કર્ણાટકમાં નેતૃત્વને લઈને ચર્ચા તેજ, સિદ્ધારમૈયાએ કહ્યું- અંતિમ નિર્ણય હાઈકમાન્ડનો

Karnataka News: કર્ણાટકમાં લીડરશીપ અંગે ચાલી રહેલી ચર્ચા વચ્ચે, મુખ્યમંત્રી સિદ્ધારમૈયાએ સ્પષ્ટપણે જણાવ્યું કે હાઈકમાન્ડની ચેતવણી છતાં, કોંગ્રેસના ધારાસભ્યો દિલ્હી જવા માટે સ્વતંત્ર છે. તેમણે સંકેત આપ્યો કે રાજ્યના નેતૃત્વ અંગેનો અંતિમ નિર્ણય ફક્ત પાર્ટીના કેન્દ્રીય નેતૃત્વ પાસે રહેશે. સિદ્ધારમૈયાના જણાવ્યા મુજબ, જો ધારાસભ્યોને કોઈ સુચનો કે ફરિયાદો હોય, તો તેઓ તેને હાઈકમાન્ડ સમક્ષ ઉઠાવી શકે છે, પરંતુ કેન્દ્રીય નેતૃત્વ નિર્ણય લેશે. તેમણે એમ પણ ઉમેર્યું કે ભ્રમનો અંત લાવવા માટે કેન્દ્રીય નેતૃત્વનો હસ્તક્ષેપ જરૂરી છે. મંત્રીમંડળના વિસ્તરણ વિશે પૂછવામાં આવતા, તેમણે કહ્યું કે પાર્ટી નેતૃત્વ મંજૂરી આપે પછી સરકાર આગળના પગલાં લેશે. તેમણે રાહુલ ગાંધી સાથે મુલાકાતની કોઈપણ શક્યતાને પણ નકારી કાઢી.

સિદ્ધારમૈયા 2028 સુધી મુખ્યમંત્રી રહેશે – મંત્રી જમીર અહેમદ

આ દરમિયાન, ગૃહ મંત્રી જમીર અહેમદ ખાને મુખ્યમંત્રી અને નાયબ મુખ્યમંત્રી વચ્ચે કોઈપણ રોટેશનલ ફોર્મ્યુલાને સ્પષ્ટપણે નકારી કાઢી, અને કહ્યું કે, સિદ્ધારમૈયા 2028 સુધી તેમનો કાર્યકાળ પૂર્ણ કરશે. ચલ્લાકેરેના ધારાસભ્ય શિવાન્નાએ આંતરિક મતભેદોના અહેવાલોને નકારી કાઢતા કહ્યું કે, આવા બધા મુદ્દાઓ પાર્ટી હાઇકમાન્ડની વિવેકબુદ્ધિ પર છોડી દેવા જોઈએ. તેમના મતે, કેટલાક નવા ધારાસભ્યો પાર્ટીની પ્રક્રિયાઓથી પુરી રીતે પરિચિત નથી, જેના કારણે મૂંઝવણ થઈ શકે છે. તેમણે પુનરોચ્ચાર કર્યો કે, ચાહે નેતા કોઈ પણ હોય, દરેકે કેન્દ્રીય નેતૃત્વના નિર્ણયને સ્વીકારવો જોઈએ. શિવાન્નાએ એમ પણ કહ્યું કે, ધારાસભ્યોને આ મુદ્દા પર ફરીથી જાહેર નિવેદનો ન આપવાની સૂચના આપવામાં આવી છે.

પાર્ટી નેતૃત્વની ચર્ચા જાહેર મંચ માટે નથી – મલ્લિકાર્જુન ખડગે

દિલ્હીમાં, કોંગ્રેસ પ્રમુખ મલ્લિકાર્જુન ખડગેએ નેતૃત્વ વિવાદ પર ટિપ્પણી કરવાનો ઇનકાર કરતા કહ્યું કે, આવા મુદ્દાઓ જાહેર ચર્ચાનો વિષય નથી અને આની ફક્ત સુનિશ્ચિત બેઠકોમાં જ ચર્ચા કરવામાં આવે. તેમણે સ્પષ્ટતા કરી કે તેઓ બંધારણ દિવસની ઉજવણી અને સમીક્ષા બેઠકોમાં હાજરી આપવા આવ્યા છે. દરમિયાન, નાયબ મુખ્યમંત્રી ડીકે શિવકુમારે સિદ્ધારમૈયાના નિવેદનોને વૈદિક શ્લોકો ગણાવતા કહ્યું કે, તેઓ મુખ્યમંત્રીના નિર્ણયોનું સંપૂર્ણપણે સમર્થન કરે છે અને સરકાર તે માર્ગદર્શન હેઠળ કામ કરી રહી છે.

આ પણ વાંચો: બંગાળમાં મુખ્ય ચૂંટણી અધિકારીની ઓફિસ બહાર BLOsનો વિરોધ, SIRમાં વધુ પડતા કામના ભારણનો આરોપ