પિતાએ દોઢ વર્ષના પુત્રને પાણીમાં ડુબાડીને મારી નાખ્યો, પત્નીના બીજા લગ્નથી હતો નારાજ

દરભંગા: બિહારના દરભંગાથી એક સનસનાટીભર્યો કિસ્સો સામે આવ્યો છે. જિલ્લાના ભાલપટ્ટી પોલીસ સ્ટેશન વિસ્તાર હેઠળના ફઝીલા ગામમાં એક માસૂમ બાળકની હત્યા કરવામાં આવી છે. દોઢ વર્ષના માસુમનો ખૂની બીજો કોઈ નહીં પણ તેનો પોતાનો પિતા હોવાનું બહાર આવ્યું છે.

પિતાએ જ કરી પુત્રની હત્યા

પત્નીના બીજા લગ્નથી નારાજ પિતા ચંદનએ માનવતા શરમાવે તેવુ કૃત્ય કર્યુ છે. આરોપ છે કે તેણે પોતાના જ દોઢ વર્ષના માસૂમ પુત્રને પાણીમાં ડૂબાડીને નિર્મમ રીતે હત્યા કરી દીધી. આ ઘટના સામે આવતા સમગ્ર વિસ્તારમાં શોક અને રોષની લાગણી ફેલાઈ ગઈ છે. ઘટનાની જાણ થતાં જ મૃતક બાળકના દાદા રામસોગરથ સાહનીએ ભાલપતિ પોલીસ સ્ટેશનમાં પહોંચીને પોતાના જ પુત્ર સામે ફરિયાદ નોંધાવી હતી. ફરિયાદના આધારે પોલીસે ચંદન વિરુદ્ધ FIR નોંધી તપાસ શરૂ કરી છે.

પોલીસનું કહેવું છે કે આરોપી પતિ પત્નીના બીજા લગ્નથી ખૂબ નારાજ હતો અને આ ગુસ્સા તથા માનસિક તણાવના કારણે તેણે આ પગલું ભર્યું છે. હાલ પોલીસ સમગ્ર મામલે તપાસ કરી રહી છે અને આરોપીની ધરપકડ તેમજ કાનૂની કાર્યવાહી હાથ ધરવામાં આવી છે. પોલીસે પુત્ર રાધવના મૃતદેહનો પણ કબજો લીધો છે અને તેને પોસ્ટમોર્ટમ માટે મોકલી આપ્યો છે.

ચંદન તેની પત્નીને હિમાચલ પ્રદેશ લઈ ગયો

સ્થાનિક ગ્રામજનોના જણાવ્યા મુજબ, ચંદને 2021 માં નજીકના ગામમાં ચાંદની કુમારી સાથે હિન્દુ રીતરિવાજ મુજબ લગ્ન કર્યા હતા. લગ્નના થોડા દિવસો પછી, તે તેની પત્નીને પોતાની સાથે હિમાચલ પ્રદેશ લઈ ગયો. તેમને એક પુત્રી અને પછી એક પુત્ર થયો. થોડા સમય પછી, ચંદન બંને બાળકોને તેમના દાદા-દાદી પાસે ગામમાં છોડી ગયો હતો.

ચંદન તેની પત્ની સાથે હિમાચલ પ્રદેશમાં મજૂરી કામ કરતો હતો. ચંદનની પત્ની કામ દરમિયાન કોઈની અન્ય પુરુષની નજીક આવી ગઈ. થોડા દિવસો પછી, તેઓએ હિમાચલ પ્રદેશમાં જ લગ્ન કરી લીધા અને ઘર છોડી દીધું. આનાથી ગુસ્સે થઈને, ચંદન સોમવારે સાંજે પોતાના ઘરે પાછો ફર્યો.

ઘરે પહોંચતા જ ચંદન પોતાના પુત્રને ગોદમાં ઉઠાવી ગામમાં ક્યાંક ફરવા લઈ ગયો હતો. ત્યારબાદ જેસીબીથી ખોદાયેલા એક ખાડામાં ભરાયેલા પાણીમાં બાળકને ડૂબાડી તેની નિર્મમ હત્યા કરી દીધી. હત્યા કર્યા બાદ તેણે બાળકનો મૃતદેહ એ જ ખાડામાં ફેંકી દીધો અને ઘેર પરત આવ્યો. જ્યારે દાદા રામસોગરથ સહની અને દાદી સરસ્વતી દેવીએ બાળકની શોધખોળ શરુ કરી, ત્યારે ચંદન થોડા સમય સુધી સૌને ગેરમાર્ગે દોરતો રહ્યો. પરંતુ ગ્રામજનો અને પરિવારજનોના ભારે દબાણ બાદ તેણે હત્યાની હકીકત કબૂલી લીધી, જેના કારણે સમગ્ર ગામમાં ચકચાર મચી ગઈ.

આરોપી હિમાચલ પ્રદેશમાં તેની પત્ની સાથે રહેતો હતો. તેની પત્નીએ તેને ત્યાં છોડીને બીજા પુરુષ સાથે લગ્ન કરી લીધા. આ ઘટના બાદ, આરોપી માનસિક તણાવ અને ગુસ્સાની સ્થિતિમાં હતો. આ હતાશામાં તેણે પોતાના જ પુત્રની હત્યા કરી દીધી. આરોપીની ધરપકડ કરવામાં આવી છે, અને આગળની કાનૂની કાર્યવાહી ચાલુ છે. – ધર્માનંદ કુમાર, ભાલપતિ પોલીસ સ્ટેશન અધિકારી

આ પણ વાંચો: ફેક્ટરીમાંથી બહાર બોલાવી 7 ગોળી વીંધી દીધી… બાંગ્લાદેશમાં હવે હિન્દુ પત્રકારની કરાઈ જાહેરમાં હત્યા