જમ્મુ કાશ્મીરના કિશ્તવાડમાં એન્કાઉન્ટર, સેનાએ 3-4 આતંકીઓને ઘેરી લીધા

શ્રીનગર, 22 મે 2025: પહલગામ હુમલા પછી, ભારતીય સેનાનું ઓપરેશન સિંદૂર હજુ પણ ચાલુ છે. જો સૂત્રોનું માનીએ તો, સેનાએ જમ્મુ અને કાશ્મીરના કિશ્તવાડમાં 3-4 આતંકવાદીઓને ઘેરી લીધા છે. હાલમાં બંને તરફથી ગોળીબાર ચાલુ છે.
અહીં ઉલ્લેખનિય છે કે, પહલગામ હુમલા બાદ ભારતીય સેનાએ ખીણમાં એક્ટિવ 14 આતંકવાદીઓની યાદી તૈયાર કરી હતી. સેનાએ આમાંથી 6 આતંકવાદીઓને ઠાર કર્યા છે. બાકીના લોકોને શોધવા માટે સેના ઓપરેશન ચલાવી રહી છે.
માહિતી અનુસાર સેનાએ કિશ્તવાડના ચતરુ વિસ્તારના સિંઘપોરામાં આ આતંકવાદીઓને ઘેરી લીધા છે. અગાઉ, 20 મેના રોજ, જમ્મુ અને કાશ્મીર પોલીસે પાકિસ્તાન સ્થિત ચાર આતંકવાદી હેન્ડલરોની મિલકતો જપ્ત કરી હતી.
આ કાર્યવાહી ઉત્તર કાશ્મીરના બારામુલ્લા જિલ્લાના સોપોર અને દક્ષિણ કાશ્મીરના પુલવામા જિલ્લાના અવંતીપોરામાં કરવામાં આવી હતી. માહિતી આપતાં પોલીસે જણાવ્યું કે સોપોર વિસ્તારમાં ત્રણ અને અવંતિપોરામાં એક મિલકત જપ્ત કરવામાં આવી છે. સોપોરમાં અર્શીદ અહેમદ ટેલી, ફિરદોસ અહેમદ ડાર અને નઝીર અહેમદ ડાર નામના આતંકવાદીઓની મિલકતો જપ્ત કરવામાં આવી છે.
આ પણ વાંચો: આ ભાઈએ 200 કરોડનું પ્રાઈવેટ જેટ ખરીદ્યું, મુકેશ અંબાણીના પંડિત પાસે પૂજા કરાવી, જાણો કોણ છે આ મહાશય












