UPI-ATM થી કેવી રીતે નીકળશે PF ના પૈસા? જાણો દરેક સવાલનો જવાબ
EPFO 3.0 Digital Upgrade PF Withdrawal Rules: કર્મચારી ભવિષ્ય નિધિ સંગઠન (EPFO) પોતાના કરોડો સબસ્ક્રાઇબર્સને એક મોટી ભેટ આપવાની તૈયારી કરી રહ્યું છે. EPFO ટૂંક સમયમાં જ EPFO 3.0 લોન્ચ કરવા જઈ રહ્યું છે, જેને પીએફ (PF) ના ઈતિહાસમાં સૌથી મોટું ડિજિટલ અપગ્રેડ માનવામાં આવી રહ્યું છે. આ નવા અપગ્રેડ હેઠળ હવે નોકરીયાત વર્ગના સભ્યો યુપીઆઈ (UPI) અને એટીએમ (ATM) ના માધ્યમથી પોતાના પીએફનું ફંડ સીધું જ ઉપાડી શકશે. મીડિયા અહેવાલો અનુસાર, આ સુવિધા જૂનના અંત સુધીમાં એટલે કે ગણતરીના દિવસોમાં જ શરૂ કરી દેવામાં આવે તેવી પૂરેપૂરી સંભાવના છે.
EPFO 3.0 ની જાહેરાત બાદથી જ પીએફ ખાતાધારકોના મનમાં ઘણા સવાલો ઘૂમી રહ્યા છે, જેમ કે – યુપીઆઈ કે એટીએમથી એકસાથે કેટલા પૈસા ઉપાડી શકાશે? એટીએમમાંથી પૈસા ઉપાડવા માટે કોઈ અલગ કાર્ડની જરૂર પડશે? ચાલો આ અહેવાલમાં મેળવીએ તમારા મનમાં મૂંઝાતા તમામ સવાલોના સચોટ જવાબો.
નવી સિસ્ટમમાં કેટલું અમાઉન્ટ (પૈસા) ઉપાડી શકાશે?
જો કે EPFO દ્વારા હજુ સુધી UPI અને ATM ટ્રાન્ઝેક્શન માટે કોઈ અલગથી વિડ્રોઅલ લિમિટની સત્તાવાર જાહેરાત કરવામાં આવી નથી. પરંતુ, એવા કોઈ સંકેતો પણ નથી કે EPFO 3.0 હેઠળ પીએફ ઉપાડવાના હાલના મૂળભૂત નિયમોમાં કોઈ ફેરફાર થશે. એટલે કે, યુઝર્સે વિડ્રોઅલ લિમિટ માટે વર્તમાન નિયમોનું જ પાલન કરવું પડશે.
* 75% સુધી ઉપાડની છૂટ: પ્રવર્તમાન નિયમો અનુસાર, પાત્ર ખાતાધારકો પોતાના પીએફ બેલેન્સના ૭૫% (75%) સુધીની રકમ UPI અથવા ATM ના માધ્યમથી ઉપાડી શકે છે. આ ઉપાડ તમારા હેતુ અને પાત્રતાની શરતો પર નિર્ભર રહેશે.
* ઇન્સ્ટન્ટ ટ્રાન્સફર: ઘણા રિપોર્ટ્સનું માનીએ તો, આ નવી ટેક્નોલોજીની મદદથી ઉપલબ્ધ પીએફ બેલેન્સના ૭૫% સુધીની રકમ સીધી જ ગ્રાહકના લિંક થયેલા બેંક ખાતામાં પલકવારમાં (ઇન્સ્ટન્ટ) ટ્રાન્સફર થઈ જશે.
UPI અને ATM થી કેવી રીતે નીકળશે તમારા PF ના નાણાં?
આ નવી અને આધુનિક વિડ્રોઅલ વ્યવસ્થાને નેશનલ પેમેન્ટ્સ કોર્પોરેશન ઓફ ઇન્ડિયા (NPCI) ના સહયોગથી અપડેટ કરવામાં આવી રહી છે. સરકારના જણાવ્યા અનુસાર, આ રોકેટ ફાસ્ટ સુવિધાનું સફળ ટેસ્ટિંગ (ટ્રાયલ) પણ પૂર્ણ થઈ ચૂક્યું છે. શ્રમ અને રોજગાર મંત્રી મનસુખ માંડવિયાએ પણ સંકેત આપ્યા છે કે ટૂંક સમયમાં જ આ અંગે સત્તાવાર નોટિફિકેશન બહાર પાડવામાં આવશે.
આધાર બેઝ્ડ વેરિફિકેશન પ્રોસેસ:
જ્યારે તમે કોઈપણ યુપીઆઈ (UPI) એપથી પૈસા ઉપાડવા માટે રિક્વેસ્ટ નાખશો, ત્યારે સૌથી પહેલા તમારા રજિસ્ટર્ડ મોબાઈલ પર આધાર આધારિત (Aadhaar-based) OTP આવશે. આ ઓટીપી વેરિફાય કર્યા બાદ તમારે પોતે ઓથેન્ટિકેટ કરવાનું રહેશે. આ સરળ પ્રોસેસ પૂરી થતાં જ પૈસા તરત તમારા બેંક એકાઉન્ટમાં જમા થઈ જશે. આનાથી ક્લેમ સેટલમેન્ટ સેકન્ડોમાં થઈ જશે, જેના માટે પહેલા દિવસો સુધી રાહ જોવી પડતી હતી.
પીએફ ખાતાધારકોને નવું ATM કાર્ડ પણ ઇશ્યૂ કરાશે
EPFO 3.0 અંતર્ગત સભ્યો માટે ખાસ પીએફ સાથે જોડાયેલું ડેબિટ/ATM કાર્ડ પણ શરૂ કરવામાં આવે તેવી આશા છે. આ કાર્ડની મદદથી સામાન્ય બેંક ડેબિટ કાર્ડની જેમ જ કોઈપણ એટીએમ મશીન પર જઈને પીએફ ખાતામાંથી નિર્ધારિત રકમ રોકડીથી ઉપાડી શકાશે.
જો કે, નિવૃત્તિ પછીના જીવનને સુરક્ષિત રાખવા માટે એક ખાસ નિયમ પણ રાખવામાં આવ્યો છે. અહેવાલો મુજબ, સભ્યોએ પોતાના ઈપીએફ (EPF) બેલેન્સમાં ઓછામાં ઓછા ૨૫% (25%) નાણાં જાળવી રાખવા ફરજિયાત બની શકે છે, જેથી તેમની આજીવન રિટાયરમેન્ટ સેવિંગ્સ પૂરેપૂરી ખતમ ન થઈ જાય.
આ સુવિધાનો લાભ લેવા માટે કોણ પાત્ર ગણાશે?
આ એડવાન્સ ડિજિટલ સુવિધાનો ઉપયોગ કરવા માટે ગ્રાહકો પાસે નીચે મુજબની બાબતો અપડેટેડ હોવી અનિવાર્ય છે:
1. આધાર કાર્ડ સાથે લિંક થયેલો એક એક્ટિવ UAN નંબર (Universal Account Number).
2. પ્રોફાઇલમાં અપડેટેડ PAN કાર્ડ ની વિગતો.
3. સાચા IFSC કોડ સાથે વેરિફાય થયેલું બેંક એકાઉન્ટ (જે UAN સાથે કનેક્ટેડ હોય).
4. OTP આધારિત ઓથેન્ટિકેશન માટે આધાર કાર્ડ સાથે લિંક હોય તેવો ચાલુ મોબાઈલ નંબર.
આ પણ વાંચોઃ મોરબીમાં મધરાતે હત્યાકાંડ, પ્રેમ પ્રકરણની શંકામાં 20 વર્ષીય યુવતીની હત્યા
આ પણ વાંચોઃ ગુજરાતની શાળાઓ બની શિક્ષણ ઉત્સવનું કેન્દ્ર, ત્રણ દિવસમાં લાખો વિદ્યાર્થીઓનો પ્રવેશ
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
