Crocodile Attack Near Vadodara: વડોદરા જિલ્લાના ડભોઇ તાલુકામાં મગરના હુમલાની વધુ એક દુઃખદ ઘટના સામે આવી છે. પારાગામ નજીકથી પસાર થતી ઓરસંગ નદીમાં માછીમારી કરી રહેલા એક આધેડ પર અચાનક મગરે હુમલો કરી તેમને નદીના ઊંડા પાણીમાં ખેંચી લીધો હતો. હુમલામાં ગંભીર ઇજાઓ પહોંચતાં તેમનું ઘટનાસ્થળે જ મોત થયું હતું. આ બનાવ બાદ સમગ્ર વિસ્તારમાં ભયનો માહોલ સર્જાયો છે અને સ્થાનિકોએ વન વિભાગ પાસે સુરક્ષાના કડક પગલાં લેવાની માંગ ઉઠાવી છે.
માછીમારી દરમિયાન અચાનક મગરે કર્યો હુમલો
મળતી માહિતી મુજબ, મૃતકની ઓળખ બજારિયા ઉર્ફે દિનેશ નાયક (ઉંમર આશરે 50 વર્ષ) તરીકે થઈ છે. તેઓ મૂળ મધ્ય પ્રદેશના રહેવાસી હતા અને હાલ પારાગામમાં ખેતી મજૂરીનું કામ કરતા હતા. શનિવારે સાંજે તેઓ ઓરસંગ નદીના કિનારે માછીમારી કરી રહ્યા હતા, ત્યારે અચાનક પાણીમાંથી બહાર આવેલા મગરે તેમના પર હુમલો કર્યો અને તેમને નદીમાં ખેંચી ગયો.
થોડીવાર બાદ મૃતદેહ કિનારે મળ્યો
સ્થાનિકોના જણાવ્યા મુજબ, મગર થોડા સમય સુધી આધેડને પાણીમાં ખેંચીને લઈ ગયો હતો. બાદમાં તેણે તેમને છોડતા આસપાસ હાજર લોકોએ શોધખોળ શરૂ કરી હતી. થોડા સમય પછી દિનેશ નાયકનો મૃતદેહ નદીના કિનારે મળી આવ્યો હતો. હુમલામાં તેમની છાતી અને શરીરના અન્ય ભાગોમાં ગંભીર ઇજાઓ પહોંચી હતી, જેના કારણે તેમનું મોત નીપજ્યું હોવાનું જાણવા મળ્યું છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
સ્થાનિકોમાં ભયનો માહોલ
આ ઘટનાએ પારાગામ સહિત આસપાસના ગામોમાં ચિંતા અને ભય ફેલાવ્યો છે. ઓરસંગ નદીમાં મગરોની હાજરીને કારણે અગાઉ પણ અનેક વખત હુમલાની ઘટનાઓ બની ચૂકી છે. તેમ છતાં લોકો માછીમારી અને અન્ય કામ માટે નદી કિનારે જતા રહેતા હોવાથી સતત જોખમ યથાવત રહ્યું છે.
વન વિભાગ પાસે કડક કાર્યવાહી કરવાની માંગ
સ્થાનિક ગ્રામજનોએ ડભોઇ વન વિભાગ સમક્ષ પારાગામ, ભાલોદરા, ગામડી સહિત ઓરસંગ નદીના જોખમી વિસ્તારોમાં માછીમારી અને અનાવશ્યક અવરજવર પર પ્રતિબંધ મૂકવાની માંગ કરી છે. સાથે જ નદી કિનારે ચેતવણીના બોર્ડ લગાવવા, નિયમિત પેટ્રોલિંગ શરૂ કરવા અને મગરોના જોખમ અંગે લોકોને જાગૃત કરવા માટે પણ રજૂઆત કરવામાં આવી છે.
સુરક્ષા અંગે સવાલો ઊભા થયા
વારંવાર મગરના હુમલાની ઘટનાઓ સામે આવતી હોવા છતાં પૂરતી સુરક્ષા વ્યવસ્થા ન હોવાને કારણે લોકોમાં અસંતોષ જોવા મળી રહ્યો છે. સ્થાનિકોનું માનવું છે કે સમયસર અસરકારક પગલાં લેવામાં આવે તો આવી દુર્ઘટનાઓ અટકાવી શકાય અને નિર્દોષ લોકોના જીવ બચાવી શકાય.
આ પણ વાંચો: 2027ની ચૂંટણી પહેલાં દિવ્યેશ સોલંકીના નામે રાજકીય ચર્ચા, કોળી સમાજે ઉમેદવારીની કરી માંગ
