NEET પરીક્ષા રદ થતાં TMC ભડકી, કહ્યું, “નિષ્ફળ સરકારમાં કોઈ જવાબદારી નથી…”
NEET UG 2026 Cancelled: NEET UG 2026 પરીક્ષા રદ થયા બાદ મમતા બેનર્જીની પાર્ટી TMCની પહેલી પ્રતિક્રિયા સામે આવી છે. TMCની રાજ્યસભા સાંસદ સાગરિકા ઘોષે કહ્યું કે આ સરકારમાં કોઈની કોઈ જવાબદારી નથી. સરકાર ફક્ત બિનજરૂરી રીતે પોતાનો પ્રચાર કરી રહી છે અને રોજિંદો વહીવટ સંભાળવામાં પણ નિષ્ફળ સાબિત થઈ રહી છે.
સાગરિકા ઘોષે X પર પોસ્ટ કરીને લખ્યું, “ડબલ એન્જિન સરકારમાંથી વધુ એક સમાચાર. NEET-UG પરીક્ષા રદ. લાખો વિદ્યાર્થીઓનું જીવન અસ્તવ્યસ્ત થઈ ગયું છે અને તેઓ ચિંતામાં ડૂબી ગયા છે. અસમર્થ અને નિષ્ક્રિય નરેન્દ્ર મોદી સરકારમાં કોઈ શાસન નથી અને જવાબદારી શૂન્ય છે. મોદી સરકાર ફક્ત બિનજરૂરી પ્રચાર કરવામાં વ્યસ્ત છે અને દૈનિક વહીવટ સંભાળવામાં નિષ્ફળ રહી છે.”
More dispatches from the Double Engine. NEET-UG examination CANCELLED. Lakhs of students lives thrown into disarray and anxiety. No governance and ZERO accountability of incompetent USELESS @narendramodi regime, only mindlessly promoting itself, incapable of daily…
— Sagarika Ghose (@sagarikaghose) May 12, 2026
દેશમાં NEET UG પરીક્ષા 3 મેના રોજ યોજાઈ હતી
NTAએ હવે NEET UG 2026 પરીક્ષા રદ કરી દીધી છે. 3 મેના રોજ યોજાયેલી આ પરીક્ષાના પેપર લીક થયાના આરોપો બાદ વિવાદ વધ્યો હતો, જેના કારણે પરીક્ષા રદ કરવાનો નિર્ણય લેવામાં આવ્યો. એજન્સીએ નિવેદન જાહેર કરીને જણાવ્યું કે 3 મે 2026ના રોજ યોજાયેલી NEET UG પરીક્ષા હવે ફરી લેવામાં આવશે. પરીક્ષાની નવી તારીખોની જાહેરાત ટૂંક સમયમાં કરવામાં આવશે.
પેપર લીક મામલે હવે CBI તપાસ કરશે
NTAએ જણાવ્યું કે NEET UG પરીક્ષા લીક મામલાની તપાસ CBIને સોંપવામાં આવી છે. એજન્સીએ 10 મેના રોજ જાહેર કરેલી પ્રેસ રિલીઝમાં કહ્યું કે, “8 મેના રોજ પરીક્ષા સાથે જોડાયેલા મામલાઓને સ્વતંત્ર તપાસ અને જરૂરી કાર્યવાહી માટે કેન્દ્રીય એજન્સીઓને મોકલવામાં આવ્યા હતા. ત્યારબાદ કેન્દ્રીય તપાસ એજન્સીઓ અને કાયદા અમલવારી એજન્સીઓ પાસેથી મળેલા ઇનપુટ અને તપાસ અહેવાલોની સમીક્ષા કરવામાં આવી. પેપર લીક મામલે CBI તપાસના પણ આદેશ આપવામાં આવ્યા છે.” NTAએ વધુમાં જણાવ્યું કે પરીક્ષા પ્રણાલીમાં પારદર્શિતા જળવાઈ રહે અને નિષ્પક્ષ તથા વિશ્વસનીય પરીક્ષા સુનિશ્ચિત થાય તે માટે આ પગલું લેવામાં આવ્યું છે.
NEET UG પરીક્ષા ક્યારે યોજાશે?
NTAના જણાવ્યા મુજબ, પરીક્ષા રદ થયા બાદ હવે NEET UG 2026 પરીક્ષા ફરીથી લેવામાં આવશે. નવી પરીક્ષાની તારીખ, એડમિટ કાર્ડ જાહેર કરવાની તારીખ અને અન્ય જરૂરી માહિતી ટૂંક સમયમાં એજન્સીની સત્તાવાર વેબસાઇટ તથા અન્ય સત્તાવાર માધ્યમો દ્વારા જાહેર કરવામાં આવશે.
આ પણ વાંચો: અગ્નિવીરોને શહીદ સૈનિકોની જેમ લાભ આપી શકાય નહીં, હાઈકોર્ટમાં કેન્દ્ર સરકારનો જવાબ
