ગુજરાત : વ્યાજબી ભાવની દુકાનમાં 1 જૂનથી અનાજ વિતરણ બંધ, જાણો શું છે કારણ

• પ્રશ્નો ન ઉકેલાતાં હવે દુકાનદારોએ સરકાર સામે મોરચો માંડ્યો
• સરકારે 6 મહિને પણ KYCનું વળતર ન ચૂકવતાં આંદોલન કરશે દુકાનદારો
• દુકાનદારોની માંગ છેકે,હવે રૂ.25 મહેનતાણું મળવુ જોઇએ

ગુજરાતમાં વ્યાજબી ભાવની દુકાનમાં 1 જૂનથી અનાજ વિતરણ બંધ થશે. જેમાં ઈ-કેવાયસીની પ્રક્રિયા પૂર્ણ કરવામાં રાજ્ય સરકાર નિષ્ફળ રહી છે ત્યારે વ્યાજબી ભાવની દુકાનના દુકાનદારો પર દોષનો ટોપલો ઢોળવામાં આવી રહ્યો છે. કેવાયસી સહિત વિવિધ પ્રશ્નો ન ઉકેલાતાં હવે દુકાનદારોએ સરકાર સામે મોરચો માંડ્યો છે. ગુજરાતમાં 17 હજાર દુકાનદારોએ તા.1લી જૂનથી અનાજનું વિતરણ નહી કરવા નિર્ણય કર્યો છે. તેમનો આરોપ છેકે, કેવાયસી પૂર્ણ કરવામાં સરકાર સદંતર નિષ્ફળ રહી છે ત્યારે દુકાનદારો પર દબાણ કરવુ યોગ્ય નથી.

6 મહિનાથી દુકાનદારો કેવાયસીની કામગીરી કરી રહ્યાં છે પણ હજુ સુધી વળતર ચુકવાયું નથી

વાસ્તવમાં સરકારે ઘેર ઘેર જઇને આખીય પ્રક્રિયા આટોપી લેવી જોઇએ. કેવાયસી પ્રક્રિયામાં અનેક વિસંગતતા ઉભી થઇ છે જેના લીધે પુરવઠા વિભાગ અને વ્યાજબી ભાવની દુકાનના દુકાનદારો આમને સામને આવ્યાં છે. દુકાનદારોને પડતી મુશ્કેલીઓના મામલે ફેર પ્રાઈસ શોપ એન્ડ કેરોસીન ડીલર્સ એસોસિએશનની એક બેઠક મળી હતી જેમાં એવી ચર્ચા કરવામાં આવી કે, કેવાયસી પૂર્ણ કરવા માટે દુકાનદારો પર દબાણ કરવામાં આવી રહ્યુ છે. પણ હકીકતમાં કેવાયસીનું કામ પૂર્ણ કરવાની જવાબદારી પુરવઠા વિભાગની છે. મહત્વની વાત એ છેકે, 6 મહિનાથી દુકાનદારો કેવાયસીની કામગીરી કરી રહ્યાં છે પણ હજુ સુધી વળતર ચુકવાયું નથી. માત્ર પાંચ રૂપિયા મહેનતાણું મળી રહ્યુ છે.

દુકાનદારોની માંગ છેકે,હવે રૂ.25 મહેનતાણું મળવુ જોઇએ

દુકાનદારોની માંગ છેકે,હવે રૂ.25 મહેનતાણું મળવુ જોઇએ. દુકાનદારોએ ચિમકી ઉચ્ચારી છેકે, જો રાજ્ય પુરવઠા વિભાગ ઈ કેવાયસી પ્રક્રિયા 100 ટકા પૂર્ણ નહીં કરે તો તા,1 જૂનથી અનાજ વિતરણ વ્યવસ્થા કરાશે નહીં. સરકાર વિરૂદ્ધ કોર્ટમાં જઇ લડત લડવા પણ તૈયારી દર્શાવાઇ છે.અન્ય પ્રશ્નો મુદ્દે દુકાનદારોનું કહેવુ છેકે, દુકાનમાં જેટલાં કાર્ડ હોય તે બધાય કાર્ડ પર અનાજ વિતરણ થાય તો જ રૂ.20 હજાર કમિશન મળે છે જે યોગ્ય નથી. પુરવઠા વિભાગનો આગ્રહ છેકે, દુકાનદારો બે મહિનાનો અનાજનો જથ્થો ખરીદે. પણ નાની દુકાન હોય તો, અનાજનો જથ્થો મુકવો ક્યાં? એ સવાલ ઉભો થયો છે. લાખો રૂપિયા ખર્ચીને બારકોડ રેશનકાર્ડ સિસ્ટમ અમલી બનાવાઇ છે પણ હજુય સર્વરના ઠેકાણાં નથી. કેવાયસીના નામે જે પરિવારોનુ અનાજ બંધ કરાયુ છે તે ચાલુ કરવા માંગ કરવામાં આવી છે.

આ પણ વાંચો: ગુજરાત : દાહોદમાં મનરેગા કૌભાંડની મુખ્ય ભૂમિકાનો ખુલાસો, રાજકીય ક્ષેત્રે ચર્ચા શરૂ