ગુજરાતમાં વિકાસ ધોવાયો: લોકાર્પણ કર્યાના ખાલી 48 કલાકમાં ગાંધીનગરના સાદરા-અલુવા બ્રિજને જોડતા એપ્રોચ રોડ પર ગાબડું પડ્યું
ગાંધીનગર: જિલ્લાના માણસા તાલુકામાં સાદરા અને અલુવા ગામને જોડવા માટે સાબરમતી નદી પર ₹89 કરોડના ખર્ચે નવો બ્રિજ બનાવવામાં આવ્યો છે. આ બ્રિજનું કેન્દ્રીય ગૃહમંત્રી અમિત શાહ દ્વારા 21 જુલાઈએ ઓનલાઈન ઈ-લોકાર્પણ કરવામાં આવ્યું હતું, જ્યારે રાજ્યના મુખ્યમંત્રી ભૂપેન્દ્ર પટેલે સ્થળ પર રૂબરૂ મુલાકાત લીધી હતી. નવા બ્રિજના શરૂ થવાથી સ્થાનિકોમાં આનંદનો માહોલ હતો, પરંતુ આ ખુશી લાંબો સમય ટકી શકી નહોતી.
માત્ર બે દિવસમાં જ રોડની માટી ધસી ગઈ
બ્રિજના લોકાર્પણના માત્ર 48 કલાક બાદ, એટલે કે 23 જુલાઈએ વિસ્તારમાં ભારે વરસાદ ખાબક્યો હતો. ચોમાસાના આ વરસાદને કારણે બ્રિજને જોડતા એપ્રોચ રોડ પર અલુવા તરફના છેડે માટી બેસી ગઈ અને રોડનો મોટો ભાગ નીચે ધસી જતાં મોટું ગાબડું પડી ગયું હતું. નવા નકોર બ્રિજની આ સ્થિતિ જોઈને સ્થાનિક રહીશો અને વાહનચાલકોમાં તંત્ર પ્રત્યે ભારે રોષ ફેલાયો છે.
વાહનવ્યવહાર એકતરફી, ઇજનેરો દોડતા થયા
ઘટનાની જાણ થતાં જ માર્ગ અને મકાન વિભાગના ઇજનેરો તાત્કાલિક સ્થળ પર દોડી આવ્યા હતા. સચિવાલય સુધી આ બાબતના પડઘા પડતાં સમારકામની કામગીરી ઝડપથી શરૂ કરવામાં આવી હતી. અકસ્માત ન સર્જાય તે માટે તંત્ર દ્વારા રોડ પરનો વાહનવ્યવહાર એક તરફી (વન-વે) કરી દેવામાં આવ્યો છે. વિભાગ દ્વારા સ્થળ પર સતત નજર રાખવામાં આવી રહી છે જેથી વાહનચાલકોને મુશ્કેલી ન પડે.
સુપરવાઈઝરની સ્પષ્ટતા
આ અંગે સ્પષ્ટતા આપતાં પુલના સુપરવાઈઝરે જણાવ્યું હતું કે, એપ્રોચ રોડ પર નવી માટી ભરવામાં આવી હોવાથી વરસાદી પાણી અંદર ઊતરતાં માટી બેસી ગઈ હતી. તેમણે ખાતરી આપી હતી કે વરસાદ બંધ થતાં જ સંપૂર્ણ રોડને પૂર્વવત કરી દેવાશે. હાલમાં ઇજનેરી સૂત્રોના જણાવ્યા અનુસાર ગાબડામાં માટી પુરાણ કરીને પ્રાથમિક રોકથામનું કામ પૂર્ણ કરી દેવામાં આવ્યું છે.
સ્થાનિકોમાં હજુ પણ નવા બ્રિજની ગુણવત્તા અંગે પ્રશ્નો ઊભા થઈ રહ્યા છે, જ્યારે તંત્ર સમારકામને અગ્રતા આપી રહ્યું છે.
આ પણ વાંચો: અમદાવાદ ગ્રામ્યમાં પૂરના પાણીમાં ST બસ પલટી: તમામ મુસાફરોનો સુરક્ષિત બચાવ, મોટી હોનારત ટળી
