સુભાષ ચંદ્રાને મોટો ઝટકો: ₹6.25 કરોડની રિપેમેન્ટ યોજના પર NCLTનો સ્ટે
Subhash Chandra insolvency case: ઝી ગ્રૂપના સ્થાપક સુભાષ ચંદ્રાના વ્યક્તિગત નાદારી કેસમાં નેશનલ કંપની લો ટ્રિબ્યૂનલ (NCLT)ની પાંચ સભ્યોની વિશેષ ખંડપીઠે મહત્ત્વપૂર્ણ નિર્ણય લીધો છે. ખંડપીઠે 25 ઓગસ્ટના એ આદેશના અમલ પર સ્ટે મૂકી દીધો છે, જેમાં સુભાષ ચંદ્રાની ₹6.25 કરોડની રિપેમેન્ટ યોજનાને મંજૂરી આપવામાં આવી હતી. કેસમાં અગાઉ અલગ-અલગ સભ્યોના ચુકાદામાં સ્પષ્ટ બહુમતીનો મત ઊભો ન થયો હોવાનું નોંધાયા બાદ હવે પાંચ સભ્યોની વિશેષ ખંડપીઠ સમગ્ર મામલાની નવેસરથી સુનાવણી કરશે. ટ્રિબ્યૂનલે તમામ સંબંધિત પક્ષકારોને નોટિસ પણ પાઠવી છે.
₹22,006.57 કરોડના દાવા સામે ₹6.25 કરોડની યોજના
સુભાષ ચંદ્રાએ લેણદારોના કુલ ₹22,006.57 કરોડના સ્વીકારાયેલા દાવા સામે માત્ર ₹6.25 કરોડ ચૂકવવાની રિપેમેન્ટ યોજના રજૂ કરી હતી. આ ઉપરાંત નાદારી પ્રક્રિયાના ખર્ચ માટે ₹25 લાખની અલગ જોગવાઈ કરવામાં આવી હતી. આ પ્રમાણે સ્વીકારાયેલા કુલ દાવાની સરખામણીએ પ્રસ્તાવિત ચુકવણી માત્ર આશરે 0.0284 ટકા જેટલી થાય છે.
મૂળ બે સભ્યો વચ્ચે થયો હતો મતભેદ
આ કેસની શરૂઆતમાં NCLTની બે સભ્યોની ખંડપીઠ સમક્ષ સુનાવણી થઈ હતી. તેમાં ન્યાયિક સભ્ય અશોકકુમાર ભારદ્વાજ અને ટેકનિકલ સભ્ય રીના સિન્હા પુરી વચ્ચે મતભેદ જોવા મળ્યો હતો. અશોકકુમાર ભારદ્વાજે રિપેમેન્ટ યોજનાને સમર્થન આપ્યું હતું, પરંતુ તેને માત્ર યોજનાના સમર્થનમાં મત આપનારા લેણદારો સુધી મર્યાદિત રાખવાનો મત વ્યક્ત કર્યો હતો. બીજી તરફ રીના સિન્હા પુરીએ પ્રક્રિયામાં ગંભીર ખામીઓ દર્શાવીને રિપેમેન્ટ યોજના ફગાવવાનો મત આપ્યો હતો.
ત્રીજા સભ્યે શરતો સાથે આપી હતી મંજૂરી
બે સભ્યો વચ્ચે મતભેદ સર્જાતા મામલો ત્રીજા સભ્ય નીલેશ શર્મા સમક્ષ મોકલવામાં આવ્યો હતો. 25 ઓગસ્ટે તેમણે કેટલીક શરતો સાથે રિપેમેન્ટ યોજનાને મંજૂરી આપવાનો મત વ્યક્ત કર્યો હતો. તેમણે યોજના વિરોધ કરનારા લેણદારો સહિત તમામ લેણદારો પર લાગુ થવી જોઈએ એવો મત પણ આપ્યો હતો. જોકે ત્યારબાદ મૂળ ખંડપીઠે નોંધ્યું હતું કે ત્રણેય સભ્યોના અભિપ્રાય અલગ-અલગ હોવાથી કોઈ એક સ્પષ્ટ બહુમતીનો ચુકાદો ઊભો થતો નથી.
પાંચ સભ્યોની વિશેષ ખંડપીઠ કરશે નવેસરથી સુનાવણી
આ કાનૂની ગૂંચવણ બાદ NCLTના પ્રમુખ જસ્ટિસ (નિવૃત્ત) અનુપિંદરસિંહ ગ્રેવાલના વડપણ હેઠળ પાંચ સભ્યોની વિશેષ ખંડપીઠ રચવામાં આવી છે. ખંડપીઠમાં જસ્ટિસ ગ્રેવાલ ઉપરાંત ન્યાયિક સભ્યો બચુ વેંકટ બલરામ દાસ અને મહેન્દ્ર ખંડેલવાલ તેમજ ટેકનિકલ સભ્યો અતુલ ચતુર્વેદી અને રવિન્દ્ર ચતુર્વેદી સામેલ છે.
અમારી WhatsApp ચેનલમાં જોડાવા આ લિંક પર ક્લીક કરો
સુભાષ ચંદ્રાની સંપત્તિ ટ્રાન્સફર પર રોક
NCLTએ 25 ઓગસ્ટના આદેશ પર સ્ટે મૂકવાની સાથે સુભાષ ચંદ્રાને પોતાની કોઈપણ સંપત્તિ સીધી કે આડકતરી રીતે વેચવા, ટ્રાન્સફર કરવા, હસ્તાંતરિત કરવા અથવા તેના પર અન્ય કોઈ હક ઊભો કરવા સામે પણ રોક લગાવી છે. હવે પાંચ સભ્યોની વિશેષ ખંડપીઠ અગાઉ આવેલા ત્રણ અલગ-અલગ અભિપ્રાયોની તપાસ કર્યા બાદ રિપેમેન્ટ યોજના અને વ્યક્તિગત નાદારી કેસમાં આગળનો નિર્ણય કરશે.
