કાશ્મીરમાં સરકારી કર્મચારીના સ્વાંગમાં રહેલા આતંકીઓ વિરુદ્ધ પ્રશાસનની કાર્યવાહી

• કાશ્મીર પ્રશાસન દ્વારા બંધારણની કલમ 311 હેઠળ ચાર કર્મચારીઓને બરતરફ કરવામાં આવ્યા
• ભૂતકાળમાં વિવિધ સરકારો દ્વારા આતંકી ગતિવિધિઓ સાથે સંકળાયેલા લોકોની સરકારી તંત્રમાં ભરતી

નવી દિલ્હી, 7 ડિસેમ્બર : જમ્મુ અને કાશ્મીર વહીવટીતંત્ર આતંકવાદી ઇકોસિસ્ટમ અને તેના મુખ્ય હિતધારકો સામેની લડાઈને આગળ વધારી રહ્યું છે. જેના અંતર્ગત જમ્મુ અને કાશ્મીર પ્રશાસન દ્વારા બુધવારે બંધારણની કલમ 311 (2) (c) હેઠળ વધુ ચાર કર્મચારીઓને બરતરફ કર્યા છે. ભૂતકાળમાં વિવિધ સરકારો દ્વારા આવા અનેક લોકોને ગુપ્ત રીતે સરકારી તંત્રમાં સામેલ કરવામાં આવ્યા હતા.

ભારતના બંધારણની કલમ 311(2) મુજબ, સરકારી કર્મચારીને યોગ્ય તપાસ વિના બરતરફ, હટાવી અથવા પદભ્રષ્ટ કરી શકાતો નથી. સિવિલ સર્વન્ટને તેમની સામેના આરોપો વિશે જાણ કરવી જોઈએ અને તેમને સાંભળવાની વાજબી તક આપવી જોઈએ. જ્યારે કલમ 311(2)(c)એ કલમ 311(2)નો અપવાદ છે. જેમાં જણાવવામાં આવ્યું છે કે, જો રાષ્ટ્રપતિ અથવા રાજ્યપાલ સંતુષ્ટ હોય કે તે રાજ્યના હિતમાં નથી તો તપાસ કરવાની જરૂર રહેતી નથી.

ત્રણ વર્ષમાં 50થી વધુ કર્મચારીઓને બરતરફ કરવામાં આવ્યા

છેલ્લા ત્રણ વર્ષમાં, જમ્મુ અને કાશ્મીર ઓથોરિટીએ 50 થી વધુ કર્મચારીઓને બરતરફ કરવા માટે બંધારણની કલમ 311 (2) (c)નો ઉપયોગ કર્યો છે. આ કર્મચારીઓ સરકારમાં કામ કરતા હતા અને સરકારી તિજોરીમાંથી પગાર લેતા હતા, પરંતુ પાકિસ્તાની આતંકવાદી સંગઠનોને મદદ કરતા હતા. તેમનું કામ આતંકવાદીઓને સાધનો પૂરા પાડવા, આતંકવાદી વિચારધારાનો પ્રચાર, આતંકવાદ માટે નાણાં એકત્ર કરવાનું અને અલગતાવાદી એજન્ડાને આગળ ધપાવવાનું હતું.

તેમનું કામ શું હતું અને તેમણે શું કર્યું?

આ મામલામાં ઉચ્ચ શિક્ષણ વિભાગમાં લેબોરેટરી આસિસ્ટન્ટ તરીકે કામ કરતા સલામ રાથેરનો સમાવેશ થાય છે. પ્રયોગશાળા સહાયકનું કામ વિવિધ પ્રયોગશાળા સાધનોનો ઉપયોગ કરીને પરીક્ષણ માટે નમૂનાઓ તૈયાર કરવાનું અને કોલેજના તમામ લેબોરેટરી રેકોર્ડની જાળવણી કરવાનું છે. પરંતુ, અધિકારીઓના કહેવા મુજબ, સલામ રાથેરનું અસલી કામ આતંકવાદી સંગઠનો હિઝબુલ મુજાહિદ્દીન અને લશ્કર-એ-તૈયબા માટે નિર્દોષ યુવાનોની ભરતી કરવાનું, ઓવરગ્રાઉન્ડ કામદારો અને લોજિસ્ટિક્સ સમર્થકોનું નેટવર્ક ઊભું કરવાનું હતું. તેમણે સૌપ્રથમ 1990માં દૈનિક વેતન મેળવનાર તરીકે સરકારી તંત્રમાં સામેલ કરવામાં આવ્યા હતા અને બાદમાં 1998માં નિયમિત કરવામાં આવ્યા હતા.

આ પણ જુઓ :જમ્મુ-કાશ્મીર: રાજૌરી નેશનલ હાઈવે પર બસ પલટી ખાતા એકનું મૃત્યુ, 22 લોકો ઘવાયા