સંસદમાં વંદે માતરમ પર 10 કલાક ચર્ચા થશે, જાણો કોણ કોણ હાજર રહેશે

PM મોદી સોમવારે લોકસભામાં વંદે માતરમની 150મી વર્ષગાંઠ નિમિત્તે લોકસભામાં ચર્ચાની શરૂઆત કરશે. આ ચર્ચા લોકસભાના કાર્યક્રમમાં સોમવારે સૂચિબદ્ધ છે અને તેના માટે કુલ 10 કલાકનો સમય ફાળવવામાં આવ્યો છે. આ ચર્ચામાં રક્ષા પ્રધાન રજનાથ સિંહ બીજા વક્તા હશે. કોંગ્રેસના નાયબ નેતા ગૌરવ ગોગોઈ, પ્રિયંકા ગાંધી વાડ્રા, તેમજ અન્ય સભ્યો પણ ચર્ચામાં ભાગ લેશે.

સંસદમાં આ ચર્ચા બંકિમચંદ્ર ચેટર્જી દ્વારા લખાયેલ અને જદુનાથ ભટ્ટાચાર્ય દ્વારા સંગીતબદ્ધ વંદે માતરમની 150મી વર્ષગાંઠની વર્ષભરની ઉજવણીનો એક ભાગ છે.

મોદીએ કોંગ્રેસ પર આરોપ લગાવ્યો

PM મોદીએ કોંગ્રેસ પાર્ટી પર નિશાન સાધ્યું હતુ અને આરોપ લગાવ્યો કે કોંગ્રેસે 1937માં ગીતમાંથી મુખ્ય પંક્તિઓ કાઢી નાખી હતી અને વિભાજનના બીજ વાવ્યા હતા. 7 નવેમ્બરના રોજ, મોદીએ વંદે માતરમની 150મી વર્ષગાંઠ નિમિત્તે વર્ષભરની ઉજવણી શરૂ કરી હતી, જેનો હેતુ ખાસ કરીને યુવાનો અને વિદ્યાર્થીઓમાં ગીતના મહત્વ વિશે જાગૃતિ લાવવાનો હતો.

અમિત શાહ રાજ્યસભામાં ચર્ચા શરૂ કરશે

અધિકારીઓએ જણાવ્યું હતું કે, ચર્ચા દરમિયાન, વંદે માતરમ સાથે સંબંધિત ઘણા મહત્વપૂર્ણ અને અજાણ્યા પાસાઓ દેશ સમક્ષ જાહેર કરવામાં આવશે. ગૃહમંત્રી અમિત શાહ મંગળવારે રાજ્યસભામાં ચર્ચા શરૂ કરશે, અને આરોગ્ય પ્રધાન અને રાજ્યસભાના નેતા જે.પી. નડ્ડા બીજા વક્તા હશે. લોકસભા મંગળવાર અને બુધવારે મતદાર યાદીના સ્પેશિયલ ઇન્ટેન્સિવ રિવિઝન (SIR) ના તમામ પાસાઓને આવરી લેતા ચૂંટણી સુધારાઓ પર પણ ચર્ચા કરશે. રાજ્યસભા બુધવાર અને ગુરુવારે ચૂંટણી સુધારાઓ પર ચર્ચા કરશે. 1 ડિસેમ્બરથી શરૂ થયેલા શિયાળુ સત્રના પ્રથમ બે દિવસ SIR પર વિપક્ષી પક્ષોના હોબાળાને કારણે ખોરવાઈ ગયા હતા.

રાહુલ અને પ્રિયંકા ગાંધી વિપક્ષ તરફથી વક્તા હશે

કોંગ્રેસના ઉપનેતા ગૌરવ ગોગોઈ અને પ્રિયંકા ગાંધી લોકસભામાં રાષ્ટ્રગીત વંદે માતરમની 150મી વર્ષગાંઠ પર ચર્ચામાં ભાગ લેશે, જ્યારે વિરોધ પક્ષના નેતા રાહુલ ગાંધી બીજા દિવસે ચૂંટણી સુધારા પર બોલશે. સૂત્રોએ જણાવ્યું કે કોંગ્રેસે બંને ચર્ચાઓ માટે વક્તાઓની યાદીને અંતિમ રૂપ આપી દીધું છે, જે સોમવાર, મંગળવાર અને બુધવારે લોકસભામાં યોજાશે.

નીચલા ગૃહમાં કોંગ્રેસના અન્ય વક્તાઓમાં દીપેન્દ્ર હુડા, બિમોલે અકોઇજામ, પ્રણિતી શિંદે, પ્રશાંત પડોલે, કિરણ ચમાલા રેડ્ડી અને જ્યોત્સના મહંતનો સમાવેશ થાય છે. ચૂંટણી સુધારા ચર્ચા માટે લોકસભામાં કોંગ્રેસના વક્તાઓમાં કે.સી. વેણુગોપાલ, મનીષ તિવારી, વર્ષા ગાયકવાડ, મોહમ્મદ જાવેદ, ઉજ્જવલ રમણ સિંહ, ઇસા ખાન, રવિ મલ્લુ, ઇમરાન મસૂદ, ગોવલ પદવી અને જ્યોતિમણિનો સમાવેશ થાય છે. રાજ્યસભામાં મંગળવાર, બુધવાર અને ગુરુવારે બંને મુદ્દાઓ પર ચર્ચા થશે, જેમાં વિપક્ષના નેતા મલ્લિકાર્જુન ખડગે ભાગ લેશે.

આ પણ વાંચો: ઇન્ડિગો ફ્લાઇટ સંકટ પર સુપ્રીમ કોર્ટમાં આજે સુનાવણી, જાણો PIL માં શું માંગણીઓ કરવામાં આવી