1808 HTAT મુખ્ય શિક્ષકોની ભરતીને લીલી ઝંડી, ખાલી જગ્યાઓ તાત્કાલિક ભરવા શિક્ષણ વિભાગનો આદેશ

HTAT recruitment 2026: ગુજરાત સરકારના શિક્ષણ વિભાગે પ્રાથમિક શાળાઓમાં લાંબા સમયથી ખાલી પડેલી મુખ્ય શિક્ષકોની જગ્યાઓ ભરવા માટે મહત્વનો નિર્ણય લીધો છે. વિભાગે 1808 HTAT (મુખ્ય શિક્ષક વર્ગ-3)ની ખાલી જગ્યાઓ તાત્કાલિક ભરવા માટે લીલી ઝંડી આપી દીધી છે. શિક્ષણ વિભાગે આ અંગે સત્તાવાર પરિપત્ર જાહેર કરીને તમામ જિલ્લાઓને જગ્યાઓની વિગતો મોકલવા અને ભરતી પ્રક્રિયા ઝડપથી આગળ વધારવાના સ્પષ્ટ આદેશ આપ્યા છે.

ભરતી કેવી રીતે થશે?

વિભાગે આ વખતે નવો 1:1:2નો રેશિયો નક્કી કર્યો છે. એટલે કે કુલ જગ્યાઓની ભરતી ત્રણ અલગ-અલગ માધ્યમો દ્વારા થશે:

– સીધી ભરતી
– પ્રમોશન
– ખાસ સ્પર્ધાત્મક પરીક્ષા

વિભાગે સ્પષ્ટ કર્યું છે કે ખાલી જગ્યાઓની કુલ સંખ્યા અંદાજપત્રમાં મંજૂર થયેલી જોગવાઈ કરતાં વધી ન જાય તેનું ધ્યાન રાખવું.

શિક્ષણ વિભાગની સૂચનાઓ

• ખાલી જગ્યાઓની સંખ્યા અંદાજપત્રમાં મંજૂર થયેલી જોગવાઈ કરતાં વધુ ન થાય તેનું ધ્યાન રાખવું.
• પ્રાથમિક શિક્ષણ નિયામક કચેરીએ યુદ્ધના સ્તરે કામ કરીને પરીક્ષા અને ભરતી પ્રક્રિયા ઝડપથી પૂર્ણ કરવી.
• ભરતી પૂર્ણ થયા પછી વધારાની જરૂરિયાત હોય તો નવી જગ્યાઓ મંજૂર કરવા માટે પણ તૈયારી શરૂ કરવી.

આ નિર્ણયથી કોને લાભ થશે?

• શાળાઓનું વહીવટી માળખું મજબૂત બનશે: ઘણી શાળાઓમાં ઇન્ચાર્જ આચાર્યો પર આધાર રાખવાની સ્થિતિ સમાપ્ત થશે. કાયમી મુખ્ય શિક્ષકોની નિમણૂકથી શૈક્ષણિક અને વહીવટી કામગીરીમાં સુધારો થશે.
• HTAT પાસ ઉમેદવારો: વર્ષોથી HTAT પાસ કરીને રાહ જોઈ રહેલા હજારો શિક્ષકોને રોજગારી અને પ્રમોશનની તક મળશે. ખાનગી શાળાના અનુભવી શિક્ષકોને પણ લાભ થઈ શકે છે.
• ખાનગી શાળાના શિક્ષકો: 5 વર્ષના અનુભવવાળા ઉમેદવારોને પણ આ ભરતીમાં તક મળી શકે છે.

આ નિર્ણય શિક્ષણ વ્યવસ્થાને મજબૂત બનાવવા અને શિક્ષકોની અછત દૂર કરવાની દિશામાં મહત્વનું પગલું માનવામાં આવી રહ્યું છે. વધુ વિગતો અને અધિકૃત પરિપત્ર માટે જિલ્લા શિક્ષણ કચેરી અથવા અધિકૃત વેબસાઇટનો સંપર્ક કરવો.

આ પણ વાંચો: વડોદરાના યાકુતપુરામાં દૂષિત પાણી મુદ્દે ઉગ્ર આંદોલન, સ્થાનિકોએ રસ્તો બ્લોક કર્યો