Asia Cup 2025: સુપર-4માં ક્વાલિફાય કરનારી પહેલી ટીમ બની ઈંડિયા, હજુ એક મેચ બાકી

Asia Cup 2025: અબુ ધાબીના શેખ ઝાયેદ સ્ટેડિયમ ખાતે રમાયેલી એશિયા કપ 2025 ની એક મહત્વપૂર્ણ મેચમાં, સંયુક્ત આરબ અમીરાત (UAE) એ ઓમાનને 42 રનથી હરાવ્યું છે. આ પરિણામનો સૌથી મોટો ફાયદો ભારતીય ટીમને થયો, જે એક મેચ બાકી રહેતા સુપર-4 માં સ્થાન મેળવનારી પ્રથમ ટીમ બની ગઈ છે.

ભારતે અત્યાર સુધી રમાયેલી બંને મેચ જીતી છે અને ચાર પોઈન્ટ મેળવ્યા છે અને ગ્રુપ A ના પોઈન્ટ ટેબલમાં ટોચ પર છે. ટીમ ઈન્ડિયા હવે 19 સપ્ટેમ્બરે ઓમાન સામે ટકરાશે. ઓમાનની ટીમ તેની બંને શરૂઆતની મેચ હારી ગઈ છે અને હવે સુપર-4 ની રેસમાંથી બહાર થઈ ગઈ છે. આવી સ્થિતિમાં, જો ભારત ઓમાન સામે હારી જાય છે, તો પણ તે ટોચના બેમાં રહીને આગામી તબક્કા માટે ક્વોલિફાય થશે.

UAE પાસે હવે એક શાનદાર તક છે

ગ્રુપ A માંથી સુપર-4 માં જનારી બીજી ટીમ કોણ હશે તે 17 સપ્ટેમ્બરે પાકિસ્તાન અને UAE વચ્ચેની મેચ દ્વારા નક્કી થશે. બંને ટીમો પાસે હાલમાં બે-બે પોઈન્ટ છે. UAE ની જીતથી સુપર-4 માં સ્થાન મેળવવાની તેમની આશા જીવંત રહી છે. હવે UAE માટે પાકિસ્તાન સામેની મેચ કરો યા મરો જેવી હશે. જો તેઓ જીતી જાય અને ભારતીય ટીમ ઓમાનને હરાવે, તો UAE સુપર-4માં પહોંચવાનું નિશ્ચિત રહેશે.

UAE એ ઓમાનને હરાવ્યું

મેચની વાત કરીએ તો, UAE ના કેપ્ટન મુહમ્મદ વસીમ અને ઓપનર અલીશાન શરાફુએ અડધી સદી ફટકારીને ટીમને મજબૂત શરૂઆત અપાવી. તેમની ઇનિંગના આધારે UAE એ નિર્ધારિત ઓવરોમાં 5 વિકેટે 172 રન બનાવ્યા. મુહમ્મદ વસીમે 54 બોલમાં 69 રનની ઇનિંગ રમી. તેણે પોતાની ઇનિંગમાં 6 ચોગ્ગા અને 3 છગ્ગા ફટકાર્યા. તે જ સમયે, અલીશાન શરાફુએ 7 ચોગ્ગા અને 1 છગ્ગાની મદદથી 51 રનની ઇનિંગ રમી. UAE ના સ્કોરના જવાબમાં, ઓમાનની ટીમ જુનૈદ સિદ્દીકીની ઘાતક બોલિંગ સામે ટકી શકી નહીં અને 18.4 ઓવરમાં 130 રનમાં જ ઢળી પડી. સિદ્દીકીએ 23 રનમાં 4 વિકેટ લીધી. હૈદર અલી અને મોહમ્મદ જાવદુલ્લાહે 2-2 વિકેટ લીધી.

આ પણ વાંચો: મોરબીના લેવિસ સિરામિક ગ્રુપ પર આવકવેરા વિભાગ ત્રાટક્યું, રાજકોટમાં પણ તપાસ