ગુજરાતમાં 8 કલાકમાં 116 તાલુકામાં ધોધમાર વરસાદ; ક્યાં સૌથી વધુ વરસાદ?

ગાંધીનગર, 30 ઓક્ટોબર 2025: અરબી સમુદ્રમાં ઉદ્ભવેલા ‘મોન્થા‘ વાવાઝોડાની અસરથી ગુજરાતમાં કમોસમી માવઠું ધોધમાર બન્યું છે. આ વાવાઝોડું હાલ ઓમાન-યેમેન તરફ આગળ વધી રહ્યું છે, પરંતુ તેનાથી સર્જાયેલા ડિપ્રેશન અને લો-પ્રેશર સિસ્ટમએ ગુજરાતના દરિયાકાંઠે વાદળોનું જથ્થું ખેંચી લાવ્યું છે. પરિણામે છેલ્લા ૮ કલાકમાં રાજ્યના ૧૧૬ તાલુકામાં વરસાદ નોંધાયો, જેમાં ૧૨ તાલુકામાં એક ઇંચથી વધુ વરસાદ ખાબક્યો.
સૌથી વધુ અસર ભાવનગર જિલ્લાના મહુવામાં જોવા મળી, જ્યાં ૩.૧૧ ઇંચ વરસાદ પડ્યો. ભરૂચના હાંસોટ અને ભાવનગરના તળાજામાં ૨.૧૩ ઇંચ, ડાંગના સુબીરમાં માત્ર ૨ કલાકમાં ૨ ઇંચથી વધુ, સુરતના મહુવામાં ૧.૯૩ ઇંચ, ગાંધીનગરમાં ૧.૬૯ ઇંચ અને પાલીતાણામાં ૧.૨૬ ઇંચ વરસાદ નોંધાયો. આ ભારે વરસાદથી નીચાણવાળા વિસ્તારોમાં પાણી ભરાઈ ગયા, રસ્તાઓ પર પાણી ફરી વળ્યા અને ખેતરોમાં પાકને નુકસાન થયું.
હવામાન વિભાગે જણાવ્યું કે, મોન્થા વાવાઝોડું ગુજરાતથી છે, પરંતુ તેની આસપાસની હવાની ગતિવિધિએ ગુજરાતમાં વાદળોનું આગમન વધાર્યું છે. આ સિસ્ટમ ૩૧ ઓક્ટોબર સુધી સૌરાષ્ટ્ર, દક્ષિણ ગુજરાત અને કચ્છમાં હળવો થી મધ્યમ વરસાદ કરાવશે. ખાસ કરીને સુરત, નવસારી, વલસાડ, ડાંગ, ભરૂચ, ભાવનગર, અમરેલીમાં વધુ વરસાદની આગાહી છે.
આ કમોસમી વરસાદથી કપાસ, મગફળી અને શિયાળુ પાકની તૈયારીને ભારે ફટકો પડ્યો છે. ખેડૂતોમાં ચિંતા વધી છે, જ્યારે જળાશયોમાં પાણીની આવકથી રાહત પણ છે. વહીવટીતંત્રએ નદી-નાળાના કાંઠે રહેતા લોકોને સતર્ક રહેવા અને જરૂરી સામગ્રી તૈયાર રાખવા સૂચના આપી છે. આગામી ૪૮ કલાકમાં વરસાદની તીવ્રતા ઘટવાની શક્યતા છે.












