અમેરિકા-ઇરાન વચ્ચે 2 અઠવાડિયાનો યુદ્ધવિરામ, ટ્રમ્પે હુમલા રોક્યા, ઇઝરાયેલ પણ સહમત

ceasefire between America and Iran: અમેરિકા અને ઇરાન વચ્ચે વધતા તણાવ વચ્ચે અચાનક મોટો વળાંક આવ્યો છે. અમેરિકાના રાષ્ટ્રપતિ ડોનાલ્ડ ટ્રમ્પે ઇરાન પર થનારી સૈન્ય કાર્યવાહી હાલ માટે સ્થગિત કરવાનો નિર્ણય લીધો છે. બંને દેશો વચ્ચે 2 અઠવાડિયા માટે યુદ્ધવિરામ લાગુ કરવાની સહમતિ બની છે, જેમાં ઇઝરાયેલ પણ હુમલા રોકવા માટે તૈયાર થયું છે.

ટ્રમ્પે જણાવ્યું કે આ નિર્ણય બંને પક્ષો વચ્ચે ચર્ચા અને કૂટનીતિ માટેનો માર્ગ ખોલે છે. તેમણે સોશિયલ મીડિયા પર પોસ્ટ કરીને કહ્યું કે તેઓ 2 અઠવાડિયા માટે ઇરાન પરના બોમ્બમારી અને હુમલાને અટકાવવા માટે તૈયાર છે.

આ નિર્ણય પાછળ પાકિસ્તાનના પ્રધાનમંત્રી શહબાઝ શરીફ અને સેનાપ્રમુખ આસિમ મુનીર સાથે થયેલી ચર્ચાનો પણ મહત્વનો ભાગ રહ્યો છે. તેમણે હુમલાને અટકાવવાની અપીલ કરી હતી.

ટ્રમ્પે સ્પષ્ટ કર્યું કે આ યુદ્ધવિરામ શરતી છે. ઇરાને સ્ટ્રેટ ઓફ હોર્મુઝ ફરી ખોલવું પડશે, જે વૈશ્વિક વેપાર માટે ખૂબ મહત્વનું છે. તેમના અનુસાર આ પગલું તણાવ ઘટાડવામાં મદદરૂપ બનશે.

ટ્રમ્પે દાવો કર્યો કે અમેરિકાએ પોતાના સૈન્ય લક્ષ્યો પ્રાપ્ત કરી લીધા છે અને હવે લાંબા ગાળાના શાંતિ કરાર તરફ આગળ વધવામાં આવી રહ્યું છે. તેમણે જણાવ્યું કે ઇરાન તરફથી 10 મુદ્દાઓનો પ્રસ્તાવ પણ મળ્યો છે, જેમાંથી ઘણા મુદ્દાઓ પર પહેલેથી જ સહમતિ બની ગઈ છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

આ 2 અઠવાડિયાના યુદ્ધવિરામથી બંને પક્ષોને અંતિમ સમજૂતી સુધી પહોંચવા માટે સમય મળશે. આ દરમિયાન આગળની મહત્વપૂર્ણ ચર્ચાઓ પાકિસ્તાનમાં યોજાશે.

ગૌરવપૂર્ણ બાબત એ છે કે ટ્રમ્પે આ જાહેરાત પોતાની અગાઉ નક્કી કરેલી સમયમર્યાદા પૂરી થવાની થોડા સમય પહેલા જ કરી હતી. અગાઉ તેમણે કડક નિવેદન આપ્યું હતું, જેના કારણે વૈશ્વિક સ્તરે ચિંતા વધી હતી. પરંતુ હાલના નિર્ણયથી વિશ્વમાં થોડી રાહતનો માહોલ સર્જાયો છે.

વ્હાઇટ હાઉસ તરફથી પણ આ અંગે નિવેદન આપવામાં આવ્યું છે. પ્રેસ સેક્રેટરી કેરોલિન લેવિટે જણાવ્યું કે ચર્ચાઓ આગળ પણ ચાલુ રહેશે અને આગળનો રસ્તો રાષ્ટ્રપતિના નિર્ણય પર આધારિત રહેશે. તેમણે જણાવ્યું કે અમેરિકાની શક્તિશાળી સૈન્યની ભૂમિકાને કારણે ઇરાન સ્ટ્રેટ ઓફ હોર્મુઝ ખોલવા તૈયાર થયું છે.

હવે સૌની નજર પાકિસ્તાનમાં થનારી આગામી ચર્ચાઓ પર છે, જ્યાંથી આ યુદ્ધવિરામ કાયમી શાંતિમાં પરિવર્તિત થાય છે કે નહીં તે સ્પષ્ટ થશે.

આ પણ વાંચો : 20 એપ્રિલથી શરૂ થશે સારા દિવસો, ગુરૂની ચાલ બદલાવાથી થશે લાભ