ICMR NIN Dementia Study: ભારતમાં બદલાતી જીવનશૈલી અને અસંતુલિત આહારને કારણે લોકો નાની ઉંમરે ગંભીર બીમારીઓનો ભોગ બની રહ્યા છે. તાજેતરમાં ઇન્ડિયન કાઉન્સિલ ઓફ મેડિકલ રિસર્ચ-નેશનલ ઇન્સ્ટિટ્યૂટ ઓફ ન્યુટ્રિશન (ICMR-NIN) દ્વારા કરવામાં આવેલા એક સંશોધનમાં ચોંકાવનારો ખુલાસો થયો છે. રિપોર્ટ અનુસાર, ભારતીયોના આહારમાં ચોક્કસ વિટામિન્સની ઉણપ મગજના સ્વાસ્થ્યને ગંભીર નુકસાન પહોંચાડી રહી છે, જેના કારણે યાદશક્તિ ગુમાવવાનો વિકાર એટલે કે ‘ડિમેન્શિયા’ (Dementia) થવાનું જોખમ ઝડપથી વધી રહ્યું છે.

શું છે ડિમેન્શિયા અને તેના લક્ષણો?

ડિમેન્શિયા એ મગજ સાથે જોડાયેલી એક જટિલ સ્થિતિ છે, જેમાં વ્યક્તિની યાદશક્તિ ધીમે-ધીમે નબળી પડવા લાગે છે. આ રોગથીપીડિત વ્યક્તિમાં વિચારવાની ક્ષમતા ઘટવી, સ્વભાવમાં અચાનક બદલાવ આવવો અને રોજિંદા સાદા કાર્યો કરવામાં પણ મુશ્કેલી પડવી જેવા લક્ષણો જોવા મળે છે. સામાન્ય રીતે આ બીમારી વૃદ્ધાવસ્થામાં જોવા મળતી હતી, પરંતુ હવે ખરાબ પોષણ અને બદલાતી જીવનશૈલીને કારણે યુવાનો પણ આ માનસિક સમસ્યાનો શિકાર બની રહ્યા છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

સંશોધનનો અહેવાલ: વિટામિન D અને B-કોમ્પ્લેક્સની ઉણપ જવાબદાર

‘ધ લેન્સેટ રીજનલ હેલ્થ – સાઉથ ઈસ્ટ એશિયા’ જર્નલમાં પ્રકાશિત થયેલા આ સંશોધન અંતર્ગત તેલંગાણાના શહેરી અને ગ્રામીણ વિસ્તારોના ૪૦ થી ૮૦ વર્ષની વયના ૫૭૦ લોકોના સ્વાસ્થ્યનું પરીક્ષણ કરવામાં આવ્યું હતું. વૈજ્ઞાનિકોએ તેમના જ્ઞાનાત્મક સ્વાસ્થ્ય (Cognitive Health), ખાવા-પીવાની આદતો અને લોહીમાં વિટામિનના સ્તરનો ઊંડો અભ્યાસ કર્યો.

અભ્યાસમાં જાણવા મળ્યું કે આશરે ૪૦ ટકા લોકોમાં ડિમેન્શિયાનું જોખમ ઘણું વધારે હતું. આ લોકોના શરીરમાં માત્ર વિટામિન B12 જ નહીં, પરંતુ વિટામિન D, B2 અને B6 ની પણ ભારે ઉણપ જોવા મળી હતી. આહારમાં વધુ પડતી સંતૃપ્ત ચરબી (Saturated Fat) નું સેવન અને પૌષ્ટિક તત્વોનો અભાવ મગજને નબળું પાડી રહ્યો છે. તેનાથી વિપરીત, જે લોકો નિયમિત રીતે ફળો, લીલા શાકભાજી અને સૂક્ષ્ມ પોષકતત્ત્વો (Micronutrients) થી ભરપૂર ખોરાક લેતા હતા, તેમનામાં આ રોગનું જોખમ ઘણું ઓછું નોંધાયું હતું.

2050 સુધીમાં કેસો વધવાની આશંકા: બચાવ માટે આટલું કરો

આનુવંશિકતા ઉપરાંત ડાયાબિટીસ, સ્થૂળતા, હાઈ બ્લડ પ્રેશર, ધૂમ્રપાન અને શારીરિક પ્રવૃત્તિનો અભાવ પણ ડિમેન્શિયાને આમંત્રણ આપે છે. નિષ્ણાતોએ ચેતવણી આપી છે કે જો ભારતીયો પોતાના આહાર પ્રત્યે સજાગ નહીં થાય, તો 2050 સુધીમાં દેશમાં ડિમેન્શિયાના કેસોમાં રેકોર્ડબ્રેક વધારો થઈ શકે છે. મગજના લાંબા ગાળાના સ્વાસ્થ્યને જાળવી રાખવા માટે અત્યારથી જ આહારમાં આવશ્યક વિટામિન્સ, મિનરલ્સ અને પૂરતા પ્રમાણમાં પોષક તત્વોનો સમાવેશ કરવો તેમજ સ્વસ્થ જીવનશૈલી અપનાવવી અત્યંત અનિવાર્ય છે.