિયે ચીફ જસ્ટિસ બી.આર ગવઈ નેપાળની મુલાકાતે ગયા હતા. ત્યાં તેમણે નેપાળ સુપ્રીમ કોર્ટના ચીફ જસ્ટિસ પ્રકાશ માનસિંહ રાઉતને મળ્યા હતા. આ ઉપરાંત, તેમણે ભગવાન બુદ્ધના જન્મસ્થળ લુમ્બિનીની પણ મુલાકાત લીધી હતી અને દીપ પ્રાગટ્યથી શાંતિની પ્રાર્થના કરી હતી.
નેપાળમાં વિરોધ
વડાપ્રધાન કેપી ઓલીની સરકારને દૂર કર્યા પછી, નેપાળમાં યુવા વિરોધીઓ હવે રાજકીય અને સામાજિક સુધારાઓની માંગ કરી રહ્યા છે. આ વિરોધીઓ વ્યાપક વહીવટી સુધારાઓ અને છેલ્લા ત્રણ દાયકામાં ભ્રષ્ટ રાજકારણ દ્વારા લૂંટાયેલી સંપત્તિની તપાસની માંગ કરી રહ્યા છે.
આંદોલનકારીઓની માંગ
આંદોલનના આયોજકોએ જાહેરાત કરી કે, વિરોધ પ્રદર્શન દરમિયાન જેમણે પોતાનો જીવ ગુમાવ્યો છે તેમને રાજ્ય દ્વારા શહીદનો દરજ્જો આપવામાં આવે. તેમના પરિવારોને સન્માન, સરકારી રાહત અને માન્યતા આપવામાં આવશે.
યુવા નેતાઓએ બેરોજગારી ઘટાડવા, લોકોની વધતી જતી સ્થળાંતર સમસ્યાને રોકવા અને સામાજિક અન્યાય સામે ખાસ કાર્યક્રમો ચલાવવાનું વચન આપ્યું છે. તેમણે કહ્યું કે દેશમાં લોકશાહીને મજબૂત કરવા અને સામાન્ય લોકોના અધિકારોનું રક્ષણ કરવા માટે આ પગલાં લેવામાં આવી રહ્યા છે.
વિરોધીઓ દ્વારા જાહેર કરવામાં આવેલા એક નિવેદનમાં કહેવામાં આવ્યું છે કે, આ આંદોલન કોઈ પક્ષ કે વ્યક્તિ માટે નથી, પરંતુ સમગ્ર પેઢી અને રાષ્ટ્રના ભવિષ્ય માટે છે. શાંતિ જરૂરી છે, પરંતુ તે ફક્ત નવી રાજકીય વ્યવસ્થાના પાયા પર જ શક્ય છે.
આ પણ વાંચોઃ આ IPO આવતીકાલથી ખુલી રહ્યો છે, પ્રાઇસ બેન્ડ છે ₹ 140 છે, લિસ્ટિંગ પર 118% નફો થશે!
આ પણ વાંચોઃ અનિલ અંબાણીની વધી મુશ્કેલી, EDએ હવે મની લોન્ડરિંગનો કેસ કર્યો દાખલ
