ભારત યુરેનિયમ પાવર માટે ધડાધડ કરી રહ્યું છે ડીલ, આ મિત્રોએ ખોલી દીધા દરવાજા

• આ પહેલા ભારતે વિશ્વના સૌથી મોટા યુરેનિયમ ઉત્પાદક કઝાકિસ્તાન સાથે પણ એક મોટો યુરેનિયમ સપ્લાય કરાર કર્યો હતો

National News: કેનેડા 2027 થી 2035 સુધી ભારતને 22 મિલિયન પાઉન્ડ યુરેનિયમ સપ્લાય કરશે. ભારતે આ માટે કેનેડા સાથે 2.6 અબજ ડોલરનો કરાર કર્યો છે. આ પહેલા ભારતે વિશ્વના સૌથી મોટા યુરેનિયમ ઉત્પાદક કઝાકિસ્તાન સાથે પણ એક મોટો યુરેનિયમ સપ્લાય કરાર કર્યો હતો. કઝાકિસ્તાનની સરકારી માલિકીની યુરેનિયમ કંપની કાઝાટોમ્પ્રોમે ભારતના પરમાણુ ઉર્જા વિભાગ સાથે આ કરાર પર હસ્તાક્ષર કર્યા હતા. યલો કેક કહેવાતા યુરેનિયમના પુરવઠા માટે ભારતના દોસ્તોનું લિસ્ટ લાંબુ થઈ ગયું છે.

કેનેડા ભારતને કેટલું યુરેનિયમ આપશે?

છેલ્લા 10 મહિનામાં ભારત-કેનેડા સંબંધોમાં આવેલા નાટકીય પરિવર્તનનું પ્રતિબિંબ સોમવારે વડા પ્રધાન મોદી અને તેમના કેનેડિયન સમકક્ષ માર્ક કાર્ની વચ્ચે થયેલી વાતચીતમાં જોવા મળ્યું હતું. આ સમયગાળા દરમિયાન અનેક મહત્વપૂર્ણ જાહેરાતો અને કરારો કરવામાં આવ્યા હતા, જેમાં ભારતને 22 મિલિયન પાઉન્ડ (9.9 મિલિયન કિલોગ્રામ) યુરેનિયમ સપ્લાય કરવાનો ઐતિહાસિક કરાર પણ સામેલ હતો.

ભારતનું ન્યુક્લિયર માર્કેટ કેનેડા માટે એક મોટી તક

ધ ગ્લોબ એન્ડ મેલમાં પ્રકાશિત થયેલા એક અહેવાલ મુજબ દુનિયાની સૌથી મોટી યુરેનિયમ ખાણકામ કંપનીઓમાંથી એક કેનેડાની કેમકો કોર્પ માટે ભારતનું ન્યુક્લિયર માર્કેટ એક મોટા વિકાસનો અવસર છે. કંપનીના ચીફ એક્ઝિક્યુટિવ ઓફિસર, ટિમ ગિટ્ઝેલે ભારત સાથે 2.6 અબજ ડોલરના યુરેનિયમ સપ્લાય સોદાને અંતિમ સ્વરૂપ આપ્યા બાદ આ ટિપ્પણી કરી હતી, જે પરમાણુ ઊર્જામાં પેઢીગત વિસ્તરણ અને ખાનગી રોકાણ માટે આ ક્ષેત્રને ખોલી રહ્યું છે. ગિટ્ઝેલે ભારત સરકાર સાથે 2027 અને 2035 ની વચ્ચે ભારતને 22 મિલિયન પાઉન્ડ (99 લાખ કિલોગ્રામ) યુરેનિયમ સપ્લાય કરવા માટે કરાર પર હસ્તાક્ષર કર્યા હતા.

2020 થી કેનેડાથી યુરેનિયમ આવી રહ્યું ન હતું

કેમેકોનો ભારત સાથે 2015 થી 2020 સુધી પરમાણુ પુરવઠા કરાર હતો, પરંતુ બંને દેશો વચ્ચે બગડતા રાજકીય સંબંધોને કારણે તેને રિન્યુ કરવામાં આવ્યો ન હતો. 2023માં કેનેડિયન શીખ કાર્યકર્તા હરદીપ સિંહ નિજ્જરની હત્યા બાદ સંબંધો વધુ બગડ્યા હતા. તે સમયે ભૂતપૂર્વ વડા પ્રધાન જસ્ટિન ટ્રુડોની સરકારે ભારતીય એજન્ટો પર સંડોવણીનો આરોપ લગાવ્યો હતો.

ભારતને યુરેનિયમ આપનારા મિત્રો

હાલમાં રશિયા, કઝાકિસ્તાન, ઉઝબેકિસ્તાન, ફ્રાન્સ અને કેનેડા ભારતને યુરેનિયમ ઇંધણ સપ્લાય કરી રહ્યા છે અથવા તેને સપ્લાય કરવા માટે સોદા કર્યા છે.
મીડિયા રિપોર્ટ્સ અનુસાર ભારતે 2012 માં ઓસ્ટ્રેલિયા સાથે એક કરાર પર હસ્તાક્ષર કર્યા હતા, જ્યારે ઓસ્ટ્રેલિયાની સરકારે ભારતને યુરેનિયમ વેચવાનો નિર્ણય લીધો હતો. જોકે બાદમાં ઓસ્ટ્રેલિયા પોતાના નિર્ણયથી પાછું હટી ગયું હતું.

ભારતની નજર 2047 સુધીમાં આ લક્ષ્ય પર

ધ ગ્લોબ એન્ડ મેઇલ અનુસાર ભારત તેના પરમાણુ ઉર્જા ક્ષેત્રના મોટા પાયે વિસ્તરણને આગળ ધપાવી રહ્યું છે. સરકારનો ઉદ્દેશ્ય 2047 સુધીમાં ઉત્પાદન ક્ષમતા 8.8 ગીગાવોટથી વધારીને 100 ગીગાવોટ કરવાની છે. આ માટે ભારતમાં પહેલાથી કાર્યરત 26 રિએક્ટર ઉપરાંત ડઝનબંધ નવા અને મોટા રિએક્ટરની જરૂર પડશે.

આ પણ વાંચોઃ કોણ છે ભારતીય ટીમની જર્સીમાં સ્ટેડિયમમાં જોવા મળેલી “મિસ્ટ્રી ગર્લ”? જેની ચારે તરફ થઈ રહી છે ચર્ચા