Faridabad Class 11 Girl Jump From School Roof: હરિયાણાના ફરીદાબાદમાં આવેલ ડબુઆ-ગાઝીપુર રોડ પર સ્થિત નવોદય વિદ્યા નિકેતન સિનિયર સેકન્ડરી સ્કૂલમાં મંગળવારે એક અત્યંત કરુણ અને ચોંકાવનારી ઘટના સામે આવી છે. 11 મા ધોરણમાં અભ્યાસ કરતી 16 વર્ષની વિદ્યાર્થીની શાળાના ત્રીજા માળેથી અચાનક નીચે કૂદી પડી હતી. આ ગંભીર અકસ્માતમાં વિદ્યાર્થીની લોહીલુહાણ થઈ ગઈ હતી. તેને તાત્કાલિક સારવાર અર્થે નજીકની ખાનગી હોસ્પિટલમાં ખસેડવામાં આવી હતી, પરંતુ સ્થિતિ વધુ નાજુક બનતાં તેને બીકે (BK) હોસ્પિટલમાં રિફર કરાઈ હતી. જ્યાં તબીબોએ તપાસ બાદ તેને સત્તાવાર રીતે મૃત જાહેર કરી હતી. મૃતક માસૂમ વિદ્યાર્થીનીની ઓળખ ડબુઆ વિસ્તારની રહેવાસી જાન્વી તરીકે થઈ છે.

બિરયાની ખાવાના નજીવા વિવાદમાં શિક્ષકે 4 કલાક તડકામાં ઉભી રાખી

મૃતક જાન્વીના પિતા પ્રમોદ કુમારે શાળાના એક શિક્ષક પર માનસિક ત્રાસ આપવાનો અને આપઘાત માટે મજબૂર કરવાનો ગંભીર આરોપ લગાવ્યો છે. પિતાના જણાવ્યા અનુસાર, ક્લાસરૂમમાં અન્ય કેટલીક વિદ્યાર્થીનીઓ વચ્ચે બિરયાની ખાવા બાબતે ઝઘડો થયો હતો. આ વિવાદમાં તેમની પુત્રીનો કોઈ વાંક ન હોવા છતાં શિક્ષકે તેને દોષિત ગણાવીને કડક સજા ફટકારી હતી. વર્ગની અન્ય વિદ્યાર્થીનીઓએ પણ પરિવારને જાણ કરી હતી કે શિક્ષકે જાન્વીને કડક તડકામાં આશરે 4 કલાક સુધી ઉભી રાખી હતી. પિતાનું કહેવું છે કે આ પ્રકારના જાહેર અપમાન અને ભારે આઘાતના કારણે જ જાન્વીએ માનસિક સંતુલન ગુમાવીને ત્રીજા માળેથી ઝંપલાવ્યું હોવાની આશંકા છે.

આચાર્યએ સજાના આરોપો નકાર્યા

બીજી તરફ શાળાના પ્રિન્સિપાલ આર.કે. શર્માએ પરિવાર દ્વારા લગાવવામાં આવેલા તમામ આરોપોને પાયાવિહોણા ગણાવીને ફગાવી દીધા છે. આચાર્યએ સ્પષ્ટતા કરતાં જણાવ્યું હતું કે શાળા પરિસરમાં જાન્વી સાથે કોઈ ગેરવર્તણૂક કરવામાં આવી ન હતી કે તેને કોઈ સજા આપવામાં આવી નહોતી. ઘટના સમયે જાન્વીએ ક્લાસ ટીચર પાસે વોશરૂમ જવાની પરવાનગી માગી હતી અને વર્ગખંડમાંથી બહાર નીકળી હતી. ત્યારબાદ તે સીધી શાળાના ત્રીજા માળે પહોંચી હતી અને ત્યાંથી કૂદી પડી હતી. શાળા સંચાલકોના મતે આ કટોકટીભર્યા પગલાં પાછળનું ચોક્કસ કારણ હજુ અસ્પષ્ટ છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

પોલીસે હાથ ધરી તપાસ

ઘટનાની જાણ થતાં જ ડબુઆ પોલીસ સ્ટેશનનો કાફલો ઘટનાસ્થળે દોડી ગયો હતો. પોલીસે શાળા પરિસરનું નિરીક્ષણ કરી સીસીટીવી (CCTV) ફૂટેજ કબજે લેવાની કામગીરી હાથ ધરી છે. પોલીસે શાળા તંત્ર, શિક્ષકો, સાથે ભણતા વિદ્યાર્થીઓ અને મૃતકના પરિવારજનોના નિવેદનો નોંધવાની પ્રક્રિયા શરૂ કરી છે. પોલીસ એ પાસાની ગંભીરતાથી તપાસ કરી રહી છે કે ઘટના પહેલા વર્ગખંડમાં શું બન્યું હતું અને શિક્ષક દ્વારા કરાયેલી કથિત સજાના આરોપોમાં કેટલી સત્યતા છે. અધિકારીઓના જણાવ્યા મુજબ તમામ પક્ષોની પૂછપરછ અને ટેકનિકલ પુરાવા મળ્યા બાદ જ આગળની કાયદેસરની કાર્યવાહી કરવામાં આવશે.

આ પણ વાંચો: 4 કરોડના ચેક, ખાતામાં 10 હજાર પણ નહીં… રામ મંદિર ટ્રસ્ટ સામે આવ્યો ચોંકાવનારો મામલો